មកដឹងកាលបរិច្ឆេទប្រកួតរបស់កីឡាករកម្ពុជា នៅ Olympic Games
ជប៉ុន ៖ នៅប៉ុន្មានថ្ងៃនេះ ក្រុមអត្តពលិកកម្ពុជាកំពុងបំពេញបេសកកម្មនៅក្នុងប្រទេសជប៉ុន នៅក្នុងការប្រកួតកីឡាអូឡាំពិក
ជប៉ុន ៖ នៅប៉ុន្មានថ្ងៃនេះ ក្រុមអត្តពលិកកម្ពុជាកំពុងបំពេញបេសកកម្មនៅក្នុងប្រទេសជប៉ុន នៅក្នុងការប្រកួតកីឡាអូឡាំពិក ដែលមានជាង១០០ប្រទេសចូលរួម ។ កីឡាហែលទឹកជម្រើសជាតិកម្ពុជា បានដឹងកាលបរិច្ឆេទប្រកួតរបស់ខ្លួន នៅក្នុងព្រឹត្តិការណ៍កី ឡាអូឡាំពិកទីក្រុងតូក្យូឆ្នាំ២០២០ (Tokyo Olympic Games 2020) នៅប្រទេសជប៉ុននេះរួចហើយ ខណៈកីឡាអត្តពលកម្មត្រូវប្រ កួតនៅថ្ងៃទី៣១ ខែកក្កដា តែមិនទាន់ដឹងម៉ោងប្រកួតនោះទេ ។
លោក ញ៉ាន សុខវិសាល នាយរងបេសកកម្ម បានឲ្យដឹងថា កីឡាហែលទឹកកម្ពុជា ដោយមានការផ្លាស់ប្ដូរមួយចំនួននឹងត្រូវប្រកួតនាថ្ងៃទី៣១ ខែកក្កដា វិញ នាវេលាម៉ោង៥ល្ងាច (ម៉ោងនៅកម្ពុជា) នៅមជ្ឈមណ្ឌលកីឡាហែលទឹក Tokyo Aquatics Centre ។
ចំពោះអត្តពលិកកីឡាហែលទឹកកម្ពុជាមាន២រូប គឺកីឡាករ ហែម ប៊ុច និងកីឡាការិនី ឃឿន ប៊ុនពេជ្រមរកត ដែលត្រូវប្រកួតវិញ្ញាសាហែល៥០ម៉ែត្រ សេរីដូចគ្នា ។ សម្រាប់កីឡាករ ហែម ប៊ុច ត្រូវប្រកួតសេរីទី៤(Heat-4) និងខ្សែបន្ទាប់ទី៦ (Lane-6) ។ រីឯកីឡាការិនី ឃឿន ប៊ុនពេជ្រមរកត ត្រូវប្រកួតសេរីទី៣ (Heat-3) និងខ្សែបន្ទាប់ទី៥ (Lane-5) ។
នាយរងបេសកកម្មខាងលើបញ្ជាក់ថា ក្រោយបញ្ចប់ការប្រកួតនេះ គណៈកម្មការ នឹងធ្វើការជ្រើសរើសកីឡាករ-កីឡាការិនីដែលអាចប្រើថេរវេលា តិចជាងគេចំនួន១៨នាក់អោយឡើងទៅវគ្គពាក់កណ្ដាលផ្ដាច់ព្រ័ត្រ ដើម្បីបន្ដការប្រកួតដណ្ដើមកៅអីវគ្គផ្ដាច់ព្រ័ត្រ និងប្រជែងយកមេដាយ ។ ប៉ុន្ដែកីឡាករ-កីឡាការិនីកម្ពុជាលោកថា មិនសូវរំពឹងក្នុងការឈានទៅដណ្ដើមមេដាយនោះទេ ព្រោះនេះជាការប្រកួតកម្រិតខ្ពស់ តែអ្វីដែលជាក្ដីរំពឹងរបស់អត្តពលិកកម្ពុជា គឺប្រឹងធ្វើអោយបានល្អក្នុងការប្រកួតសេរី និងត្រូវបំបែកលទ្ធផលចាស់ដែលធ្លាប់ធ្វើបាន ។
ដោយឡែកកីឡាកអត្តពលកម្មកម្ពុជា គឺកីឡាករ ប៉ែន សុគង់ ក៏កំពុងខិតខំប្រឹងប្រែងហ្វឹកហាត់ដូចគ្នា ដើម្បីត្រៀមការប្រកួតរបស់ខ្លួន នាថ្ងៃទី៣១ ខែកក្កដា ឆ្នាំ២០២១ ខាងមុខ ដោយកីឡាករ ប៉ែន សុគង់ ត្រូវប្រកួតលើវិញ្ញាសារត់ល្បឿនចម្ងាយ១០០ម៉ែត្រ ។ ចំពោះម៉ោងប្រកួតវិញ គណៈកម្មការរៀបចំការប្រកួតមិនទាន់បញ្ជាក់ច្បាស់ឡើយ។ នេះបើតាមការបញ្ជាក់របស់លោក ញ៉ាន សុខវិសាល ។
គួរបញ្ជាក់ថា បេសកកម្មចូលរួមប្រកួតព្រឹត្តិការណ៍ Tokyo Olympic Games 2020 នៅប្រទេសជប៉ុន ដឹកនាំដោយលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា(NOCC) និងជានាយបេសកកម្ម ហើយកម្ពុជាបានទទួលសិទ្ធអនុគ្រោះបញ្ជូនអត្តពលិក ២ប្រភេទកីឡាចូលរួមប្រកួត គឺកីឡាករ-កីឡាការិនីហែលទឹក២រូប និងកីឡាករអត្តពលកម្មម្នាក់ ដែលនឹងត្រូវធ្វើការប្រកួតនាចុងសប្ដាហ៍ក្រោយ ៕
ចែករំលែកព័តមាននេះ