រាជធានីភ្នំពេញ ៖ នៅប៉ុន្មានថ្ងៃនេះ វីដេអូប្រកួតរបស់កីឡាករបង្គោលក្រហម ងួន គា បានធ្វើឲ្យមហាជនក្ដុកក្ដួលយ៉ាងខ្លាំង ដោយសារតែកីឡាកររូបនេះ គ្មានលុយរកអ្នកឲ្យទឹកមិនបាន ហើយសុខចិត្តឲ្យប្រពន្ធមកធ្វើជាអ្នកឲ្យទឹក…
រាជធានីភ្នំពេញ ៖ នៅប៉ុន្មានថ្ងៃនេះ វីដេអូប្រកួតរបស់កីឡាករបង្គោលក្រហម ងួន គា បានធ្វើឲ្យមហាជនក្ដុកក្ដួលយ៉ាងខ្លាំង ដោយសារតែកីឡាកររូបនេះ គ្មានលុយរកអ្នកឲ្យទឹកមិនបាន ហើយសុខចិត្តឲ្យប្រពន្ធមកធ្វើជាអ្នកឲ្យទឹក ហើយចុងក្រោយនៅពេលប្រកួតចាញ់ ក៏ត្រូវភរិយាគ្រាហ៍ចេញពីសង្វៀនប្រដាល់។ លោក ងួន គា ជាកីឡាករមកពីក្លឹបតាឡីដំរីមានប្ញទ្ធិ និងត្រូវបានពិធីករប្រកាសថា ឡើងមកប្រកួតលើកណាក៏ចាញ់ តែទំនងជាដោយសារតែក្រពះទើបលោកនៅតែដឹកដៃប្រពន្ធឡើងប្រកួត។ គួរបញ្ជាក់ផងដែរថា កីឡាករ ងួន គា មានវ័យជាង៣២ឆ្នាំ ជាកីឡាករជើងចាស់ តែគេចាប់អារម្មណ៍ថា លោកបាត់បង់សមត្ថភាពខុសពីមុនឆ្ងាយណាស់។ លោកធ្លាប់ប្រកួតជាង១០០លើក តែចាញ់ភាគច្រើននាពេលចុងក្រោយ។
មានការបញ្ជាក់លោកគឺជាកីឡាករដែលមានជីវភាពខ្សត់ខ្សោយ ដោយតែងសុំឲ្យគ្រូប្រចាំក្លឹបដាក់ឲ្យប្រកួតឲ្យបានច្រើន តែលោកហាក់មិនសូវមានការរីកចម្រើនផ្នែកសមត្ថភាពនោះទេ។ លោក និងភរិយាជួលផ្ទះគេរស់នៅជិតបឹងជើងឯក នៅម្ដុំខណ្ឌដង្កោ ហើយស្ថានភាពរស់នៅកាន់តែពិបាក ដោយក្រៅពីការប្រដាល់គឺលោកមិនមានចំណូលអ្វីទាំងអស់។ ការប្រកួតរបស់លោកកន្លងមក ក៏មានសិស្សប្អូន សិស្សច្បងមកឲ្យទឹកផងដែរ ប៉ុន្តែនៅថ្ងៃទី១៦ ខែកក្កដា កន្លងទៅនេះបែរជាលេចវត្តមានប្រពន្ធរបស់លោកជាអ្នកឲ្យទឹកវិញ ដោយកីឡាករផ្សេងទៀតបញ្ជាក់ថា ដើម្បីសន្សំលុយត្រូវចែកអ្នកឲ្យទឹកដើម្បីជីវភាព។
លោកត្រូវបានគេអះអាងថា មិនសូវបានហ្វឹកហាត់ ដោយសារតែភាពជាក់ស្ដែងលោកក៏មានសុខភាពមិនសូវអំណោយផល និងដោយសារតែហ្វឹកហាត់ក្នុងរយៈពេលនេះ គឺអាចឲ្យលោកប្រឈមនឹងជំងឺកូវីត-១៩ ទើបលោកមិនសូវបានហ្វឹកហាត់ជាប់លាប់។ កីឡាករដែលដឹងពីសុខទុក្ខលោកផ្សេងទៀតក៏បានបញ្ជាក់ដែរថា ហេតុផលដែល ងួន គា យកប្រពន្ធមកឲ្យទឹក គឺក្រៅពីសន្សំលុយបានសល់មួយផ្នែក ក៏បណ្ដាលមកពីពេលបច្ចុប្បន្នពិបាករកអ្នកក្រៅមកឲ្យទឹកផងដែរ ខណៈដែលបើរកគេបានក៏ត្រូវផ្ដល់កម្រៃឲ្យគេសមរម្យ ដែលធ្វើឲ្យកីឡាករ ងួន គា ត្រូវយកភរិយារបស់ខ្លួនជាអ្នកឲ្យទឹកជំនួសវិញ។
ប្រភពពីគណៈកម្មការបញ្ជាក់ថា ការប្រដាល់មិនបានហាមប្រាមថា មិនឲ្យស្រីៗមកឲ្យទឹកលើសង្វៀននោះទេ ប៉ុន្តែជាគោលការណ៍គេកម្រឲ្យមនុស្សស្រីឡើងសង្វៀនណាស់លើកលែងតែជាកីឡាការិនី ឬជាគណៈកម្មការ ប៉ុន្តែមកពីភរិយាមកក្នុងនាមជាអ្នកឲ្យទឹកទើបគ្មានការហាមប្រាម។ ការប្រកួតនៅក្នុងថ្ងៃនោះ ងួន គា ត្រូវបានបង្គោលខៀវ ជាសិស្សប្អូន វាយឲ្យបាក់មុខនៅលើសង្វៀនតាំងពីចុងទឹកទី១។
លោកត្រូវសិស្សប្អូន ជ័យ គឹមហុង វាយឲ្យបោះបង់ការប្រកួតក្នុងទឹកទី៣ ដោយសារតែខូចជើងមិនអាចបន្តការប្រកួត។ លោកត្រូវភរិយាគ្រាហ៍ចេញពីសង្វៀនគួរឲ្យសង្វេគ ដែលវីដេអូមួយនេះ ក្រោយការបង្ហោះក៏មានអ្នកសង្វេគចំពោះប្ដីប្រពន្ធមួយគូនេះផងដែរ។ អ្នកខ្លះលើកឡើងថា ហេតុតែក្រពះទើបភរិយាម្នាក់សុខចិត្តដឹកដៃប្ដីមកឲ្យគេវាយ ហើយសុខចិត្តគ្រាហ៍ប្ដីពេលត្រូវរបួស ត្រឡប់ទៅផ្ទះ ដោយស្ថានភាពបែបនេះ គឺមានស្ត្រីតិចណាស់ ដែលអាចទទួលយកបាន។ អ្នកខ្លះថែមទាំងនិយាយថា កម្សត់ណាស់ពេលឃើញវីដេអូប្រដាល់របស់លោក ប៉ុន្តែអ្នកខ្លះក៏យល់ថា នេះគឺជាអាជីពរបស់អ្នកប្រដាល់ និងគ្រួសារអ្នកប្រដាល់ផងដែរ៕ ដោយ ៖ ផាត់ តារារដ្ឋ
ចែករំលែកព័តមាននេះ