ខេត្តព្រះសីហនុ ៖ ឯកឧត្តមឧបកនាយករដ្ឋមន្ត្រី ជា សុផារ៉ា បានអះអាងថា បងប្អូនប្រជាពលរដ្ឋណាដែលសាងសង់លំនៅដ្ឋានលើដីរដ្ឋ ហើយស្ថិតក្នុងគម្រោងអភិវឌ្ឍន៍របស់ខេត្ត ត្រូវចាត់ទុកជាសម្បត្តិរដ្ឋ ពុំមានសំណងក្នុងការដោះដូរឡើយ ។ នេះបើយោងតាមប្រសាសន៍របស់ឯកឧត្តម នៅព្រឹកថ្ងៃទី២៣ កក្កដា ក្នុងឱកាសចុះពិនិត្យសមិទ្ឋផលនានាកំពុងស្ថាបនាក្នុងខេត្ត និងទីតាំងគម្រោងស្ថាបនាផ្លូវថ្មីមួយខ្សែរទៀត និងអាងប្រព្រឹត្តកម្មទី៣របស់ខេត្តព្រះសីហនុ។
ថ្លែងក្នុងដំណើរចុះពិនិត្យសមិទ្ឋផលនានា និងគម្រោងស្ថាបនាផ្លូវថ្មីមួយខ្សែរទៀត និងអាងប្រព្រិត្តកម្មទី៣ របស់ខេត្តព្រះសីហនុ នាព្រឹកថ្ងៃទី២៣ កក្កដា ឯកឧត្តម ឧបកនាយករដ្ឋមន្ត្រី ជា សុផារ៉ា បានជំរុញអោយរដ្ឋបាលខេត្តខិតខំបន្តទៀតក្នុងការអភិវឌ្ឍន៏នូវហេដ្ឋារចនាសម្ព័ន្ឋនានា ដោយផ្តោតទៅលើគុណភាពជាចម្បង ដើម្បីសាកសម្យជាទីក្រុងពហុបំណងដ៏ទំនើប ព្រោះខេត្តព្រះសីហនុជាខេត្តមួយនៃភាគនារតីនៃប្រទេសកម្ពុជា ដែលរាជរដ្ឋាភិបាលកម្ពុជា ចាត់ទុកជាប៉ូលសេដ្ឋកិច្ចមួយ ក្នុងចំណោមប៉ូលសេដ្ឋកិច្ចទាំង៣ ជាមួយគ្នានេះ រាជរដ្ឋាភិបាលក៏បានកំណត់ខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណងសម្រាប់កម្ពុជា ក្នុងការស្រូបយកនូវកំណើនសេដ្ឋកិច្ច វិនិយោគ និងទេសចរណ៍នាពេលអនាគត។
ដោយឡែក ចំពោះប្រជាពលរដ្ឋ ដែលបានសាងសង់លើចំណីអូរ ព្រែក របស់រដ្ឋ ហើយរងផលប៉ះពាល់ពីគម្រោងនេះ គឺពុំអាចផ្តល់សំណងជាដាច់ខាត ព្រោះរដ្ឋពុំមានលទ្ឋភាពក្នុងការផ្តល់សំណងនោះទេ គឺមានតែថវិការអភិវឌ្ឍន៍គម្រោងតែប៉ុណ្ណោះ។
គួរបញ្ជាក់ផងដែរថា ក្នុងឱកាសនោះ គណ:ប្រតិភូអន្តរៈក្រសួងបានអញ្ជើញទៅពិនិត្យរង្វង់មូលព្រះបដិមា ឧមាមហេស្វរ ស្ថិតនៅរង្វង់មូលរាម និងរង្វង់ព្រះថោងនាងនាគ នៅក្នុងស្រុកព្រៃនប់ រួចបន្តពិនិត្យគម្រោងសាងសង់ស្ថានីយ៍អាងប្រព្រឹត្តិកម្មទឹកកខ្វក់ទី៣ ស្ថិតនៅចុងពយ៣៩ ភូមិ៤ សង្កាត់លេខ៤ ក្រុងព្រះសីហនុ និងស្ថានីយ៍អាងប្រព្រឹត្តិកម្មទឹកកខ្វក់ទី១ អាងប្រព្រឹត្តិកម្មទី២ មានទីតាំងនៅសង្កាត់លេខ៣ ក្រុងព្រះសីហនុ និងចុះពិនិត្យការដាំកោងកាងតាមបណ្តោយវិថីតេជោសែនផងដែរ។
គម្រោងអភិវឌ្ឍន៍ហេដ្ឋារចនាសម្ព័ន្ធ និងសមិទ្ធផលនានា សម្រាប់ទទួលភ្ញៀវទេសចរជាតិ អន្តរជាតិ និងអ្នកវិនិយោគគិន ក្រោយពេលបិទបញ្ចប់ការរាតត្បាតនៃជំងឺកូវិដ-១៩ នាពេលខាងមុខ៕
ចែករំលែកព័តមាននេះ