ខេត្តបន្ទាយមានជ័យ ៖ កម្លាំងអាវុធហត្ថបានធ្វើការចាប់ខ្លួនក្មេងស្ទាវម្នាក់ក្នុងចំណោម៣នាក់ ដោយបញ្ជូនទៅកាន់តុលាការទៅសាលាដំបូងខេត្តបន្ទាយមានជ័យ កាលពីថ្ងៃទី២៦ កក្កដា ក្រោយធ្វើសកម្មភាពជិៈម៉ូតូ០២គ្រឿងដេញកាប់និងគប់ដុំថ្មទៅលើក្មេងម្នាក់ បង្កឲ្យមានការភ្ញាក់ផ្អើលដល់ប្រជាពលរដ្ឋ ពិសេសអ្នកធ្វើដំណើរតាមផ្លូវក្នុងក្រុងសិរីសោភ័ណ ។…
ខេត្តបន្ទាយមានជ័យ ៖ កម្លាំងអាវុធហត្ថបានធ្វើការចាប់ខ្លួនក្មេងស្ទាវម្នាក់ក្នុងចំណោម៣នាក់ ដោយបញ្ជូនទៅកាន់តុលាការទៅសាលាដំបូងខេត្តបន្ទាយមានជ័យ កាលពីថ្ងៃទី២៦ កក្កដា ក្រោយធ្វើសកម្មភាពជិៈម៉ូតូ០២គ្រឿងដេញកាប់និងគប់ដុំថ្មទៅលើក្មេងម្នាក់ បង្កឲ្យមានការភ្ញាក់ផ្អើលដល់ប្រជាពលរដ្ឋ ពិសេសអ្នកធ្វើដំណើរតាមផ្លូវក្នុងក្រុងសិរីសោភ័ណ ។
លោកវរសេនីយ៍ត្រីយ៉ាន់ សុវណ្ណ មេបញ្ចាការមូលដ្ឋានកងរាជអាវុធហត្ថក្រុងសិរីសោភ័ណបានឱ្យដឹងថា៖ យោងតាមសាក្សីនៅកន្លែងកើតហេតុបានឱ្យដឹងថា៖ នៅវេលាម៉ោង១២និង៣០នាទីថ្ងៃទី២០ កក្កដា ឆ្នាំ២០២១ នៅចំណុចលើកំណាត់ផ្លូវជាតិលេខ៥ ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ មានក្រុមក្មេងស្ទាវ១ក្រុមបានធ្វើសកម្មភាពជិះម៉ូតូចំនួន០២គ្រឿង ម៉ាកហុងដាស្គុបពី ពណ៌ខ្មៅ១គ្រឿង និងម៉ូតូម៉ាកហុងដាCD ពណ៌ខ្មៅ១គ្រឿង បានធ្វើសកម្មភាពយកកាំបិតប៉័ងតោ និងដុំថ្មគប់ទៅលើជនរងគ្រោះបណ្ដាលឱ្យរងរបួសដៃខាងឆ្វេង០១កន្លែង និងបែកអាវម៉ូតូខាងស្ដាំ១កន្លែង បង្កឱ្យមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋដែលរស់នៅក្បែរនោះ ក្រោយពីធ្វើសកម្មភាពរួចក្រុមក្មេងស្ទាវបានបើកម៉ូតូរត់គេចខ្លួនបាត់អស់ ។
លោកវរសេនីយ៍ត្រី យ៉ាន់ សុវណ្ណ បានឱ្យដឹងទៀតថា ក្រោយបានទទួលសេចក្ដីរាយការណ៍ពីប្រជាពលរដ្ឋនៅកន្លែងកើតហេតុ និងដោយទទួលបាននូវពាក្យបណ្ដឹងពីជនរងគ្រោះផង និងអនុវត្តតាមបញ្ជារបស់លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យ ។ លោកបានដឹកនាំកម្លាំងចុះដល់កន្លែងកើតហេតុ ហើយសួរនាំអំពីដំណើររឿងដែលបានកើតឡើងព្រមទាំងប្រមូលរាល់ភស្ដុតាង ដោយសហការជាមួយប្រជាពលរដ្ឋរស់នៅក្បែរកន្លែងកើតហេតុដើម្បីយករូបភាពតាមរយ:កាមេរ៉ាសុវត្ថិភាព ទើបឈានដល់កំណត់បានពីមុខសញ្ញានោះ ។
