ខេត្តបាត់ដំបង ៖ ក្រុមក្មេងអន្ធពាលចំនួន១២នាក់ដែលសមត្ថកិច្ចបង្ក្រាបបាននៅក្នុងសមរភូមិចំនួន០៣ ដាច់ដោយឡែកពីគ្នាក្នុងរយៈពេល០២ថ្ងៃកន្លងមកនេះ ត្រូវបានមន្ត្រីការិយាល័យជំនាញ កសាងសំណុំរឿងបញ្ជូនទៅតុលាការ ជាបន្តបន្ទាប់ចាប់តាំងពីថ្ងៃទី២១ រហូតដល់ព្រឹកថ្ងៃទី២២ កក្កដា នេះ ដើម្បីប្រគល់ជូនតំណាងអយ្យការចាត់វិធានការតាមនីតិវិធីច្បាប់។ នេះបើតាមការឲ្យដឹងពីមន្ត្រីការិយាល័យព្រហ្មទណ្ឌកំរិតស្រាល នៃស្នងការដ្ឋានខេត្ត។
នាយការិយាល័យព្រហ្មទណ្ឌកំរិតស្រាល លោក ឈឿង គឹមសុង ដែលទទូលបញ្ជាពីលោកស្នងការខេត្ត ដឹកនាំកម្លាំងចុះបង្ក្រាបក្រុមក្មេងទំនើងច្បាំងគ្នាយ៉ាងឃោរឃៅទាំងចំនួន០៣លើកផ្ទូនៗគ្នានេះ បានឲ្យដឹងថា ក្រុមក្មេងទនើងចំនួន១២នាក់ ដែលកម្លាំងរបស់លោកបង្ក្រាបបានជាបន្តបន្ទាប់នេះ គឺពួកគេបានប្រព្រឹត្តបទល្មើសដាច់ដោយឡែកៗពីគ្នា តែពួកគេជាបក្សពួកតែមួយ ប៉ុន្តែដាក់ឈ្មោះឬដាក់រហស្សនាម ក្រុមផ្សេងៗគ្នាសម្រាប់សម្គាល់ ។ លោកឈឿង គឹមសុង បានបញ្ជាក់ថា ពួកនេះមានច្រើនក្រុមណាស់ តែពេលមានជម្លោះជាមួយភាគីផ្សេង ពួកគេបានកេណ្ឌគ្នាប្រមូលពីតាមក្រុមនានា ដើម្បីតាមកាប់ទៅលើក្រុមនោះ។
ដោយឡែក ជនអន្ធពាល១២នាក់ ដែលកម្លាំងរបស់លោកឃាត់ខ្លួននេះ គឺបានប្រព្រឹត្តចំនួន០៣កន្លែង បណ្ដាលឲ្យភាគីម្ខាងៗទៀតរបួសសរុបចំនួន០៣នាក់ តែពេលនេះ មន្ត្រីរបស់លោកបាននិងកំពុងដឹកជញ្ជូនពួកគេទៅកាន់សាលាដំបូងខេត្តជាបន្តបន្តាប់ តាំងពីថ្ងៃទី២១ រហូតដល់ព្រឹកថ្ងៃទី២២ កក្កដា ព្រោះតំណាងអយ្យការមិនទាន់បញ្ចប់ការសាកសួរក្រុមជនសង្ស័យនៅឡើយ ។ យោងតាមព្រឹត្តហេតុទាំង០៣ករណី ដែលមន្ត្រីជំនាញបានរាយការណ៍ គឺ សង្គ្រាមក្មេងទំនើងនេះ បានផ្ទុះឡើងលើកទី១ នៅវេលាជិតពាក់កណ្ដាលអាធ្រាត្រ យប់ថ្ងៃទី១៨ កក្កដា នៅត្រង់ចំណុចភូមិអូរខ្ជាយ ឃុំអូរដំបង១ ស្រុកសង្កែ។
ក្រុមជនដៃដល់ដែលមានគ្នាច្រើនប្រដាប់ដោយកាំបិតនិងដុំថ្ម បានជិះដេញកាប់ទៅលើភាគីសត្រូវរបស់ខ្លួនដែលមានគ្នាតិច បណ្ដាលឲ្យយុវជនម្នាក់ឈ្មោះ ឆេ វិសាល អាយុ១៩ឆ្នាំ របួសស្ទើរដាច់កដៃម្ខាង លុះនៅរសៀលថ្ងៃទី១៩ កក្កដា កម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវឃាត់ខ្លួនក្រុមដាំដល់បានចំនួន០៥នាក់។ បើតាមរបាយការណ៏បានឲ្យដឹងថា ជនទាំង០៥ដែលត្រូវឃាត់ខ្លួនមាន ១ឈ្មោះ តាំ សម្បត្តិ ហៅ ខ្ទើយ អាយុ១៦ឆ្នាំ ២ឈ្មោះ ស៊ន កក្កដា ហៅ សាក់ អាយុ១៩ឆ្នាំ ៣ឈ្មោះ ឆន ឈាងអី ហៅ ឆៃ អាយុ១៦ឆ្នាំ ៤ឈ្មោះ នួន រាជធានី ហៅ ប៉ោក អាយុ១៦ឆ្នាំ និង ៥ឈ្មោះ លេត ខេមរា ហៅ តុង អាយុ១៦ឆ្នាំ រីឯបក្សពួកមួយចំនួនទៀតកំពុងសម្ងំលាក់ខ្លួន។
