ខេត្តបាត់ដំបង ៖ តំណាងអយ្យការបាននិងកំពុងបន្តនីតិវិធីសួរនាំពួកក្មេងទំនើងមួយក្រុម ដែលកម្លាំងការិយាល័យព្រហ្មទណ្ឌកំរិតស្រាលនៃស្នងការខេត្តបានកសាងសំណុំរឿងបញ្ជូនទៅសាលាដំបូងខេត្ត កាលពីព្រឹកថ្ងៃទី២១ កក្កដា ក្រោយបង្ក្រាបបានក្នុងអំពើហិង្សាដ៏ឃោរឃៅមួយនៅសស្រុកបាណន់។ លោក ឈឿង គមឹសុង…
ខេត្តបាត់ដំបង ៖ តំណាងអយ្យការបាននិងកំពុងបន្តនីតិវិធីសួរនាំពួកក្មេងទំនើងមួយក្រុម ដែលកម្លាំងការិយាល័យព្រហ្មទណ្ឌកំរិតស្រាលនៃស្នងការខេត្តបានកសាងសំណុំរឿងបញ្ជូនទៅសាលាដំបូងខេត្ត កាលពីព្រឹកថ្ងៃទី២១ កក្កដា ក្រោយបង្ក្រាបបានក្នុងអំពើហិង្សាដ៏ឃោរឃៅមួយនៅសស្រុកបាណន់។
លោក ឈឿង គមឹសុង នាយការិយាល័យព្រហ្មទណ្ឌកំរិតស្រាលបានឲ្យដឹងថា ក្មេងទំនើងមួយក្រុមដែលកម្លាំងរបស់លោកបានបញ្ជូនទៅតុលាការមានចំនួន០៦នាក់ ដែលត្រូវកម្លាំងរបស់លោកបង្ក្រាបបានជាបន្តបន្ទាប់ កាលពីព្រលប់ថ្ងៃទី១៩ កក្កដា ក្រោយមួយថ្ងៃដែលពួកគេ បានប្រើកាំបិតដេញកាប់ចាក់គ្នាយ៉ាងឃោរឃៅនៅស្រុកបាណន់។ លោកបានបញ្ជាក់ថា សង្គ្រាមរវាងពួកក្មេងទំនើងទាំង០២ក្រុមនេះ បានបណ្ដាលឲ្យយុវជនម្នាក់រងរបួស រីឯចំនួន០២នាក់ទៀតរត់រួច ដែលផ្ដើមចេញពីរឿងគំនុំ។
នៅក្នុងរបាយការណ៍បានឲ្យដឹងថា ជនអន្ធពាលទាំង០៦នាក់ដែលត្រូវកសាងសំណុំរឿងបញ្ជូនទៅតុលាការ រួមមាន ១-ឈ្មោះ យឿង វ៉ាន់ថៃ អាយុ១៨ឆ្នាំ ២-ឈ្មោះ គេង សុថេត អាយុ១៧ឆ្នាំ ៣-ឈ្មោះម៉ៅ ប៊ុនយ៉ុង អាយុ២០ឆ្នាំ ៤-ឈ្មោះ ភ័ណ្ឌ សំភេទ អាយុ១៥ឆ្នាំ ៥-ឈ្មោះ រិ សារ៉ាក់ ហៅប៉ោត អាយុ១៧ឆ្នាំ និង៦-ឈ្មោះ វ័យ រ៉ាវីន អាយុ២០ឆ្នាំ ។ បើតាមរបាយការណ៍ថា ក្រុមជនអន្ធពាលទាំងនេះ និង បក្សពួកជាច្រើននាក់ទៀត បានប្រើកាំបិត និង ដុំថ្ម តាមកាប់ទៅលើយុវជន០៣នាក់ កាលពីរសៀលថ្ងៃទី១៨ កក្កដា នៅចំណុចតូបលក់ប្រហិតមួយកន្លែង ក្នុងភូមិភ្នំគល់ ឃុំកន្ទឺ២ ស្រុកបាណន់ បណ្ដាលឲ្យយុវជនម្នាក់ ឈ្មោះ ឈាន សាឃីម អាយុ២០ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល រងរបួសចំនួន០៣កាំបិត ខណៈបក្សពួក០២នាក់រត់រួច។
ប៉ុន្តែក្រុមដៃដល់ដែលមានប្សមួយហ្វូង បានប្រើកាំបិតនិងដុំថ្ម កាប់និងគប់ទៅលើម៉ូតូជនរងគ្រោះបណ្ដាលឲ្យខូចខាតយ៉ាងដំណំ។ ក្រោយពេលកើតហេតុ និង ក្រោយពីទទូលបានបណ្ដឹងភាគីរងគ្រោះ លោកស្នងការខេត្ត បានបញ្ជាឲ្យកលោកឈឿង គឹមសុង ដឹកនាំកម្លាំងការិយាល័យព្រហ្មទណ្ឌកំរិតស្រាល ដែលមានការឯកភាពពីលោកព្រះរាជអាជ្ញាផង ចុះធ្វើការស្រាវជ្រាវ រហូតឈានដល់ការឃាត់ខ្លួនបានក្រុមជនដៃដល់បានចំនួន០៦នាក់ជាបន្តបន្ទាប់ នៅល្ងាចថ្ងៃទី១៩ កក្កដា ខណៈបក្សពួកក្រុមនេះជាច្រើននាក់ទៀត កំពុងគេចខ្លួន។
លោក ឈឿង គឹមសុង បាននិយាយថា បើតាមកាស្រាវជ្រាវ ពួកជនទំនើងទាំងនេះមានច្រើនក្រុមណាស់ ហើយពួកគេមានបក្សពួកសម្រាប់ទំនាក់ទំនងគ្នាស្ទើរគ្រប់ស្រុក រាប់ទាំងបណ្ដាស្រុកនានា នៅតាមព្រំដែនផង។ លោកបានបន្តថា បើតាមចម្លើយសារភាពរបស់ក្រុមក្មេងទំនើងខាងលើនេះ គឺពួកគេបានអះអាងថា ពួកគេតាមកាប់ក្រុមជនរងគ្រោះ ដើម្បីសងសឹកគំនុំចាស់ ព្រោះក្រុមជនរងគ្រោះធ្លាប់កាប់កំទេចម៉ូតូពួកខ្លួនមួយគ្រឿងកាលពីលើកមុន។ ប៉ុន្តែភាគីរងគ្រោះបានឆ្លើយតបថា ពួកខ្លួនគ្មានគំនុំអ្វីជាមួយក្រុមក្មេងទំនើងខាងលើនេះទេ ហើយក៏មិនធ្លាប់ស្គាល់គ្នាដែរ ។
យ៉ាងណាក្ដី លោក ឈឿង គឹមសុង បានបញ្ជាក់ថា ជាមួយនឹងការឃាត់ខ្លួនជនអន្ធពាលទាំង០៦នាក់ខាងលើនេះ មន្ត្រីជំនាញបានដកហូតនូវវត្ថុតាងមួយចំនួន ជាពិសេកាំបិតវែងខ្លី ដែលក្រុមជនពាលប្រើដេញកាប់ភាគីរងគ្រោះ។ ក្រុមជនសង្ស័យត្រូវបានបញ្ជូនទៅសាលាដំបូងខេត្តហើយ ដែលពេលនេះតំណាងអយ្យការកពុងបន្តនីតិវិធីសួរនាំនៅឡើយ៕
ចែករំលែកព័តមាននេះ