ចាប់អ្នកទិញ-លក់ឡានប្រើសែកស្អុយទៅតុលាការ លុះសួរ៣ថ្ងៃចប់ឱ្យវិលទៅផ្ទះវិញ
- ភ្នំពេញ
រាជធានីភ្នំពេញ ៖ កម្លាំងកងអាវុធហត្ថរាជធានីភ្នំពេញ កាលរសៀលថ្ងៃទី២៣ ខែកក្កដា ឆ្នាំ២០២១ បានចាប់បញ្ជូនអ្នករកស៊ីទិញ-
រាជធានីភ្នំពេញ ៖ កម្លាំងកងអាវុធហត្ថរាជធានីភ្នំពេញ កាលរសៀលថ្ងៃទី២៣ ខែកក្កដា ឆ្នាំ២០២១ បានចាប់បញ្ជូនអ្នករកស៊ីទិញ-លក់រថយន្តម្នាក់ទៅកាន់សាលាដំបូងរាជធានីភ្នំពេញ ពាក់ព័ន្ធបទ.មិនបំពេញកាតព្វកិច្ចចំពោះឧបករណ៍អាចជួញដូរបាន ពោលគឺចេញមូលប្បទានប័តអត់សាច់ប្រាក់(សែកស្អុយ) ប្រមាណ១៥ម៉ឺនដុល្លារអាមេរិក ឲ្យទៅអតិថិជនជាដៃគូក្នុងការប្រកបមុខរបររកស៊ីដូចគ្នា ។
ជនសង្ស័យឈ្មោះ ហុក ហេង អាយុ៣៩ឆ្នាំ មានលំនៅស្ថានលេខ១០៣ បុរីប៉េងហួតបឹងស្នោ សង្កាត់និរោធ ខណ្ឌច្បារអំពៅ រាជធានីភ្នំពេញ ។
សំណុំរឿងបានស្ថិតនៅលោក ហេង ផេង ព្រះរាជអាជ្ញារងនៃអយ្យការបើកការស៊ើបសួរ ក្រោយពីសាកសួរហើយ នៅថ្ងៃទី២៤ ខែកក្កដា តំណាងអយ្យការបានសម្រេចធ្វើការចោទប្រកាន់ជាផ្លូវការ រួចបានចាត់បញ្ជូនទៅចៅក្រមស៊ើបសួរដែលប្រចាំការគឺលោក ហម ម៉េងសែ អនុប្រធានសាលាដំបូង ។
តាមប្រភពព័ត៌មានឲ្យដឹងថា ការឃាត់ខ្លួនជនសង្ស័យខាងលើនេះ គឺសមត្តកិច្ចបានអនុវត្តតាមដីកាបញ្ជាឲ្យចូលខ្លួនរបស់ស្ថាប័នអយ្យការអមសាលាដំបូងរាជធានីភ្នំពេញ បន្ទាប់ពីជនសង្ស័យបានគេចវេសមិនចូលខ្លួន តាមការកោះហៅរបស់សមត្តកិច្ច ។ ដើមចមបណ្តាលឲ្យមានការចាប់បញ្ជូនជនសង្ស័យខាងលើនេះ គឺឈ្មោះ ហុក ហេង បានបំភ្លឺថា ខ្លួនបានស្គាល់ និងរាប់អានគ្នាជាមួយឈ្មោះ ឃី ស្រ៊ុន មានរយៈពេល៣ឆ្នាំហើយ នៅពេលស្គាល់គ្នាជាមួយឈ្មោះ ឃី ស្រ៊ុន ខ្លួនបានទំនាក់ទំនងយករថយន្តចំនួន៣គ្រឿង ដែលមានតម្លៃសរុបប្រមាណ៥៥ ០០០ដុល្លារអាមេរិក ដើម្បីយកទៅលក់បានប្រាក់ចំណេញក្នុងមុខរបរ ។ ប៉ុន្តែនៅពេលយករថយន្តទៅលក់ហើយ ខ្លួនមិនទាន់បានបង្វិលប្រាក់នោះឲ្យទៅឈ្មោះ ឃី ស្រ៊ុន វិញទេ គឺទុករកស៊ីបន្ត និងបានដាក់ឲ្យអ្នកដ៏ទៃដើម្បីយកការប្រាក់ ។
ក្រោយមកខ្លួនក៏បានខ្ចីប្រាក់បន្ថែមពីឈ្មោះ ឃី ស្រ៊ុន ចំនួន១០ម៉ឺនដុល្លារអាមេរិកទៀត ដើម្បីពង្រីកមុខរបរក្នុងនោះខ្លួនក៏បានចេញសែកមួយសន្លឹកចុះថ្ងៃទី១មេសា ឆ្នាំ២០២១ ដែលមានទឹកប្រាក់ចំនួន១៥៥ ០០០ដុល្លារអាមេរិក ឲ្យទៅឈ្មោះ ឃី ស្រ៊ុន ប៉ុន្តែសែកនោះគ្មានលុយទេ ដោយសារនៅក្នុងតំណាក់កាលកូវីដ.១៩ឆ្លងរាលដាល ខ្លួនរកស៊ីខាតចុងខាតដើម ទើបខកខានមិនបានចូលខ្លួនទៅដោះស្រាយ តាមការកោះហៅរបស់សមត្ថកិច្ច ជាហេតុធ្វើឲ្យសមត្តកិច្ចកងរាជអាវុធហត្ថចាប់ខ្លួន និងបញ្ជូនទៅសាលាដំបូងរាជធានីភ្នំពេញ ។ តែទោះជាយ៉ាងណាក្តី នៅព្រឹកថ្ងៃទី២៥ ខែកក្កដា ជនសង្ស័យឈ្មោះ ហុក ហេង ត្រូវបានចៅក្រមស៊ើបសួរ អនុញ្ញាតឲ្យវិលត្រឡប់ទៅផ្ទះជួបជុំប្រពន្ធកូនជាធម្មតាវិញ ៕
ចែករំលែកព័តមាននេះ