រាជធានីភ្នំពេញ៖ កម្លាំងសមត្ថកិច្ចការិយាល័យនគរបាលព្រហ្មទណ្ឌកំរិតស្រាល រាជធានីភ្នំពេញ កាលពីថ្ងៃទី២៤ ខែកក្កដា ឆ្នាំ២០២១ វេលាម៉ោង ១៩ និង៣០នាទី បានឃាត់ខ្លួនជនសង្ស័យ…
រាជធានីភ្នំពេញ៖ កម្លាំងសមត្ថកិច្ចការិយាល័យនគរបាលព្រហ្មទណ្ឌកំរិតស្រាល រាជធានីភ្នំពេញ កាលពីថ្ងៃទី២៤ ខែកក្កដា ឆ្នាំ២០២១ វេលាម៉ោង ១៩ និង៣០នាទី បានឃាត់ខ្លួនជនសង្ស័យ ចំនួន ២នាក់ នៅបុរីរុងរឿង តាមផ្លូវលំ ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ ពាក់ព័ន្ធករណីប្រព្រឹត្តបទល្មើសអំពើលួចមានស្ថានទម្ងន់ទោស ( ឆក់ទូរស័ព្ទដៃមួយគ្រឿង ម៉ាកអាយហ្វូន 11Pro ពណ៌ប្រផេះ ១គ្រឿង)។ ករណីនេះ ត្រូវបានគេលើកឡើងថា យុវជនទាំង ២នាក់នេះ ជំនាញខាងឆក់ ហើយជាប់គុក ក៏ជាប់មិនយូរដែរ។
ជនសង្ស័យម្នាក់ ឈ្មោះ វ៉េង មិនា ហៅ ស្វិត ភេទប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅផ្ទះមិនចាំលេខ ផ្លូវជាតិលេខ៥ សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។ ម្នាក់ឈ្មោះ ឃាង សៀងហៃ ភេទប្រុស អាយុ ១៦ឆ្នាំ មុខរបរមិនពិតប្រាកដ ស្នាក់នៅផ្ទះលេខ៧៤B ផ្លូវជាតិលេខ៥ សង្កាត់គីឡូ ម៉ែត្រលេខ៦ ខណ្ឌឫស្សីកែវ រាជធានីភ្នំពេញ។
សមត្ថកិច្ច បានចាប់យកវត្ថុតាង មាន៖ ម៉ូតូម៉ាកឌ្រីម សេ ១២៥ ពណ៌ខ្មៅ ពាក់ស្លាកលេខ ភ្នំពេញ 1IL-6252 មួយគ្រឿង។
ករណីឃាត់ខ្លួនមុខសញ្ញាចោរឆក់ ២នាក់ខាងលើនេះ ត្រូវបានលោកវរៈសេនីយ៍ឯក ប៊ុន សត្យា នាយការិល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ឲ្យដឹងថា កាលពីវេលាម៉ោង ១០ និង៤០នាទី ថ្ងៃទី១៥ ខែមិថុនា ឆ្នាំ២០២១ មានអំពើឆក់ទូរស័ព្ទដៃ មួយករណី នៅចំណុចមុខហាងកាហ្វេ STARBUCK ផ្លូវលេខ៧១ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ បង្កឡើងដោយជនសង្ស័យ ចំនួន ៤នាក់ ជិះម៉ូតូចំនួន ២គ្រឿង គឺឈ្មោះ វ៉េង មិនា ហៅ ស្វិត ជិះម៉ូតូផ្ទាល់ខ្លួនមួយគ្រឿង ម៉ាកហុងដាសេ១២៥ ពណ៌ខ្មៅ ឆ្នាំផលិត ២០២០ ពាក់ស្លាកលេខ ភ្នំពេញ 1IL-6252 ឌុបឈ្មោះ ឃាង សៀងហៃ។
ចំណែកឈ្មោះ ឈីង ភេទប្រុស អាយុប្រហែល ១៦ឆ្នាំ ជិះម៉ូតូមួយគ្រឿង ម៉ាកស៊ុយហ្ស៊ុយគីនិច ពណ៌លឿង មិនចាំស្លាកលេខ ឌុបមិត្តភក្តិម្នាក់ទៀត មិនស្គាល់ឈ្មោះ ភេទប្រុស អាយុប្រហែល ១៦ឆ្នាំ ចេញធ្វើសកម្មភាព ឆក់ទ្រព្យសម្បត្តិរបស់ប្រជាពលរដ្ឋ នៅតាមផ្លូវសាធារណៈ ក្នុងរាជធានីភ្នំពេញ។
លោក ប៊ុន សត្យា បន្តថា ពេលជនសង្ស័យ នាំគ្នាជិះម៉ូតូ ទៅដល់ចំណុចកើតហេតុខាងលើ ក៏បានឃើញមនុស្សស្រីម្នាក់ កំពុងដើរដៃកាន់ទូរសព្ទនិយាយ ឃើញដូច្នេះ ឈ្មោះ វ៉េង មិនា ហៅ ស្វិត បើកម៉ូតូចូលទៅជិតជនរងគ្រោះ ហើយឈ្មោះ ឃាង សៀងហៃ ក៏បានធ្វើសកម្មភាព ឆក់យកទូរសព្ទដៃ ពីស្រីម្នាក់នោះ បានសម្រេច។ ពេលនោះឈ្មោះ ឈីង ដែលជិះម៉ូតូឌុបមិត្តភក្តិម្នាក់ មិនស្គាល់ឈ្មោះ បានជិះម៉ូតូបិទគូទពីក្រោយ នាំគ្នាគេចខ្លួន ដោយសុវត្ថិភាព។
ក្រោយពីកើតមានអំពើឆក់ទូរសព្ទដៃនោះ ឯកឧត្តមអគ្គស្នងការរងនគរនាលជាតិ ជាស្នងការ នគរបាលរាជធានីភ្នំពេញ និងលោកឧត្តមសេនីយ៍ទោ សុង លី ស្នងការរង ទទួលផ្នព្រហ្មទណ្ឌរាជធានីភ្នំពេញ បានបញ្ជាឲ្យកម្លាំងសមត្ថកិច្ចជំនាញ ចុះស្រាវជ្រាវ និងស៊ើបអង្កេតជាបន្ទាន់ ប៉ុន្តែដោយសារស្ត្រីជនរងគ្រោះ មិនបានទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលបឹងកេងកងទី១ ខណ្ឌទួលគោក ទើបសមត្តកិច្ចជួបផលលំបាកបន្តិច ក្នុងការកំណត់ភិនភាគ និងមុខសញ្ញាក្រុមចោរឆក់។
តែទោះជាយ៉ាងណាក្តី ចោរនៅចោរ មិនអាចគេចផុតពីការតាមប្រម៉ាញ់របស់សមត្ថកិច្ចនោះបានទេ មិនយូរមិនឆាប់គង់តែចូលអន្ទាក់។ ជាក់ស្តែងដូចករណីខាងលើនេះ មិនដល់ ១០ថ្ងៃផង សមត្ថកិច្ចក្របួចបាន ២នាក់ និងកំពុងបន្តស្រាវជ្រាវតាមចាប់បក្ខពួក ២នាក់ទៀត។
ជនសង្ស័យ និងវត្ថុតាង ត្រូវបានសមត្ថកិច្ច កសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់៕ ឃឹម ប៊ុនណាក់
ចែករំលែកព័តមាននេះ