លោកមេបញ្ជាការបានបន្តទៀតថា៖ ដោយផ្អែកលើរូបភាពកាមេរ៉ាសុវត្ថិភាព លោកបានដឹកនាំកម្លាំងធ្វើការស្រាវជ្រាវរហូតដល់ថ្ងៃទី២១ កក្កដា បានរកឃើញក្រុមក្មេងស្ទាវនៅចំណុចតារាងបាល់តាកី ស្ថិតក្នុងភូមិ/សង្កាត់អូរអំបិល ក្រុងសិរីសោភ័ណ ពេលនោះកម្លាំងបានធ្វើប្រតិបត្តិការបង្ក្រាប តែក្រុមក្មេងស្ទាវដឹងខ្លួនទាន់ហើយរត់គេចខ្លួនអស់ បន្សល់ទុកនៅតែម៉ូតូ១គ្រឿងម៉ាកស្គុបពី ពណ៌ខ្មៅ ពាក់ស្លាកលេខ ប.មានជ័យ 1U-6386 ។
ទន្ទឹមនោះដែរ កម្លាំងមូលដ្ឋានកងរាជអាវុធហត្ថក្រុងសិរីសោភ័ណនៅតែបន្តធ្វើការស្រាវជ្រាវរហូតដល់វេលាម៉ោង១៩ និង៣០នាទី ថ្ងៃទី២៦ កក្កដា ឆ្នាំ២០២១ ទើបឃាត់ខ្លួនបានជនសង្ស័យម្នាក់ឈ្មោះ យូរ បញ្ញា ហៅខ្នារ ភេទប្រុស អាយុ១៩ឆ្នាំ នៅចំណុចផ្លូវចុះរោងចក្រទឹកស្អាត ស្ថិតក្នុងភូមិគោរដ្ឋាន សង្កាត់អូរអំបិល ក្រុងសិរីសោភ័ណ រួមទាំងដកហូតម៉ូតូ០១គ្រឿងម៉ាកហុងដាCD ពណ៌ខ្មៅ ពាក់ស្លាកលេខ ប.មានជ័យ 1V-4750 ដែលជាម៉ូតូជិះធ្វើសកម្មភាព ហើយបញ្ជូនមកមូលដ្ឋានកងរាជអាវុធហត្ថក្រុងដើម្បីធ្វើការសាកសួរ ។
ជនសង្ស័យរូបនេះ បានឆ្លើយសារភាពថា នៅថ្ងៃកើតហេតុ រូបគេមានគ្នាចំនួន០៤នាក់មាន៖ ១/-គឺជារូបខ្លួន ឈ្មោះ យូរ បញ្ញា (ខ្នារ) ភេទប្រុស អាយុ១៩ឆ្នាំ បច្ចុប្បន្ន រស់នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។ ២/-ឈ្មោះ អាំង ពុយរាំង (បារាំង) ភេទប្រុស អាយុប្រហែល១៧ឆ្នាំ បច្ចុប្បន្ន រស់នៅភូមិ/សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។ ៣/-ឈ្មោះ រ័ត្ន អាយុប្រហែល១៦ឆ្នាំ មិនស្គាល់លំនៅដ្ឋាន។៤/-មិនស្គាល់ឈ្មោះ ត្រូវជាមិត្តភ័ក្ររបស់ឈ្មោះ រ័ត្ន ពិតជាបានធ្វើសកម្មភាពជិះម៉ូតូដេញកាប់ និងគប់ដុំថ្មទៅលើជនរងគ្រោះឈ្មោះ ផេម ទីណា ភេទប្រុស ពិតប្រាកដមែន ដោយឈ្មោះ រ័ត្ន យកកាំបិតប៉័ងតោគប់ និងឈ្មោះ បារាំង បានគប់ដុំថ្ម ទៅលើឈ្មោះ ផេម ទីណា ផងដែរ ចំណែករូបគេជាអ្នកឌុបឈ្មោះ រ័ត្ន តែប៉ុណ្ណោះ ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានបញ្ជាក់ថា៖ដោយផ្អែកលើភស្ដុតាង និងចម្លើយសារភាព ព្រមទាំងផ្អែកលើពាក់បណ្ដឹងរបស់ជនរងគ្រោះ និងសាក្សី ។ជនសង្ស័យត្រូវបានកម្លាំងជំនាញមូលដ្ឋានកងរាជអាវុធហត្ថខេត្តបានកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់ហើយនៅព្រឹកថ្ងៃពុធ ទី២៨ ខែកក្កដា ឆ្នាំ២០២១នេះ ចំពោះបក្សពួកដែលនៅសល់កម្លាំងអាវុធហត្ថបន្តស្រាវជ្រាវ ដើម្បីចាប់យកមកផ្តន្ទាទោសតាមច្បាប់ ដោយមិនទុកឲ្យពួកនេះធ្វើព្យុះធ្វើភ្លៀងនោះបានទៀតឡើយ ៕
ចែករំលែកព័តមាននេះ