រាជធានីភ្នំពេញ ៖ ផ្ទះទឹកបែចិញ្ចឹមត្រី ផ្ទះតូចៗ និងសំណង់មិនរៀបរយនៅលើផ្ទៃទឹកទន្លេនៅតែបន្តនៅត្រៀមត្រា នៅតាមដងទន្លសាបក្នុងភូមិគ្រួស សង្កាត់សំរោងខណ្ឌព្រែកព្នៅនៅឡើយ បន្ទាប់ពីអាជ្ញាធរបានប្រើកម្លាំងអនុវត្តវិធានការរដ្ឋបាលរុះរើយ៉ាងក្តៅគគុក កាលពីថ្ងៃទី១២ ខែមិថុនា ឆ្នាំ២០២១ កន្លងមក ។
ការអនុវត្តវិធានការរដ្ឋបាលនេះ អាជ្ញាធររាជធានីភ្នំពេញបានចាត់ទុកថា បានប្រព្រឹត្តទៅដោយរលូន និងទទួលបានជោគជ័យស្ទើរ១០០ភាគរយនៅសល់តែប្រមាណ៥ភាគរយនោះទេ ដែលមួយចំនួនជាជនជាតិវៀតណាមបានចល័តទៅស្រុកវិញ ដោយអាជ្ញាធរវៀតណាមមិនអោយចូលជាប់នៅត្រឹមព្រំប្រទល់ និងមួយចំនួនបានទៅប្រមូលផ្តុំគ្នានៅក្នុងភូមិគ្រួសព្រំប្រទល់ខណ្ឌព្រែកព្នៅ និងស្រុកពញាឮខេត្តកណ្តាល ។
ទោះបីជាយ៉ាងណាផ្ទះទឹកបែចិញ្ចឹមត្រីដែលចតត្រៀមត្រា នៅក្បែរវត្តគ្រួសនោះ អាជ្ញាធរទុកពេលអោយតែ៦ខែ រង់ចាំត្រីធំអាចចាប់លក់ហើយ អាជ្ញាធរនឹងបន្តរុះរើទៀត ។
តាមព័ត៌មានអោយដឹងថា រហូតមកដល់ព្រឹក ថ្ងៃទី២២ ខែកក្កដា ឆ្នាំ២០២១ នៅតាមដងទន្លេសាបក្នុងមូលដ្ឋានខណ្ឌឬស្សីកែវ , ខណ្ឌជ្រោយចង្វារ និងមួយផ្នែកនៅខណ្ឌព្រែកព្នៅខាងជើងស្ពានព្រែកព្នៅដែលពីមុខសំបូរទៅដោយផ្ទះទឹកបែចិញ្ចឹមត្រី ផ្ទះតូចៗនិងសំណង់មិនរៀបរយនោះត្រូវបានអាជ្ញាធររុះរើអស់ ។ តែនៅមានផ្ទះទឹកជាច្រើន ដែលអាជ្ញាធរអះអាងថា ទុកពេលអោយបានចល័តទៅចតត្រៀបត្រា នៅក្នុងភូមិគ្រួស សង្កាត់សំរោងខាងជើងនិងខាងត្បូង វត្តគ្រួស ក្នុងខណ្ឌព្រែកព្នៅ ។
តាមលោក យ៉ាំង ខា ជាជនជាតិវៀតណាម មានឈ្មោះខ្មែរ ហៅ សុខ ចំរើន ភេទប្រុស អាយុ៤៣ឆ្នាំ ដែលជាអ្នកចិញ្ចឹមត្រី ខ្យារ ,ត្រីចាប , ឆ្ពិន ,ប្រួល និងត្រីក្អែក បានអោយដឹងថា លោកមានបែរចិញ្ចឹមត្រីចំនួន៤ នៅសង្កាត់ព្រែកព្នៅ ខណ្ឌព្រែកព្នៅ បន្ទាប់ពី អាជ្ញាធរអោយរុះរើគាត់ក៏បានរុះរើអស់ចំនួន២ នៅសល់ចំនួន២ ទៀតត្រីនៅតូចៗ ត្រូវបានអាជ្ញាធរទុកពេលអោយ៦ខែ ដោយអោយចល័តមកចតនៅក្នុងភូមិ គ្រួស សង្កាត់សំរោង ខណ្ឌព្រែកព្នៅជាបណ្តោះអាសន្ន តែដល់ថ្ងៃកំណត់ត្រូវតែរុះរើ បើមិនរុះអាជ្ញាធរ នឹងចុះរុះរើទៀត ។
អ្នកចិញ្ចឹមត្រីរូបនោះបានអោយដឹងទៀតថា បន្ទាប់ពីអាជ្ញាធរអោយរុះរើ មានបែត្រីជនជាតិវៀតណាមជាច្រើនបានចល័តទៅប្រទេសវិញ តែពុំត្រូវបានអាជ្ញាធរវៀតណាម អោយចូលឡើយដោយនៅជាប់ព្រំប្រទល់ ហើយពួកគេបានជួលដីអ្នកស្រុកចតបណ្តោះអាសន្នក្នុង១ឆ្នាំ៥០០ដុល្លារ ។ចំណែកមួយចំនួនដែលត្រីនៅតូចៗក៏បានចល័តមកចត នៅក្នុងភូមិ គ្រួសជាប់ព្រំប្រទល់ស្រុកពញាឮ ខេត្តកណ្តាល នៅខាងជើងវត្តគ្រួសនេះ ។