ករណីលើកទី២ បានកើតឡើង នៅរសៀលថ្ងៃទី១៨ កក្កដា នៅចំណុចភូមិភ្នំគល់ ឃុំកន្ទឺ២ ស្រុកបាណន់ ដែលបង្កឡើងដោយពួកក្មេងទំនើងមួយក្រុម ដែលជាបក្សពួកក្រុមខាងលើដែរ បានតាមដេញកាប់ទៅលើយុវជន០៣នាក់ បណ្ដាលឲ្យយុវជនម្នាក់ឈ្មោះ ឈាន សាឃីម អាយុ២០ឆ្នាំរងរបួសចំនួន០៣កន្លែង លុះនៅល្ងាចថ្ងៃទី១៩ កម្លាំងការិយាល័យព្រហ្មទណ្ឌកំរិតស្រាល ធ្វើការស្រាវជ្រាវតាមឃាត់ខ្លួនបានក្រុមជនដៃដល់បានចំនួន០៦នាក់។ នៅក្នុងរបាយការណ៏ ជនទាំង០៦នាក់មាន ១ឈ្មោះ គេង សុថេត អាយុ១៧ឆ្នាំ ២ឈ្មោះ ម៉ៅ ប៊ុនយ៉ុង អាយុ១៧ឆ្នាំ ៣ឈ្មោះ ភ័ណ្ឌ សំភេទ អាយុ១៥ឆ្នាំ ៤ឈ្មោះ រិ សារ៉ាក់ ហៅប៉ោត អាយុ១៧ឆ្នាំ ៥ឈ្មោះ វ័យ រ៉ាវីន អាយុ២០ឆ្នាំ និង ៦ឈ្មោះ យឿន វ៉ាន់ថៃ អាយុ១៨ឆ្នាំ។
ដោយឡែក សង្គ្រាមលើកទី៣ រវាងពួកក្មេងទំនើង០២ក្រុម បានកើតឡើងនៅកណ្ដាលថ្ងៃត្រង់ ថ្ងៃទី២០ កក្កដា ដែលបានពើបប្រយុទ្ធគ្នាយ៉ាងក្ដៅគគុក ត្រង់ចំណុចភូមិកន្ទឺ២ ឃុំបាណន់ ស្រុកបាណន់ ដដែល។ កាលចំបាំងលើកទី៣នេះ ភាគីម្ខាងៗមានចំនួន០៣នាក់ប្រដាប់ដោយកាំបិតខ្វែវ កាំបិតប៉័ងតោ និង ពូថៅ តែសមត្ថកិច្ចដកហូតបានទាំងកាំភ្លើងច្នៃ១ដើមផង។ នៅក្នងបាយការណ៏ ក្រោយបញ្ចប់សង្គ្រាម កម្លាំងការិយាល័យព្រហ្មទណ្ឌកំរិតស្រាល បានធ្វើការស្រាវជ្រាវ តាមឃាត់ខ្លួនភាគីដែលច្បាំងឈ្នះបានម្នាក់ ដែលជាមេខ្លោង គឺឈ្មោះ ម៉ា ចិទ្រី ហៅ ស អាយុ១៨ឆ្នាំ នៅស្រុកឯកភ្នំ ដែលជាបក្សក្រុមដែលត្រូវចាប់ខ្លួនទាំង០២ករណីខាងលើ។
ដោយឡែកភាគីដែលចាញ់ចំនួន០៣នាក់ដែរ មានម្នាក់រងរបួសធ្ងន់ចំនួន០៣កន្លែង តែគេមិនស្គាល់ឈ្មោះនៅឡើយទេ។ លោក ឈឿង គឹមសុង បាននិយាយថា ក្រុមជនអន្ធពាលដែលត្រូវចាប់ខ្លួនទាំង០៣ករណីខាងលើនេះ សុទ្ធតែមានរហ័សមាន ឬ ឈ្មោះសម្គាល់ក្រុម ឬ បក្សរបស់ពួកគេនីមួយៗ។ បក្សពួកក្រុមទាំងនេះ មាននៅតាមបណ្ដាស្រុកនានា និង នៅក្នុងក្រុងបាត់ដំបង ផង។ ពួកគេបានណាត់ប្រមូលម្ដុំគ្នា នៅពេលមានក្រុមណាមួយ មានជម្លោះជាមួយក្រុមផ្សេង រួចតាមកាប់ចាក់ទៅលើក្រុមនោះតែម្ដង។ បើតាមលោកគឹមសុង បានប្រាប់ថា ឈ្មោះឬរហ័សមានសម្រាប់សម្គាល់ក្រុមពួកគេនីមួយៗមានដូចជា « ក្រុមប៊ួយស័រ ក្រុមហាយវេបាហៃ ក្រុមហាយវេបាណន់ និង មាន១ក្រុមទៀតនៅស្រុកកំរៀង»។
