រាជធានីភ្នំពេញ ៖ តារាសម្តែងវ័យក្មេងនាង ពេជ្រ សុវណ្ណវិជ្ជរ៉ា បានត្រៀមនៅក្នុងការចូលរួមប្រកួតកម្មវិធីដ៏ធំ Miss Universe Cambodia បន្ទាប់នាងបានបាត់មុខពីសិល្បៈអស់មួយរយៈ។ បើយោងតាមការប្រកាសរបស់ផេក Universe Pageant បានអោយដឹងថា តើអ្នកទាំងអស់គ្នាមាននៅចាំទេ? អតីតតារាសម្ដែងស្រីដែលអ្នកទាំងអស់គ្នាធ្លាប់ឃើញគាត់សម្ដែងនៅក្នុងបទ «ស្រីក្បត់ចិត្តហា៑» របស់បងប្រុស Keo Veasna ពេលនេះកញ្ញាបានត្រឡប់មកសាជាថ្មីម្ដងទៀតហើយ ដើម្បីចូលរួមប្រកួតនៅក្នុងកម្មវិធីបវរកញ្ញា Miss Universe Cambodia 2021។
គួរបញ្ជាក់ផងដែរថា កញ្ញាក៏ធ្លាប់ជាអតីតបវរកញ្ញាឯកទេសចរណ៍ឆ្នាំ២០០៨ ផងដែរ ពេជ្រ សុវណ្ណវិជ្ជរ៉ា អាយុ២៤ឆ្នាំ កម្ពស់1.68m។ កញ្ញាអាចប្រើប្រាស់ភាសាអង់គ្លេសបានយ៉ាងល្អ ដែលកញ្ញាជានិស្សិតឆ្នាំទី២ នៅសាលា national university of management ផ្នែក business ទៀតផង។
ជាការកត់សម្គាល់ ការវិលត្រឡប់មកការប្រកួតកម្មវិធីសម្រស់ដ៏ធំប្រចាំឆ្នាំនាពេលនេះរបស់ ពេជ្រ សុវណ្ណវិជ្ជរ៉ា ត្រូវបានគេរំពឹងថា នាងនៅតែអាចទទួលការគាំទ្រច្រើនពីមហាជន ដូចទៅនឹងកម្មវិធីប្រកួតដែលនាងធ្លាប់ទទួលបានជោគជ័យនាពេលកន្លងមក។ ហើយពេជ្រ សុវណ្ណវិជ្ជរ៉ា នឹងធ្វើការប្រកួតប្រជែងលើកផ្នែកសម្រស់ និងចំណេះដឹងទូទៅជាមួយបេក្ខនារី១០រូប ដែលសុទ្ធសឹងតែមានរូបសម្រស់ស្រស់ស្អាតដូចគ្នា។
ពេជ្រ សុវណ្ណវិជ្ជរ៉ា បានលើកឡើងថា ការសម្រេចចិត្តចូលរួមប្រកួតប្រជែងកម្មវិធីខាងលើនេះ គឺដោយសារនាងទទួលបានការគាំទ្រពីក្រុមគ្រួសារ និងប្រិយមិត្តគាំទ្ររបស់នាង។ នាងបញ្ជាក់ថា កន្លងមកនាងបានបាត់មុខពីសិល្បៈមួយរយៈ គឺដោយសារនាងជាប់ដៃនឹងការសិក្សា តែពេលនេះនាងមានវេលាគ្រប់គ្រាន់ និងបានត្រៀមខ្លួនរួចជាស្រេចសម្រាប់ការប្រកួតខាងលើនេះ។
យ៉ាងណា បើតាម ពេជ្រ សុវណ្ណវិជ្ជរ៉ា ថា ប្រសិនបើនាងមានឱកាសទទួលបានជ័យជំនះនៅក្នុងការប្រកួត ហើយតំណាងកម្ពុជាទៅចូលរួមនៅលើឆាកអន្តរជាតិនោះ នាងនឹងបង្ហាញវប្បធម៌ និងអរិយធម៌របស់កម្ពុជាអោយពិភពលោកស្គាល់កាន់តែច្បាស់។ នាងថា នាងនឹងប្រឹងប្រែងអោយអស់លទ្ធភាពសម្រាប់ការប្រកួតនេះ ប្រសិនបើទស្សនិកជននៅតែបន្តគាំទ្រដល់រូបនាង៕
ចែករំលែកព័តមាននេះ