រាជធានីភ្នំពេញ ៖ អាជីវករលក់សាច់គោ ក្របីស្រស់ៗក៏ដូចជា សាច់ក្លាស្សេ និងសាច់ងៀតនៅតាមទីផ្សារនានានៅក្នុងរាជធានីភ្នំពេញបានធ្វើការត្អូញត្អែរ លក់ពុំសូវដាច់នោះទេ បន្ទាប់ពីសមត្ថកិច្ចគយកម្ពុជាចាប់សាច់ក្របី ក្លាស្សេចំនួន៣កុងតឺន័រ ដែលនាំចូលពីប្រទេសឥណ្ឌា…
រាជធានីភ្នំពេញ ៖ អាជីវករលក់សាច់គោ ក្របីស្រស់ៗក៏ដូចជា សាច់ក្លាស្សេ និងសាច់ងៀតនៅតាមទីផ្សារនានានៅក្នុងរាជធានីភ្នំពេញបានធ្វើការត្អូញត្អែរ លក់ពុំសូវដាច់នោះទេ បន្ទាប់ពីសមត្ថកិច្ចគយកម្ពុជាចាប់សាច់ក្របី ក្លាស្សេចំនួន៣កុងតឺន័រ ដែលនាំចូលពីប្រទេសឥណ្ឌា ដែលមានផ្ទុកមេរោគកូវីដ១៩។
ទោះបីជាយ៉ាងណាមាន អាជីវករលក់សាច់ស្រស់ខ្លះ ក៏បានអះអាងការលក់ដូររបស់គាត់មិនបានប៉ះពាល់នោះទេ ដោយសារតែម៉ូយដែលទៅទិញសាច់របស់គាត់បានដឹងពីប្រវត្តិច្បាស់លាស់ ។ទន្ទឹមនោះក៏មានអាជីវករខ្លះដែលរកស៊ីលក់សាច់ក្របីក្លាស្សេនាំចូលពីបរទេស ក៏បានព្យាយាមលាក់បាំងពីប្រភព និងបានអះអាងថា គាត់លក់សាច់គោនោះទេ ដែលផ្ទុយពីការអោយដឹងពី អាជីវករដូចគ្នានោះ ។
ដើម្បីស្វែងយល់ និងចង់ដឹងពីស្ថានភាពការលក់ដូររបស់អាជីវករ សាច់គោនិងសាច់ក្របីនៅលើទីផ្សារកោះសន្តិភាពក៏បានចុះទៅសាកសួរដោយផ្ទាល់ជុំវិញការលក់ដូរសាច់គោ និងសាច់ក្របី នៅលើទីផ្សារដើមគរដែលជាផ្សារលក់ដុំលក់រាយសាច់ដ៏ធំមួយនៅកណ្តាលរាជធានីភ្នំពេញ ។
តាមស្ត្រីឈ្មោះ សុខ អេង អាយុ៣៤ឆ្នាំ ជាអាជីវករលក់លក់សាច់គោនៅផ្សារ ដើមគរ បានអោយដឹងថា រយៈពេល២ថ្ងៃមកហើយ គាត់លក់មិនសូវដាច់នោះទេ បន្ទាប់ពីមានការភ្ញាក់ផ្អើលដែលសមត្ថកិច្ចបានចាប់សាច់ក្របី ក្លាស្សេ នាំចូលពីប្រទេសឥណ្ឌ ដែលមានផ្ទុកមេរោគកូវីដ១៩ ។ កន្លងមកនៅក្នុង១ថ្ងៃគាត់លក់សាច់គោស្រស់ ដែលកាប់នៅក្នុងស្រុកអស់ប្រមាណ១០០គីឡូក្រាម ដោយក្នុង១គីឡូក្រាម ៤ម៉ឺនរៀលទៅ៤៥០០០រៀលទៅតាមប្រភេទសាច់ល្អ តែប៉ុន្មានថ្ងៃនេះលក់បានប្រមាណ៣០ទៅ៤០គីឡូក្រាមតែប៉ុណ្ណោះ ។
អាជីវកររូបនោះបានអោយដឹងទៀតថា បន្ទាប់ពីភ្ញាក់ផ្អើលចាប់បានសាច់ក្របី នាំចូលមានមេរោគកូវីដរយៈពេល២ថ្ងៃនេះនៅពេលដែលភ្ញៀវចូលទិញសួរនាំ ថា សាច់គោ ឬសាច់ក្របី ព្រោះអ្នកខ្លះមិនដឹង និងស្គាល់ច្បាស់ថា សាច់គោ ឬក្របីឡើយ និងម្យ៉ាងទៀតមានការផ្អើលតៗគ្នា ។ ចំណែកអ្នកនៅតាមហាងនានាមួយចំនួនក៏បានផ្អាកទិញសាច់យកទៅអាំងដែរ ។
