ជាតិជាម្ដាយគ្រប់រូបមិនដែលមានម្ដាយណាដែលមិនគិតដល់កូន មិននឹកកូននោះទេ ម៉ែតែងនឹកកូនគិតកូនរហូតហើយគ្រប់ពេល ព្រោះម៉ែស្រឡាញ់កូន ម៉ែត្រូវការកូន ម៉ែមានបង្អែកជាទីកក់ក្តៅ តែពេលណាដែលកូនឃ្លាតឆ្ងាយពីម៉ែ ឬពេលដែលកូនមិននៅជិតម៉ែម្តងៗ ក្នុងទ្រូងម៉ែតឹងណែនចង្អៀត ចង្អល់ អួលអាក់ព្រោះស្រឡាញ់កូន ។
នេះហើយជាបេះដូងម្តាយ ក្នុងចិត្តរបស់ម៉ែតែងនឹករលឹកគិតដល់កូនជានិច្ច តែក្នុងចិត្តរបស់កូនវិញមានគិតដល់ម៉ែដែរទេ ? ក្នុងចិត្តរបស់កូនខ្លះមិនដែលនឹកនាដល់ម៉ែឡើយ ទាល់តែកូនជួបឧបសគ្គផ្សេងៗ ឬទាល់តែមានការងារចង់ឲ្យម៉ែជួយ ទើបកូននឹកដល់ម៉ែ កូនត្រូវការម៉ែ កាលកូនមានភាពស្រណុកសុខជាកូនមិនគិតដល់ម៉ែទេ ចុះហេតុអ្វីក៏ចាំបាច់ទាល់តែមានការងារចង់ឲ្យម៉ែជួយ ទើបនឹកដល់ម៉ែ ម្ដេចក៏មិននឹកម៉ែគ្រប់ពេលទៅ ។
តើកូនមានដឹងទេថា គ្រប់ពេលដែលម៉ែនៅម្នាក់ឯង ម៉ែតែងនឹកដល់កូន ម៉ែចង់ឲ្យកូនរបស់ម៉ែមកនៅជិតម៉ែ នៅជាមួយនឹងម៉ែ ហើយគ្រប់ពេលវេលាដែលម៉ែជួបនូវទុក្ខលំបាក ជាពិសេសពេលដែលម៉ែឈឺ គឺម៉ែត្រូវការកូនខ្លាំងណាស់ ម៉ែប្រាថ្នាចង់ឲ្យកូនមកមើលម៉ែ ចង់ឲ្យកូនមកដើម្បីឲ្យម៉ែឃើញមុខ ព្រោះម៉ែត្រូវការកូន ម៉ែចង់ឲ្យកូនមកនៅជិតម៉ែ បើកូនគ្មានអ្វីយកមកជូនម៉ែក៏ហីទៅចុះ ឲ្យតែកូនមកឲ្យម៉ែឃើញមុខ ប៉ុណ្ណឹង ម៉ែសប្បាយចិត្តរកអ្វីប្រៀបផ្ទឹមពុំបានឡើយ ៕ សាន សារិន
ចែករំលែកព័តមាននេះ