ខេត្តរតនគិរី៖ រថយន្តកាមរីបាឡែនមួយគ្រឿង ដឹកឈើ បំរុងឆ្លងដែនទៅប្រទេសវៀតណាម ដែលកំពុងតែឈប់អែប នៅក្បែព្រៃនោះ ត្រូវបានកម្លាំងកងរាជអាវុធហត្ថ ស្រុកអូរយ៉ាដាវ ចុះបង្ក្រាប យកទៅប្រគល់ឱ្យជំនាញ ចាត់ការបន្ត។
ការបង្ក្រាបចាប់រថយន្តបាឡែននោះ កម្លាំងកងរាជអាវុធហត្ថ បានធ្វើឡើងនៅវេលាម៉ោង ៣រសៀល ថ្ងៃទី២២ ខែកក្កដា ឆ្នាំ២០២១ ដោយមានការសម្របសម្រួលពីលោកព្រះរាជអាជ្ញារងអមសាលាដំបូង ខេត្តរតនគិរី កម្លាំងមូលដ្ឋានកងរាជអាវុធហត្ថស្រុកអូរយ៉ាដាវ និងដឹកនាំដោយលោកវរសេនីយ៍ទោ សុខ មីន មេបញ្ជាការ កងរាជអាវុធហត្ថស្រុកអូរយ៉ាដាវ។
សមត្ថកិច្ច បានចុះស្រាវជ្រាវ រុករកឃើញរថយន្ត ដែលប្រព្រឹត្តបទល្មើសមួយគ្រឿងនោះ ដែលជនសង្ស័យបានយកមកលាក់ទុក នៅចំណុចភូមិប្លង់ ឃុំប៉ាតេ ស្រុកអូរយ៉ាដាវ ខេត្តរតនគិរី ហើយបានរត់គេចខ្លួន បាត់ភ្លាមៗដែរ។
សមត្ថកិច្ចថា រថយន្តខាងលើនេះ គឺមានការជាប់ពាក់ព័ន្ធករណីដឹកជញ្ជូនផលអនុផលព្រៃឈើ គ្មានលិខិតអនុញ្ញាត នៅថ្ងៃទី២១ ខែកក្កដា ឆ្នាំ២០២១ វេលាម៉ោង ៧ និង៣០នាទី នៅចំណុចភូមិកាតែ ឃុំលំជ័រ ស្រុកអូរយ៉ាដាវ ខេត្តរតនគិរី។
ក្រោយបង្ក្រាបបាន វត្ថុតាងរថយន្តមួយគ្រឿងនោះ សមត្ថកិច្ចកងរាជអាវុធហត្ថ ក៏បានប្រគល់ឱ្យទៅជំនាញផ្នែករដ្ឋបាលព្រៃឈើបរកែវ ចាត់ការតាមនីតិវិធីច្បាប់ព្រៃឈើផងដែរ៕ ផង់ វិន
ចែករំលែកព័តមាននេះ