តាមការអោយដឹងពី ចែ នី អាយុ៥៥ឆ្នាំ ដែលជាអាជីវករលក់សាច់គោ តាមកញ្ច្រែងនៅខាងកើតផ្សារដើមគរ បានអោយដឹងថា រយៈពេល៣ថ្ងៃមកហើយ លក់មិនសូវដាច់នោះទេ ដែលពីមុនលក់អស់ប្រមាណ៣០គីឡូក្រាមក្នុង១ថ្ងៃស្រាប់តែឥឡូវលក់ប្រមាណតែជាង១០គីឡូក្រាមមិនអស់ផង ។ ប៉ុន្មានថ្ងៃនេះនៅពេលដែលគាត់ហៅម៉ូយអោយទិញសាច់គោ ស្រាប់តែគាត់ឆ្លើយតបវិញថា អត់ទេខ្លាចកូវីដ ។
សូម្បីកន្លងមានអ្នកទិញយកទៅអាំងក៏លែងទិញដែលព្រោះលក់មិនដាច់ ដោយអ្នកទិញប្រាប់ថា ទិញសាច់គោអាំងស្រស់ៗវិញ (គោអាំងទាំងមូល) ។ ដោយសារតែមានការផ្អើលតៗគ្នាទើបធ្វើអោយការលក់ដូរសាច់គោធ្លាក់ចុះ ។ ចំណែកអាជីវករម្នាក់លក់សាច់ក្លាស្សេនាំចូលពីបរទេសម្នាក់ក៏បានអោយដឹងដែរថា ប៉ុន្មានថ្ងៃនេះស្ងាត់ណាស់លក់មិនសូវដាច់ទេ និយាយរួមស្ងាត់តាំងផ្ទុះកូវីដមកម្លេះ ។
អាជីវកររូបនោះបានបញ្ជាក់ថា គាត់លក់សាច់គោមិនមែនសាច់ក្របីនោះទេ ដែលនាំចូលពីបរទេសតែពុំដឹងថា នាំចូលពីប្រទេសណាឡើយព្រោះគាត់បានទិញពីគេដែរ ។ ទោះបីជាយ៉ាងណាអាជីវកររូបនោះនិយាយហាក់ដូចជា លាក់ពីប្រវត្តិសាច់របស់គាត់ទោះបីមានគេប្រាប់ថា គាត់លក់សាច់ក្របីនាំចូលយ៉ាងណាក៏ដោយ ។ ទោះបីជាយ៉ាងណាមានអាជីវករមួយចំនួន ក៏បានអោយដឹងថា សាច់គោ សាច់ក្របីស្រស់ និងកាប់ក្នុងស្រុកមិនសូវមានការប៉ះពាល់នោះទេសម្រាប់តែអ្នកទិញមានការយល់ដឹងពីប្រវត្តិសាច់ និងអ្នកលក់នោះ ។
អាជីវករលក់សាច់ក្របី កាប់ក្នុងស្រុកម្នាក់បានអោយដឹងថា ការលក់ដូរសាច់ក្របីរបស់គាត់មិនសូវប៉ះពាល់នោះទេ ព្រោះគាត់លក់តែសាច់ក្របីស្រស់ បន្តិចបន្តួច ហើយលក់តែសាច់មិនសូវល្អសម្រាប់អោយម៉ូយទិញយកទៅស្លម្ជូរគ្រឿងលក់តែប៉ុណ្ណោះ ។
ចំណែកស្ត្រីម្នាក់ដែលជាអាជីវករសាច់គោកនៅផ្សារដើមគរដែរ ផ្នែកខាងកើតផ្លូវបានអោយដឹងថា ទោះបីមានការផ្អើលយ៉ាងណាគាត់បានលក់ដូរធម្មតា ព្រោះគាត់លក់តែសាច់គោស្រែដែលទិញពីភ្នំឱរ៉ាមួយៗមកកាប់លក់ហើយ អ្នកទិញបានដឹងពីប្រវត្តិដែលគាត់លក់សាច់ស្រស់រយៈពេលប្រមាណ៤០ឆ្នាំ មកហើយ ។
ទោះបីជាយ៉ាងណា លោកស្រីក៏បានបញ្ជាក់ថា ប៉ុន្មានថ្ងៃនេះរាងស្ងាត់បន្តិច ព្រោះមិនសូវមានម៉ូយទិញយកទៅអាំង ៕
ចែករំលែកព័តមាននេះ