គួបញ្ជាក់ថា កាលពីថ្ងៃទី១២ ខែមិថុនា ឆ្នាំ២០២១កន្លងមក អាជ្ញាធរខណ្ឌទាំង៦ បានប្រើកម្លាំងអនុវត្តន៍វិធានការរដ្ឋបាល រុះរើ បែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយនៅលើផ្ទៃទន្លេ ដើម្បីបើកផ្លូវនាវាចរកុំអោយប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់ ពិសេសកុំអោយបន្តការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឱ្យខូចខាតយ៉ាងធ្ងន់ធ្ងរដល់ជីវៈចម្រុះក្នុងទឹក ខូចគុណភាពទឹក បំពុលបរិស្ថាន និងប៉ះពាល់ដល់សោភ័ណរភាពរាជធានីភ្នំពេញ ព្រមទាំងប៉ះពាល់ដល់សុខភាពប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ ។
ទន្ទឹមការប្រើវិធានការរដ្ឋបាលនេះ ទទួលបាននូវការគាំទ្រពីមហាជនយ៉ាងខ្លាំង ហើយអាជ្ញាធរបានចាត់ទុកថា ការអនុវត្តវិធានការរៀបចំសណ្ដាប់ធ្នាប់លើផ្ទៃទន្លេបានប្រព្រឹត្តទៅយ៉ាងរលូន និងទទួលបានជោគជ័យ ។
នេះបើតាមការបញ្ជាក់ឲ្យដឹងនៅក្នុងកិច្ចប្រជុំ សាមញ្ញលើកទី២៦របស់ក្រុមប្រឹក្សារាជធានីភ្នំពេញក្រោមវត្តមានលោកប៉ា សុជាតិវង្សប្រធានក្រុមប្រឹក្សារាជធានីភ្នំពេញ និងលោកមាន ចាន់យ៉ាដា អភិបាលរងរាជធានីភ្នំពេញ និងជាតំណាងឲ្យលោកឃួង ស្រេង អភិបាលរាជធានីភ្នំពេញ កាលពីដើមខែកក្កដា ឆ្នាំ២០២១កន្លង ។
លោកមាន ចាន់យ៉ាដា បានមានប្រសាសន៍ឲ្យដឹងថា រាជធានីភ្នំពេញមានខណ្ឌចំនួន០៦ ដែលមានផ្ទះបណ្ដែតទឹក បែត្រី និងសំណង់មិនរៀបរយនៅតាមដងទន្លេ ដែលមានចំនួន១៤៧២ទីតាំងចែកចេញជា៤ប្រភេទ ក្នុងនោះមានប្រភេទជា បែត្រី សំណង់មិនរៀបរយ ដៃត្រីនិងទូកនេសាទ ។
អាជ្ញាធរក៏បានបញ្ជាក់ថា នៅក្នុងយុទ្ធនាការរុះរើបងប្អូនប្រជាពលរដ្ឋបានស្ម័គ្រចិត្តរុះរើបានចំនួន១២៤២ទីតាំង ។ នៅសល់មួយចំនួន អាជ្ញារបានរៀបចំឲ្យពួកគាត់ចិញ្ចឹមត្រីជាបណ្តោះអាសន្នចំនួន២ទីតាំងផ្សេងគ្នា,ទី១ នៅជាប់ព្រំប្រទល់រវាងស្រុកពញាឮ និងខណ្ឌព្រែកព្នៅ មានចំនួន១៩៤ទីតាំង និងទីតាំងទី២ នៅជាប់និងស្រុកលើកដែកចំនួន១៩ទីតាំង ហើយកំពុងតែរុះរើជាបណ្តើរ ។
ការអនុវត្តនូវវិធានការរដ្ឋបាល ក្នុងការរៀបចំសណ្តាប់ធ្នាប់របៀបរៀបរយនៅតាមដងទន្លេនៅរាជធានីភ្នំពេញនេះទទួលបានជោគជ័យ គឺដោយសារយើងបានសហការគ្នាល្អជាមួយដៃគូពាក់ព័ន្ធ និងមានការគាំទ្រពីមហាជនយ៉ាងពេញទំហឹង ។ ទោះបីជាយ៉ាងណានៅមានបែត្រីដែលអាជ្ញាធរអះអាងថា នៅសល់ប្រមាណ ២០០ទៀតបន្តនៅចតត្រៀមត្រានៅឡើយ ។
សង្ឃឹមថាបែត្រីទាំងនោះនឹងត្រូវបានរុះរើចេញនៅពេលផុតឱសានវ៉ាតរយៈពេល៦ខែ ចាប់ពីថ្ងៃចាប់ផ្តើមនៃការអនុវត្តវិធានការរដ្ឋបាលនោះ ៕
ចែករំលែកព័តមាននេះ