ប្រទេសអាហ្វហ្គានីស្ថាន ៖ អាជ្ញាធរអាហ្វហ្គានីស្ថានដែលប្រឈមមុខ ចាប់តាំងពី២ខែមកហើយ នូវការវាយលុកដ៏ធំរបស់ពួកតាលីបង់ដែលខ្លួនពិបាកទប់ទល់ កាលពីថ្ងៃទី២៤កក្កដា បានចេញបម្រាមគោចរពេលយប់ ក្នុងផ្នែកដ៏ធំំរបស់ប្រទេស លើកលែងតែក្នុងខេត្ត៣ ក្នុងនោះមានខេត្តកាប៊ុល។
ក្រសួងមហាផ្ទៃអាហ្វហ្គានីស្ថាន ក្នុងសេចក្ដីប្រកាសមួយគូសបញ្ជាក់ថា ដើម្បីទប់អំពើហិង្សានិងកម្រិតការធ្វើចលនារបស់ពួកតាលីបង់ បម្រាមគោចរត្រូវដាក់ក្នុងខេត្ត៣១ របស់ប្រទេស ដែលមានខេត្តទាំងអស់៣៤ ។ក្រសួងនោះបញ្ជាក់ថា មានតែខេត្តកាប៊ុល ខេត្តប៉ានសៀរនិងខេត្តណានហ្គាហារទេ ដែលមិនជាប់ទាក់ទិននឹងបម្រាមគោចរនោះ។
អ្នកនាំពាក្យរងរបស់ក្រសួងមហាផ្ទៃលោកAHMAD ZIA ZIA ក្នុងសារមួយជូនចំពោះបណ្ដាអ្នកកាសែតបញ្ជាក់ថា បម្រាមគោចរត្រូវមានចាប់ពីម៉ោង២២ដល់ម៉ោង៤ទៀបភ្លឺ។
ពួកបះបោរតាលីបង់ ចាប់ពីដើមខែឧសភាមក បានធ្វើការវាយលុកគ្រប់បែបយ៉ាង ប្រឆាំងកងទ័ពអាហ្វហ្គានីស្ថាន ខណៈកងកម្លាំងបរទេសទាំងអស់ពិសេសកងទ័ពអាមេរិក ត្រូវដកចេញជាស្ថាពរ ពីប្រទេសនោះបន្ទាប់ពីការធ្វើសង្គ្រាមជាមួយពួកតាលីបង់អស់ពេល២០ឆ្នាំ តែមិនអាចយកឈ្នះបាន។ ការដកទ័ពបរទេសនោះពេលនេះជិតចប់សព្វគ្រប់ហើយ។
ប្រឈមមុខនឹងការវាយលុករបស់ពួកតាលីបង់ ដែលបង្កើនខ្លាំងពេលកងទាហានបរទេសដកចេញ ប្រធានាធិបតីអាមេរិក លោកចូបៃដិន បានអះអាងជាថ្មីកាលពីថ្ងៃទី ២៣ កក្កដា ពីការជួយទ្រទ្រង់ខាងការទូតនិងមនុស្សធម៌របស់អាមេរិក ដល់អាហ្វហ្គានីស្ថាន។
ក្នុងកិច្ចសន្ទនាគ្នាមួយតាមទូរស័ព្ទ លោកបៃដិន និងសមភាគីអាហ្វហ្គានីស្ថាន លោកអាស្ត្រាវហ្គានី បានព្រមព្រៀងគ្នាថា ការវាយលុករបស់ពួកតាលីបង់ជាការប្រព្រឹត្តផ្ទុយទៅនឹងសេចក្ដីថ្លែងការណ៍នានា របស់ពួកឧទ្ទាមនោះដែលសន្យាគាំទ្រដល់ដំណើរការចរចាដោះស្រាយជម្លោះ។ លោកបៃដិនប្រកាសពីការបញ្ចប់ផ្លូវការ បេសកកម្មយោធាអាមេរិកនៅអាហ្វហ្គានីស្ថានត្រឹមថ្ងៃទី៣១សីហា៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