ខេត្តសៀមរាប៖ សេចក្តីរាយការណ៍បានឱ្យដឹងថា កម្លាំងនគរបាលជំនាញនៃស្រុកសូទ្រនិគម បានចាប់ខ្លួនបុរសម្នាក់ ជាកម្មកររបស់មន្ត្រីរដ្ឋបាលសង្កាត់ជលផល កំពង់ឃ្លាំង ដែលបានចុះល្បាត រួចប្រទះឃើញមនុស្សមួយក្រុម កំពុងឆក់ត្រី ហើយក៏បានប្រតាយប្រតប់គ្នា…
ខេត្តសៀមរាប៖ សេចក្តីរាយការណ៍បានឱ្យដឹងថា កម្លាំងនគរបាលជំនាញនៃស្រុកសូទ្រនិគម បានចាប់ខ្លួនបុរសម្នាក់ ជាកម្មកររបស់មន្ត្រីរដ្ឋបាលសង្កាត់ជលផល កំពង់ឃ្លាំង ដែលបានចុះល្បាត រួចប្រទះឃើញមនុស្សមួយក្រុម កំពុងឆក់ត្រី ហើយក៏បានប្រតាយប្រតប់គ្នា ជាមួយក្រុមជនរងគ្រោះ រួចបានផ្ទុះអាវុធ ១គ្រាប់ ចំជនរងគ្រោះ បណ្តាលឱ្យរងរបួសធ្ងន់។
ហេតុការណ៍នេះ បានកើតឡើង នៅវេលាម៉ោង ២ និង៣០ នាទីរំលងអាធ្រាត្រ ឈានចូលថ្ងៃទី២២ ខែកក្កដា ឆ្នាំ២០២១ ស្ថិតនៅចំណុច ពាមឃ្លាំង មាត់ទន្លេ ក្នុងភូមិសាស្ត្រ ភូមិតាច្រនៀង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។
ប្រភពពីសមត្ថកិច្ចស្រុកសូទ្រនិគម បានឱ្យដឹងថា មានករណីប្រើប្រាស់អាវុធខុសច្បាប់ បង្កឡើងដោយជនសង្ស័យ ឈ្មោះ ទង តាំង ភេទប្រុស អាយុ ៦១ឆ្នាំ ជាកម្មករនៅជាមួយកម្លាំងជលផល សង្កាត់កំពង់ឃ្លាំង បានបាញ់ កាំភ្លើងធុន AK ស្វាយបត់ លេខ៣២២៤៣ ចំនួន ១គ្រាប់ ចំលើជនរងគ្រោះ ឈ្មោះ ភត់ ឈុនណា ភេទប្រុស អាយុ ២៩ឆ្នាំ មានទីលំនៅ ក្នុងភូមិមុខវត្ត ឃុំកំពង់ឃ្លាំង ស្រុកសូទ្រនិគម ខេត្តសៀមរាប (របួសធ្ងន់) ត្រូវបានបញ្ជូនទៅសង្គ្រោះ នៅមន្ទីពេទ្យបង្អែកខេត្តសៀមរាប។
ប្រភពពីសមត្ថកិច្ចបន្តថា នៅយប់កើតហេតុ ម៉ោង ២ និង០០ ជនសង្ស័យមានគ្នា ០៣នាក់ ចុះល្បាត និងចាប់អ្នកលួចឆក់ត្រី ដល់ចំណុចកើតហេតុ ជួបក្រុមជនរងគ្រោះ កំពង់ឆក់ត្រី ក៏ធ្វើការឃាត់ ហើយក្រុមជនរងគ្រោះ ក៏ប្រវាយប្រតប់ រត់គេច ហើយជនសង្ស័យ ក៏ទាញកាំភ្លើងបាញ់ឡើងលើ ០១គ្រាប់ នៅលើទូកក្នុងទឹក ក៏រាលកាណុងកាំភ្លើង ចំជនរងគ្រោះតែម្ដង។
ជុំវិញករណីបាញ់បោះនោះដែរ លោក ស ម៉ាប់ បានឱ្យប្រាប់តាមទូរស័ព្ទ នៅល្ងាចនេះថា ក្រុមការងាររបស់លោក បានចុះល្បាត ស្រាប់តែប្រទះឃើញមានមនុស្សមួយក្រុម ចូលមកលួចឆក់ត្រីនៅមុខស្នាក់ការជលផលតែម្តង ហើយកម្លាំងរបស់លោក បានណែនាំដែរ តែពួកគេមិនស្តាប់ រួចក៏ផ្ទុះជម្លោះ រហូតប្រតាយប្រតប់គ្នា ដោយកូនចៅរបស់លោកជិះទូកផងកាន់កាំភ្លើងផង ទើបឃ្លីងឃ្លោងរាលកៃផ្ទុះអាវុធ ១គ្រាប់ ចំបុរសម្នាក់ ជាអ្នកនេសាទ។ លោកបន្តថា ករណីនេះ ស្រេចលើសមត្ថកិច្ចជាអ្នកវិនិច្ឆ័យទៅចុះ។
ជនសង្ស័យ ជាកម្មកររបស់មន្ត្រីជលផល កំពង់ឃ្លាំង ត្រូវបានកម្លាំងនគរបាលស្រុកសូទ្រនិគម ឃាត់ខ្លួន និងរៀបចំកសាងសំណុំរឿង បញ្ជូនមកកាន់ការិយាល័យជំនាញចាត់ការបន្តតាមផ្លូវច្បាប់ និង កសាងសំណុំរឿង បញ្ជូនខ្លួន បន្តទៅកាន់តុលាការខេត្ត ដើម្បីចាត់ការបន្តតាមនីតិវិធីនៃច្បាប់ ស្តីពីជលផល៕ ច័ន្ទ រស្មី
ចែករំលែកព័តមាននេះ