ភ្នំពេញ៖ ករណីគ្រោះថ្នាក់ចរាចរណ៍មួយ បានកើតឡើង ដោយរថយន្តម៉ាកហាយឡែនឌ័រមួយគ្រឿង ដែលបើកបរដោយនារីម្នាក់ បើកបរលើផ្លូវឯកទិស ទៅបុករថយន្តម៉ាក Mazda មួយគ្រឿង ដែលម្ចាស់ចតទុកចោល លើផ្លូវមុខហាងកាត់ដេរយីហោ «មុដេត ម៉ូដ» បណ្តាលអោយកំពិតខូចឡានទាំង ២គ្រឿង។
ពាក់ព័ន្ធទៅនឹងករណីនេះ លោកស័ក្តិ៣ ជានគរបាលចរាចរណ៍នៃស្នងការនគរបាលរាជធានីភ្នំពេញម្នាក់ និយាយថា ប៉ូលិសមិនអាចកាត់ក្តីបានទេ។ ទាល់តែតុលាការ។ ប៉ូលិសបានត្រឹមតែវាស់វែង និងសម្របសម្រួលតែប៉ុណ្ណោះ»។
ករណីគ្រោះថ្នាក់ចរាចរណ៍នេះ បានកើតឡើង កាលពីវេលាម៉ោង ១០ និង ៤៥នាទីព្រឹក ថ្ងៃទី២៦ ខែកក្កដា ឆ្នាំ២០២១ នៅចំណុចមុខហាងកាត់ដេរ យីហោ «មុឌេត ម៉ូដ» ផ្ទះលេខ ១០៣Eo ផ្លូវលេខ ១៣៦ ក្នុងសង្កាត់ផ្សារកណ្តាល២ ខណ្ឌដូនពេញ។
នគរបាលចរាចរណ៍ខណ្ឌដូនពេញម្នាក់ បានប្រាប់ឱ្យដឹងថា មិនពេលកើតហេតុ ម្ចាស់ហាងកាត់ដេយីហោ មុតឌេត ម៉ូដ បានយករថយន្តម៉ាក Mazda ព៌ណស ពាក់ស្លាកលេខ ភ្នំពេញ 2BG-9720 របស់គាត់ មកចតទុកចោលខាងមុខហាង តាមបណ្តោយផ្លូវលេខ ១៣៦ ដោយមុខទៅទិសខាងកើត។ ក្រោយមក ក៏មានរថយន្តម៉ាកហាយឡែនឌ័រ ព៌ណទឹកមាស ពាក់ស្លាកលេខ ភ្នំពេញ 2R-0135 មួយគ្រឿង ដែលបើកបរដោយស្ត្រីម្នាក់ ក្នុងទិសដៅពីលិច ទៅកើត គេចពីម៉ូតូមួយគ្រឿង ទៅបុករថយន្តម៉ាក Mazda មួយគ្រឿង ដែលម្ចាស់ចតទុកចោលលើផ្លូវខាងមុខហាង កំពិត និងរងការខូចខាតទាំង ២គ្រឿង។
ប្រភពដដែល បានបន្តទៀតថា ក្រោយពីមានគ្រោះថ្នាក់ចរាចរណ៍នេះ កើតឡើង កម្លាំងនគរបាលចរាចរណ៍ខណ្ឌដូនពេញ ក៏បានចុះមកដល់កន្លែងកើតហេតុ ដើម្បីដោះស្រាយគ្នា ដោយភាគីរថយន្តម៉ាក ហាយឡែនឌ័រ សុំត្រឹមយកទៅជួយជុល ដោយខ្លួនឯង។ តែភាគីខាងម្ចាស់រថយន្តម៉ាក Mazda មិនព្រម និងទាមទារសំណងថ្លៃរងការខូចខាត និងនិយាយចរចារគ្នា ជាង ១ម៉ោង មិនត្រូវគ្នា ក៏រាយការណ៍បន្តទៅកាន់នគរបាលចរាចរណ៍នៃស្នងការរាជធានីភ្នំពេញ ដើម្បីចុះមកធ្វើការវាស់វែង និងដោះស្រាយបន្តទៀត។
ក្នុងពេលនោះ ក៏មានវត្តមានរបស់កម្លាំងការិយាល័យនគរបាលចរាចរណ៍ផ្លូវគោកនៃស្នងការរាជធានីភ្នំពេញ ចំនួន ៣រូប បានមកដល់ វាស់វែងកន្លែងកើតហេតុ។ ដោយលោកស័ក្តិ៣ ម្នាក់ បានឆ្លើយតប មកកាន់អ្នកកាសែតថា «ប៉ូលិសមិនអាចអារកាត់បានទេ។ ទាល់តែតុលាការ។ ប៉ូលិសបានត្រឹមតែសម្របសម្រួល វាស់វែង យករថយន្ត ទៅរក្សាទុកប៉ុណ្ណោះ»។
លោកប៉ូលិស មិនបានបញ្ជាក់ថា ភាគីរថយន្តមួយណា ជាអ្នកខុស ឬមួយណាត្រូវឡើយ។
ក្រោយពេលកើតហេតុ ពេលដែលកម្លាំងមានសមត្ថកិច្ចមូលដ្ឋានខណ្ឌដូនពេញ អោយភាគីទាំង ២ ដោះស្រាយគ្នា អស់រយៈពេលជាង ១ម៉ោង និយាយចរចាមិនត្រូវរ៉ូវគ្នា ទើបប្រគល់អោយខាងកម្លាំងការិយាល័យនគរបាលចរាចរណ៍ផ្លូវគោករាជធានីភ្នំពេញ វាស់វែង និងបញ្ជូនរថយន្តម៉ាកហាយឡែនឌ័រ និងរថយន្តម៉ាក Mazda របស់ម្ចាស់ហាងកាត់ដេរ មុឌែន ម៉ូដ យកទៅរក្សាទុក នៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំ ដោះស្រាយគ្នាបន្តទៀត៕ ភី ផល
ចែករំលែកព័តមាននេះ