បើតាមប្រវត្តិសាស្ត្រក៏បានគូសបញ្ជាក់ផងដែរថា ព្រះពុទ្ធសាសនាបានផ្សព្វផ្សាយមកកាន់ដែនដីសុវណ្ណភូមិ តាំងពីព្រះពុទ្ធសករាជ ២៣៤ មកម្ល៉េះ។ នៅក្នុងចំណោមប្រទេសទាំងនោះ ក៏មានប្រទេសកម្ពុជាមួយផងដែរ ដែលទទួលបាននូវឥទ្ធិពលនៃព្រះពុទ្ធសាសនាដ៏ថ្លៃថ្លាជាអនេកអនគ្ឃរកថ្លែងពុំត្រូវទាល់តែសោះនេះ ។
ប្រជាជនទាំងអស់នៃប្រទេសដែលស្ថិតនៅលើដែនដីសុវណ្ណភូមិក៏បានទទួលស្គាល់ថា ព្រះពុទ្ធសាសនាជាសាសនាមួយដែលដឹកនាំសង្គមមនុស្សឲ្យមានសុខសន្តិភាព វិបុលភាព ភាតរភាព សាមគ្គីភាព និងវឌ្ឍនភាពយ៉ាងទូលំទូលាយទូទាំងពិភពលោក ។
អ្នកប្រាជ្ញលើលោកបានប្រសិទ្ធនាមព្រះពុទ្ធសាសនាថាជាជាសាសនាសន្តិភាព និងពោរពេញទៅដោយបញ្ញាញាណដ៏មហាសាល ហេតុដូច្នេះទើបពុទ្ធបរិស័ទសុទ្ធសឹងតែជាអ្នកប្រកបដោយសុទិដ្ឋិនិយម ហេតុផលនិយម កម្មផលនិយម និងភាពប្រាកដនិយមចំពោះទស្សនៈជីវិតនៃមនុស្សជាតិ ដែលជាអ្នករាប់អានព្រះពុទ្ធសាសនា ។
ព្រះពុទ្ធសាសនាមានគុណប្រយោជន៍ធំធេងណាស់ចំពោះសង្គមជាតិតាមរយៈការអប់រំ ការបង្ហាត់បង្រៀន ការសម្តែងធម៌ទេសនាឱ្យមនុស្សយល់ច្បាស់ពីបាប បុណ្យ គុណ ទោស ជាពិសេសឱ្យស្គាល់ពីតម្លៃនៃជីវិត ៕ សាន សារិន
ចែករំលែកព័តមាននេះ