បុរសមានជំងឺសរសៃប្រសាទម្នាក់ ត្រូវបានសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តពោធិ៍សាត់ ធ្វើការឃាត់ខ្លួន បន្ទាប់ពីបុរសរូបនេះបានវាយសំពងទៅលើកូនប្រុសបង្កើតរបស់ខ្លួនឯង បណ្តាលឲ្យ
ខេត្តពោធិ៍សាត់ ៖ បើតាមសេចក្តីរាយការណ៍បានឱ្យដឹងថា បុរសមានជំងឺសរសៃប្រសាទម្នាក់ ត្រូវបានសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តពោធិ៍សាត់ ធ្វើការឃាត់ខ្លួន បន្ទាប់ពីបុរសរូបនេះបានវាយសំពងទៅលើកូនប្រុសបង្កើតរបស់ខ្លួនឯង បណ្តាលឲ្យស្លា.ប់នៅក្នុងថ្លុកឈា.ម ។ ករណីនេះបង្កឱ្យមានការភ្ញាក់ផ្អើលកាលពីថ្ងៃទី១៩ ខែកក្កដា ឆ្នាំ២០២១ នៅចំណុចផ្ទះជនរងគ្រោះ ស្ថិតក្នុងភូមិអូររការ សង្កាត់ចំរើនផល ក្រុងពោធិ៍សាត់ ខេត្តពោធិ៍សាត់ ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ គឹម ឆេង ភេទប្រុស អាយុ៣០ឆ្នាំ ចំណែកបុរសដែលមានជំងឺ ហើយសំពងកូនប្រុសបង្កើតនោះឈ្មោះ គឹម ហុង ភេទប្រុស អាយុ៦១ឆ្នាំ អ្នកទាំង២នាក់រស់នៅភូមិ-ឃុំកើតហេតុខាងលើ ។
តាមការបំភ្លឺរបស់ឈ្មោះ គឹម ហេង ភេទស្រី អាយុ៣១ឆ្នាំ ត្រូវជាបងស្រីបង្កើតរបស់ជនរងគ្រោះ បានរៀបរាប់អោយដឹងថា ដោយ សារតែឪពុករបស់ខ្លួនមានជំងឺសរសៃប្រសាទប្រចាំកាយ ហើយតែងតែវាយទៅលើប្អូនប្រុសបង្កើត នៅពេលដែលគាត់មានអាការៈជំងឺរើឡើងម្តងៗ តែត្រូវកូនៗឯទៀតជួយឃាត់ទាន់ ។
នារីជាបងស្រីជនរងគ្រោះ បានបន្តថា មុនពេលកើតហេតុ នៅរសៀលថ្ងៃទី១៨ ខែកក្កដានោះ ជនរងគ្រោះ (ប្អូនប្រុស) បានទៅបូមទឹកដាក់ស្រែ លុះពេលល្ងាចក៏នាំមិត្តភក្តិមកផឹកស៊ី រហូតដល់ម៉ោងប្រហែលជា១០យប់ ទើបជនរងគ្រោះបានចូលទៅដេកនៅផ្ទះខាងក្រោយ ។
នារីជាបងស្រីជនរងគ្រោះបន្តទៀតថា ចំណែកឪពុកក៏ដេកនៅក្នុងជង្រុក ដែលមានចម្ងាយពីផ្ទះខាងក្រោយប្រហែល១០ម៉ែត្រ ។ លុះព្រឹកឡើងប្អូនស្រីពៅ បានដើរមកផ្ទះខាងក្រោយ ស្រាប់តែប្រទះឃើញជនរងគ្រោះដេកស្លា.ប់នៅខាងជើងផ្ទះ ដោយមុខមាត់ប្រឡាក់សុទ្ធតែឈា.ម និងបែកក្បាលទៀត ដោយឃើញដូចនេះ ប្អូនស្រីពៅក៏រត់ទៅប្រាប់បងស្រី ហើយផ្តល់ព័ត៌មានជូនសមត្ថកិច្ចតែម្តង ចំណែកឪពុករបស់ខ្លួនក៏សំងំពួនលើជង្រុកផងដែរ ។
លោកឧត្តមសេនីយ៍ត្រី ម៉ូ លីដា ស្នងការរងនគរបាលខេត្តពោធិ៍សាត់ ទទួលផែនការងារនគរបាលព្រហ្មទណ្ឌបានឲ្យដឹងថា ក្រោយពីទទួលបានព័ត៌មាននេះភ្លាម កម្លាំងប៉ុស្តិ៍នគរបាលរដ្ឋបាលចំរើនផលនិងកម្លាំងជំនាញព្រហ្មទណ្ឌ ដឹកនាំដោយលោក កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ធ្វើការហ៊ុមព័ទ្ធកន្លែងកើតហេតុ និងបានឃាត់ខ្លួនជនសង្ស័យឈ្មោះ គឹម ហុង ភេទប្រុស អាយុ៦១ឆ្នាំ ត្រូវជាឪពុកបង្កើតរបស់ជនរងគ្រោះ យកមកកាន់ការិយាល័យព្រហ្មទណ្ឌ ដើម្បីកសាងសំណុំរឿងតាមនីតិវិធីតែម្តង។
ចំណែកឯជនរងគ្រោះមានឈ្មោះ គឹម ឆេង ភេទប្រុស អាយុ៣០ឆ្នាំ ក្រោយពីពិនិត្យ និងធ្វើកោសល្យវិច្ច័យរួចហើយ សមត្ថកិច្ចបានប្រគល់ស.ពឲ្យទៅក្រុមគ្រួសារយកធ្វើបុណ្យតាមប្រពៃណី៕
ចែករំលែកព័តមាននេះ