ពួកគេបានសហការគ្នាល្អណាស់ ពេលចេញធ្វើសកម្មភាពម្ដងៗ ហើយពេលខ្លួនពួកគេបានកេណ្ឌគ្នាទៅបង្កសង្គ្រាមជាមួយពួកក្មេងទំនើងដល់ខេត្តប៉ៃលិនទៀតផង ដេលមានម្នាក់ធ្លាប់ប្រឡូកក្នុងសង្គ្រាមក្មេងទំនើងស្ទើររាប់ភ្លេច រហូតដល់អ្នកខ្លះមិនចាំសមរភូមិដែលខ្លួនធ្លាប់ប្រយុទ្ធទៀតផង។ ប៉ុន្តែយ៉ាងណា លោកប្រធានការិយាល័យព្រហ្មទណ្ឌកំរិតស្រាលរូបនេះ បាននិយាយថា ជនទាំង១២នាក់ ដែលកម្លាំងការិយាល័យជំនាញរបស់លោក ឃាត់ខ្លួនបានពេលនេះត្រូវលោកស្នងការខេត្ត បញ្ជាឲ្យមន្ត្រីជំនាញ បញ្ជូនទៅសាលាដំបូងខេត្តហើយ ដែលពេលនេះពួកគេកំពុងស្ថិតនៅក្នុងដៃតំណាងអយ្យការសាកសួរនៅឡើយ។ ជាមួយនឹងការអនុវត្តច្បាប់ទៅលើពួកជនអន្ធពាលខាងលើនេះ តុលាការគួរតែដាក់ទោសទណ្ឌទៅលើក្រុមជនអន្ធពាលបាតសង្គមទាំងនេះឲ្យបានតឹងតែងបន្តិច ព្រោះក្រុមនេះបានបង្កចលាចលសម្បើមណាស់ដល់ការរស់នៅរបស់ប្រជាពលរដ្ឋ។
គេសង្កេតឃើញបច្ចុប្បន្ននេះមានបញ្ហាចំនួន០៣ ដែលលេចធ្លោជាងគេ បាននិងកំពុងរារាំង និង ធ្វើឲ្យប៉ះទង្គិចយ៉ាងខ្លាំងដល់គោលនយោបាយ «ភូមិ ឃុំមានសុវត្ថិភាព» ដែលជាគោលនយោបាយដ៏ធំចម្បងរបស់រាជរដ្ឋាភិបាល។ បញ្ហាទាំង០៣នោះមាន « សកម្មភាពពួកប្រព្រឹត្តបទល្មើសគ្រឿងញៀន សកម្មភាពជនប្រព្រឹត្តអំពើចោរកម្ម និង សកម្មភាពក្រុមក្មេងទំនើង» នេះតែម្ដង។ ក្រុមជនអន្ធពាល ឬ ជនសង្គមងងឹតទាំង០៣ប្រភេទនេះ កំពុងបង្កក្ដីបារម្ភខ្លាំងបំផុតសន្តិភាពសង្គម ដល់ការរស់នៅរបស់ប្រជាពលរដ្ឋ ដែលឈានដល់ការធ្វើឲ្យរាំងស្ទះដល់ការអនុវត្តនូវគោលនយោបាយ«ភូមិ ឃុំមានសុវត្ថិភាព» ដែលជាគោលនយោបាយដ៏ចម្បងរបស់រាជរដ្ឋាភិបាល។ សត្រូវទាំង០៣នេះ បាននិងកំពុងបង្កការអុកឡុក ស្ទើរគ្រប់ទីកន្លែង មិនថា នៅក្នុងក្រុងឬនៅតាមបណ្ដាស្រុកនានានោះទេ។
រីឯការទប់ស្កាត់ឬការបង្ក្រាបរបស់សមត្ថកិច្ចនៅតាមបណ្ដាស្រុកឬនៅក្នុងក្រុង ហាក់មានភាពកម្សោយយ៉ាងខ្លាំង។ បើពិនិត្យលើកិច្ចប្រតបត្តិការបង្ក្រាបបទល្មើសជាក់ស្ដែង គឺ ពឹងផ្អែកទាំងស្រុកតែទៅលើកម្លាំងការិយាល័យជំនាញ នៃស្នងការខេត្តតែប៉ុណ្ណោះ រីឯកម្លាំងតាមបណ្ដាស្រុក ឬ ក្រុង គឺ «ចប់» បានត្រិមល្អមើល ពេលខ្លះឃុំឃិតគ្នាលាក់បាំងបទល្មើសដែលកើតឡើងនៅក្នុងមូលដ្ឋានរបស់ខ្លួន មិនរាយការណ៏ជួនថ្នាក់លើទៀតផង៕
ចែករំលែកព័តមាននេះ