ខេត្តព្រះសីហនុ ៖ ប្រជាពលរដ្ឋរស់នៅក្រុម៥ ភូមិ៣ ឃុំអូរត្រេះ ស្រុកស្ទឹងហាវ ខេត្តព្រះសីហនុ ដែលបានទៅចូលរួមបុណ្យសព ដោយមិនស្តាប់តាមការណែនាំរបស់អាជ្ញាធរ បង្កឲ្យមានការឆ្លងជំងឺកូវីដ-១៩…
ខេត្តព្រះសីហនុ ៖ ប្រជាពលរដ្ឋរស់នៅក្រុម៥ ភូមិ៣ ឃុំអូរត្រេះ ស្រុកស្ទឹងហាវ ខេត្តព្រះសីហនុ ដែលបានទៅចូលរួមបុណ្យសព ដោយមិនស្តាប់តាមការណែនាំរបស់អាជ្ញាធរ បង្កឲ្យមានការឆ្លងជំងឺកូវីដ-១៩ ជាបន្តបន្ទាប់ គិតត្រឹមថ្ងៃ២២ ខែកក្កដា ឆ្នាំ២០២១នេះ មានចំនួន ៦០នាក់ហើយ នេះបើតាមការអោយដឹងរបស់លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ ។
សូមជម្រាបថា កាលពីថ្ងៃទី១៨ កក្កដា ២០២១ កន្លងទៅមានករណីប្រជាពលរដ្ឋម្នាក់ឈ្មោះ គង់ ពៅ ភេទស្រី អាយុ៧៤ឆ្នាំ បានទទួលមរណភាព ដោយសារជំងឺរ៉ាំរ៉ៃ មានរយៈពេល០៥ខែមកហើយ សពមានទីលំនៅក្រុម៥ ភូមិ៣ ឃុំអូរត្រេះ ស្រុកស្ទឹហាវ ខេត្តព្រះសីហនុ ។
ជាមួយគ្នានេះ អាជ្ញាធរមូលដ្ឋាន បានចុះទៅណែនាំគ្រួសារសព មិនទាន់អនុញ្ញាតឲ្យធ្វើពិធីបុណ្យទេ ត្រូវរង់ចាំការយកសំណាកសិន ក្នុងករណីសំណាក អវិជ្ជមាន ទើបអាចធ្វើបុណ្យតាមប្រពៃណី តែជាលក្ខណៈគ្រួសារ និងមិនឲ្យមានការប្រមូលផ្តុំនោះទេ តែក្នុងករណីរកឃើញ វិជ្ជមានកូវីដ-១៩ គឺត្រូវវេចខ្ចប់សព ទៅបូជា តាមគោលការណ៍របស់ក្រសួងសុខាភិបាល និងត្រូវបិទទីតាំង ហើយអ្នកដែលមានការពាក់ព័ន្ធត្រូវយកសំណាកទាំងអស់គ្នា ។
បន្ទាប់មកក្រុមគ្រូពេទ្យ នៃមន្ទីរសុខាភិបាលខេត្ត បានចុះយកវត្ថុសំណាកសាកសព ឈ្មោះ គង់ ពៅ ពិនិត្យឃើញមាន (វិជ្ជមាន)កូវីដ-១៩ និងបានវេចខ្ចប់សាកសពយកទៅបូជាតាមវិធានសុខាភិបាល នៅទីតាំងដែលរដ្ឋបាលខេត្តបានរៀបចំ ដោយមិនអនុញ្ញាតឲ្យរៀបចំពិធីបុណ្បសពនោះទេ ។
តាមព័ត៌មានដែលទទួលបាន ទោះបីជាមិនមានការរៀបចំពិធីបុណ្ប ក៏នៅតែមានប្រជាពលរដ្ឋ ក្នុងភូមិមួយចំនួន ឆ្លៀតទៅចូលបុណ្បជាមួយគ្រួសារសព ដោយមិនស្តាប់ តាមការណែនាំរបស់អាជ្ញាធរនោះឡើយ ដែលជាហេតុធ្វើឲ្យមានការឆ្លងជំងឺកូវីដ-១៩ ជាបន្តបន្ទាប់គិតត្រឹមថ្ងៃ២២ ខែកក្កដា ឆ្នាំ២០២១នេះ មានចំនួនអ្នកឆ្លង៦០នាក់ហើយ ។
សកម្មភាពនេះសបញ្ជាក់ថា បងប្អូនប្រជាពលរដ្ឋខាងលើ គឺមិនបានចូលរួមអនុវត្តត្រឹមត្រូវ តាមការណែនាំរបស់រដ្ឋបាលខេត្ត ដែលដាក់ចេញដោយក្រសួងសុខាភិបាល និងអនុសាសន៍របស់សម្តេចតេជោ ហ៊ុន សែន គឺ៣.ការពារ ៣.កុំ ទើបធ្វើឲ្យមានការឆ្លងរាលដាលពេញភូមិបែបនេះ ។
ឆ្លងតាមរយៈបទពិសោធន៍នេះ អាជ្ញាធរសមត្ថកិច្ចពាក់ព័ន្ធ គួរតែពង្រឹងការអនុវត្តចាត់វិធានការឲ្យបានម៉ឺងម៉ាត់បំផុត លើការផាកពិន័យតាមវិធានការសុខាភិបាល ចំពោះបុគ្គលដែលល្មើសការណែនាំ ដើម្បីកាត់ការចម្លងជំងឺកូវីដ-១៩ នៅក្នុងសហគមន៍ ៕
ចែករំលែកព័តមាននេះ