ស្តែងនឹងភ្នែក! ណាត់ជួបអ្នកឆ្លងដែន និងសារឆ្លើយឆ្លងនឹងអ្នកនៅទឹកដីថៃ
- បន្ទាយមានជ័យ
ជនសង្ស័យជាមេខ្យល់ចំនួន២នាក់ត្រូវបានកម្លាំងជួរមុខ រួមមាននគរបាលការពារព្រំដែន និងយោធា ធ្វើការឃាត់ខ្លួនបាន ជិតបន្ទាត់ព្រំដែន
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា ជនសង្ស័យជាមេខ្យល់ចំនួន២នាក់ត្រូវបានកម្លាំងជួរមុខ រួមមាននគរបាលការពារព្រំដែន និងយោធា ធ្វើការឃាត់ខ្លួនបាន កាលពីវេលាទៀបភ្លឺនាព្រឹកថ្ងៃទី២៤ ខែកក្កដា ឆ្នាំ២០២១ ជិតបន្ទាត់ព្រំដែន ស្ថិតក្នុងភូមិក្បាលស្ពាន១ សង្កាត់និងក្រុងប៉ោយប៉ែត ខណៈពួកគេណាត់ចាំទទួលមនុស្សឆ្លងដែនពីទឹកដីថៃ។
សេចក្តីរាយការណ៍បន្តថា ជនសង្ស័យទាំង២នាក់ខាងលើនេះ ១-ឈ្មោះ ឡូញ ឡែម ភេទប្រុស អាយុ២៩ឆ្នាំ រស់នៅភូមិចាន់គិរី សង្កាត់ប៉ោយប៉ែត និង២-ឈ្មោះ សាន សំណាង ភេទប្រុស អាយុ៣៥ឆ្នាំ រស់នៅភូមិ និងសង្កាត់ប៉ោយប៉ែត។
បើតាមការឲ្យដឹងពីលោកវរសេនីយ៍ត្រី រស់ ពិសិដ្ឋ នាយប៉ុស្តិ៍បឹងសាគូ នៃនគរបាលការពារព្រំដែនគោកលេខ៩១១ បានប្រាប់ឱ្យដឹងថា ជនសង្ស័យទាំង២នាក់ខាងលើនេះ បានទៅកាន់ចំណុចកើតហេតុវេលាទៀបភ្លឺគួរឲ្យសង្ស័យ ម្យ៉ាងទៀតជនសង្ស័យទាំង២នាក់នេះគឺជាមុខសញ្ញាចាស់ផង ទើបកម្លាំងជួរមុខ ឃាត់ខ្លួនដើម្បីសួរនាំតែម្តង។
លោកនាយប៉ុស្តិ៍បន្តថា អ្វីដែលជាភស្តុតាងជាក់ស្តែងនោះ គឺពេលឃាត់ខ្លួនត្រួតពិនិត្យរកឃើញទូរស័ព្ទ១គ្រឿង មានសារជាសម្លេងឆ្លើយឆ្លងគ្នាជាមួយអ្នកនៅទឹកដីថៃ ហើយជនសង្ស័យនេះក៏បានសារភាពថា ពួកគេចាំទទួលនៅខាងក្រោយផ្សាររុងក្លឿ ទើបសមត្ថកិច្ចធ្វើការឃាត់ខ្លួនតែម្តង។
លោកនាយប៉ុស្តិ៍បន្តទៀតថា ដើម្បីទប់ស្កាត់រាល់បទល្មើសឆ្លងដែន ជាពិសេសការរីករាលដាលនៃមេរោគកូវីដ១៩ តាមបទបញ្ជាដ៏ម៉ឺងម៉ាត់ពីលោកឧត្តមសេនីយ៍ទោ ស្នងការនគរបាលខេត្ត ក៏ដូចជាលោកមេបញ្ជាការវរៈកម្លាំងប៉ុស្តិ៍បឹងសាគូ បានសហការគ្នាជាមួយកម្លាំងយោធាកងពល៥១ ធ្វើការយាមកាមនិងល្បាតជាប្រចាំចំណុចភូមិសាស្ត្រទទួលខុសត្រូវ។
ក្រោយកើតហេតុ ទាំងជនសង្ស័យ និងម៉ូតូ១គ្រឿងម៉ាកសង់សេ១២៥ ពណ៌ខ្មៅ ស៊េរីឆ្នាំ២០១៩ គ្មានស្លាកលេខ ដែលពួកគេជិះទៅកន្លែងកើតហេតុនោះ ត្រូវបានបញ្ជូនបន្តទៅទីបញ្ជាការវរៈនគរបាលការពារព្រំដែនគោកលេខ៩១១ ដើម្បីចាត់ការបន្ត៕
ចែករំលែកព័តមាននេះ