ខេត្តព្រះសីហនុ ៖ សេចក្តីរាយការឲ្យដឹងថា មានករណីជនជាតិចិនម្នាក់ ស្នាក់នៅខេត្តមាត់សមុទ្រ បានផ្ទុះអាវុធចំនួន៣គ្រាប់ បាញ់កម្សាន្តលេង បង្កឲ្យមានការភ្ញាក់ផ្អើលដល់សមត្តកិច្ច ចុះទៅចាប់ដាក់ខ្នោះផងដែរ ។…
ខេត្តព្រះសីហនុ ៖ សេចក្តីរាយការឲ្យដឹងថា មានករណីជនជាតិចិនម្នាក់ ស្នាក់នៅខេត្តមាត់សមុទ្រ បានផ្ទុះអាវុធចំនួន៣គ្រាប់ បាញ់កម្សាន្តលេង បង្កឲ្យមានការភ្ញាក់ផ្អើលដល់សមត្តកិច្ច ចុះទៅចាប់ដាក់ខ្នោះផងដែរ ។
សេចក្តីរាយការបន្តថា កាលពីវេលាម៉ោង១ និង៣០នាទីយប់រំលងអាធ្រាត្រឈានចូលថ្ងៃទី២៦ ខែកក្កដា ឆ្នាំ២០២១ កម្លាំងសមត្ថកិច្ចជំនាញផែនការងារនគរបាលព្រហ្មទណ្ឌ បានទទួលព័ត៌មានតាមទូរស័ព្ទពីប្រជាពលរដ្ឋរាយការណ៍ថា មានបុរសជនជាតិចិន បានផ្ទុះអាវុធជាច្រើនគ្រាប់ នៅបន្ទប់ជួល ក្នុងភូមិ២ សង្កាត់លេខ១ ខេត្ត-ក្រុងព្រះសីហនុ ។
ក្រោយពីទទួលបានព័ត៌មាននេះភ្លាមលោកឧត្តមសេនីយ៍ឯក ជួន ណារិន្ទ ស្នងការនគរបាលខេត្ត បានបញ្ជាកម្លាំងជំនាញឲ្យចុះទៅជាបន្ទាន់ ដើម្បីច្បាមយកជនបង្ក ។ បន្ទាប់ពីកម្លាំងនគរបាលព្រហ្មទណ្ឌបានចុះទៅដល់ និងបានធ្វើការឡោមព័ទ្ធកន្លែងកើតហេតុ ប៉ុន្តែដោយសារជនសង្ស័យមានអាវុធក្នុងដៃ និងកំពុងនៅក្នុងទីសុវត្ថិភាព ដែលធ្វើឲ្យសមត្តកិច្ចពិបាកក្នុងការសម្រុកចូលចាប់ ម្យ៉ាងវិញទៀត នៅក្តាប់មិនទាន់បានច្បាស់អំពីបក្ខពួកជនសង្ស័យថាមានគ្នាប៉ុន្មាននាក់ ? ជាហេតុធ្វើឲ្យសមត្តកិច្ចស្ទាក់ស្ទើរក្នុងការចូលចាប់ទាំងយប់ ដូច្នេះជៀសវាងមានគ្រោះថ្នាក់ សមត្ថកិច្ចបានដាក់កម្លាំងយាមការពារ រហូតដល់ម៉ោង៦និង៣០នាទីព្រឹកថ្ងៃទី២៦ ខែកក្កដា ទើបសុំការអនុញ្ញាតពីស្ថាប័នអយ្យការអមសាលាដំបូងខេត្ត ចូលទៅឃាត់ខ្លួនជនប្រដាប់អាវុធជាជនជាតិចិន បានសម្រេច ។
ជនសង្ស័យឈ្មោះ WANG XUDONG ភេទប្រុស អាយុ៣៨ឆ្នាំ មុខរបរ មិនពិតប្រាកដ (មានលិខិតឆ្លងដែន) ស្នាក់នៅផ្ទះជួលក្រុមទី១០ ភូមិ២ សង្កាត់១ ក្រុង-ខេត្តព្រះសីហនុ ។
ក្នុងនោះសមត្ថកិច្ច បានដកហូតវត្ថុតាងរួមមាន ៖ អាវុធខ្លី ១ដើម ម៉ាក ZORAKI ពណ៌ទឹកប្រាក់ បង់កាំភ្លើង ០១
គ្រាប់កាំភ្លើង ៤៤គ្រាប់ សំបកកាទុស ០៣គ្រាប់ ស្រោមកាំភ្លើង០១ កាំភ្លើងបាញ់ឆក់០១ ខ្នោះដៃ ០១គូរ កូនកាំបិតស្នៀត ០២ ស្បែកជើងកវែង ០២គូរ ទូរស័ព្ទដៃ ០២គ្រឿង និងលិខិតឆ្លងដែន ០២ក្បាល ។
ក្រោយឃាត់ខ្លួន ជនជាតិចិននោះ បានសារភាពនៅចំពោះមុខសមត្ថកិច្ចថា រូបគេស្រវឹងខ្លាំង ហើយចង់សម្ដែងឫទ្ធិ ផ្ទុះអាវុធ៣គ្រាប់ទាំងយប់ ជាការកម្សាន្តលេង ស្រាប់តែព្រឹកឡើងប៉ូលីសចូលមកចាប់ដាក់ខ្នោះតែម្តង ។
បន្ទាប់ពីមានចម្លើយសារភាព និងយោងលើបទល្មើសជាក់ស្តែង សមត្ថកិច្ចបានកសាងសំណុំរឿង បញ្ជូនជនសង្ស័យទៅការសាលាដំបូងខេត្តព្រះសីហនុ ទើបតុលាការចេញដីការឃុំខ្លួនជនជាតិចិននោះ ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ កាន់កាប់អាវុធដោយខុសច្បាប់ ៕
ចែករំលែកព័តមាននេះ