រាជធានីភ្នំពេញ ៖ រាជរដ្ឋាភិបាលចិនបានសម្រេចផ្តល់ជំនួសឥតសំណងចំនួន២,៥លានដុល្លារសហរដ្ឋអាមេរិក ដល់អង្គភាពកំចាត់មីងកម្ពុជា ដើម្បីបោសសំ អាតគ្រាន់មីន និងសំណល់យុទ្ធភណ្ឌពីសង្គ្រាមរយៈពេល១ឆ្នាំ ក្នុងឆ្នាំ២០២២ ។ នេះបើតាមអគ្គនាយកស៊ីម៉ាក់កម្ពុជា ។
លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា ហៅកាត់ថា ស៊ីម៉ាក់បានឲ្យដឹង កាលពីថ្ងៃទី២០ ខែកក្កដា ឆ្នាំ២០២១តាមបណ្តាញសង្គមហ្វេសប៊ុកថា ៖ សូមអបអរសាទរ និងថ្លែងអំណរគុណចំពោះរដ្ឋាភិបាលចិនដែលបានសំរេចផ្តល់ជំនួយឥតសំណងចំនួន២,៥លានដុល្លារ (ពីរលាន៥សែនដុល្លារអាមេរិក)ផ្តល់ជូនរាជរដ្ឋាភិបាលកម្ពុជា ដើម្បីគាំទ្រកិច្ចប្រតិបត្តិការបោសសំអាតគ្រាប់មីន និងសំណល់យុទ្ធភណ្ឌពីសង្គ្រាមរបស់អង្គភាពស៊ីម៉ាក់សម្រាប់រយ:ពេល១២ខែ ឆ្នាំ២០២២ ។
លោកបានលើកឡើងទៀតថា រដ្ឋាភិបាលសាធារណរដ្ឋប្រជាមានិតចិន បានសម្រេចផ្តល់ជំនួយឥតសំណងមានទឹកប្រាក់សរុបចំនួន២,៥លានដុល្លារអាមេរិកជូនដល់រាជរដ្ឋាភិបាលកម្ពុជា តាមរយ:ក្រសួងសេដ្ឋកិច្ច និងហិរញ្ញវត្ថុ ដើម្បីគាំទ្រសកម្មភាពបោសសម្អាតមីន និងសំណល់ជាតិផ្ទុះពីសង្គ្រាមរបស់អង្គភាពស៊ីម៉ាក់ ស្ថិតនៅកងឯកភាពកំចាត់មីនទី៦ ខេត្តព្រះវិហារ ឧត្តរមានជ័យ ស្ទឹងត្រែង និងកងឯកភាពកំចាត់មីនទី៤ ខេត្តសៀមរាប និងខេត្តកំពង់ធំដែលមានកម្លាំងប្រតិបត្តិការសរុបចំនួនជិត៣០០នាក់ ។
លោកអគ្គនាយកបានឲ្យដឹងថវិកាដែលចិនផ្តល់ជូន គឺជាគម្រោងមានរយៈពេល១២ខែ ចាប់ពីខែមករា ដល់ខែធ្នូ ឆ្នាំ២០២២ និងមានផែនការត្រូវរំដោះផ្ទៃដីចំការមីន និងចំការសំណល់ជាតិផ្ទុះពីសង្គ្រាមចំនួនជាង១៧០០ហិកតា និងសកម្មភាពអប់រំយល់ដឹងពីគ្រោះថ្នាក់ដោយសារមីនចំនួន៧ខេត្ត ។
ជាមួយគ្នានោះដែរ លោក ហេង រតនា ក៏បានគូសបញ្ជាក់ពីលទ្ធផលនៃការបោសសំអានមីន ដែលជាចំនួនរបស់រដ្ឋាភិបាលចិននៅឆ្នាំ២០២១ថា « សូមរំលឹកជំរាបជូនថា លទ្ធផលរយ:ពេល៦ខែ ឆ្នាំ២០២១នេះ គម្រោងជំនួយចិនលុបបំបាត់គ្រាប់មីន នៅកម្ពុជា ដែលបានផ្តល់ជំនួយឥតសំណងមានទំហំថវិកាដូច២០២២ដែរនោះ និងបានរំដោះដីចំការមីន/គ្រាប់សំណល់ជាតិផ្ទុះចំនួនជិត១០៨៣ហិចតា រុករកឃើញកម្រេចគ្រាប់មីន និងសំណល់ជាតិផ្ទុះពីសង្គ្រាមចំនួនជាង៥០០០គ្រាប់» ។
ជាមួយគ្នានោះដែរ សូមគោរព និងអរគុណជាអនេកចំពោះសម្តេចតេជោប្រមុខរាជរដ្ឋាភិបាល ដែលបានជំរុញសំណើគាំទ្រថវិកានេះជាមួយប្រធានាធិបតីចិន ហើយជាបន្តបន្ទាប់រដ្ឋាភិបាលចិនបានឆ្លើយតបតាមសំណូមពររបស់សម្តេចតេជោ ។
ក្នុងឱកាសនេះដែរ តាងនាម អង្គភាពស៊ីម៉ាក់ក៏ដូចជាជនរងគ្រោះដោយសារមីន សូមសំដែងនូវការដឹងគុណជូនចំពោះប្រជាជន និងរដ្ឋាភិបាលចិនដែលបានគាំទ្រថវិកាមនុស្សមនុស្សធម៌ដ៏មានសារសំខាន់នេះសម្រាប់ទ្រទ្រង់សកម្មភាពអង្គភាពស៊ីម៉ាក់ក្នុងការរំដោះគ្រាប់មីន និងសំ ណល់យុទ្ធភណ្ឌពីសង្គ្រាមផ្តល់សុខសុវត្ថិភាព និងគាំទ្រការអភិវឌ្ឍនៅកម្ពុជា៕
ចែករំលែកព័តមាននេះ