រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្ខពួកបីនាក់បានធ្វើសកម្មភាពលួចគាស់សោទ្វារផ្ទះលក់គ្រឿងបន្លាស់ និងជួសជុលម៉ូតូយីហោ ឯក ម៉េង បានសម្រេចបំរុងនិងបើកទ្វារចូលទៅលួចទ្រព្យសម្បត្តិ ត្រូវប្រជាពលរដ្ឋចាប់ប្រគល់ឲ្យសមត្ថកិច្ចបង្កឲ្យមានការភ្ញាក់ផ្អើលឡើង កាលពីវេលាម៉ោង១០និង២០នាទីយប់…
រាជធានីភ្នំពេញ ៖ ជនសង្ស័យម្នាក់ ក្នុងចំណោមបក្ខពួកបីនាក់បានធ្វើសកម្មភាពលួចគាស់សោទ្វារផ្ទះលក់គ្រឿងបន្លាស់ និងជួសជុលម៉ូតូយីហោ ឯក ម៉េង បានសម្រេចបំរុងនិងបើកទ្វារចូលទៅលួចទ្រព្យសម្បត្តិ ត្រូវប្រជាពលរដ្ឋចាប់ប្រគល់ឲ្យសមត្ថកិច្ចបង្កឲ្យមានការភ្ញាក់ផ្អើលឡើង កាលពីវេលាម៉ោង១០និង២០នាទីយប់ ថ្ងៃទី២៨ខែកក្កដានេះត្រង់ចំណុចផ្ទះលេខ៣៥៥Eo ផ្លូវ១៥០កែង និងផ្លូវម៉ៅសេទុង ក្នុងសង្កាត់ផ្សារដេប៉ូទី២ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុដល់ម៉ោងត្រូវសម្រាក ម្ចាស់ផ្ទះលក់គ្រឿងបន្លាស់ និងជួសជុលម៉ូតូនោះក៏បាននាំគ្នាបិទទ្វារចាក់សោពីខាងក្រៅ ហើយក៏ចេញទៅសម្រាកនៅផ្ទះមួយផ្សេងទៀតដែលនៅក្បែរនោះ ។ លុះដល់វេលាកើតហេតុក៏លេចមុខជនសង្ស័យ រួមជាមួយបក្ខពួកពីរនាក់ទៀតបានដើរមកធ្វើសកម្មភាពគាស់សោទ្វារផ្ទះកើតហេតុ។
បន្ទាប់ពីធ្វើការគាស់សោទ្វារបានសម្រេច ជនសង្ស័យ និងបក្ខពួកក៏បំរុង និងបើកទ្វារផ្ទះចូលទៅខាងក្នុងទៅហើយ ស្រាប់តែមានប្រជាពលរដ្ឋដែលរស់នៅក្បែរនោះបានឃើញពីសកម្មភាពរបស់ជនសង្ស័យក៏ចេញមកស្រែកឆោឡោ បង្កឲ្យមានការភ្ញាក់ផ្អើលនាំគ្នាដេញចាប់ក្របួចបានជនសង្ស័យម្នាក់ ចំណែកឯបក្ខពួកចំនួន២នាក់ទៀតក៏បានរត់គេចខ្លួនចេញពីកន្លែងកើតហេតុបាត់ស្រមោលដោយសុវត្ថិភាព ។
ប្រជាពលរដ្ឋក៏បានទំនាក់ទំនងប្រាប់ទៅម្ចាស់ផ្ទះ រួមជាមួយសមត្ថកិច្ចមូលដ្ឋានឲ្យចុះមកធ្វើអន្តរាគមន៍ភ្លាមៗផងដែរ ។
ក្រោយពេលកើតហេតុ ជនសង្ស័យក៏ត្រូវបានសមត្ថកិច្ចនាំទៅកាន់ប៉ុស្តិ៍នគរបាលរដ្ឋបាលផ្សារដេប៉ូទី២ ដើម្បីធ្វើការសាកសួរ និងកសាងសំណុំរឿងបញ្ជូនទៅអធិការដ្ឋាននគរបាលខណ្ឌទួលគោករង់ចាំចាត់ការទៅតាមនីតិវិធី ៕
ចែករំលែកព័តមាននេះ