ខេត្តសៀមរាប ៖ សមត្ថកិច្ចនគរបាលស្រុកស្វាយលើ បានចុះស្រាវជ្រាវ រហូតឈានដល់ធ្វើការឃាត់ខ្លួនប្រុសស្រីចំនួន០២នាក់ ពីបទធ្វើចរាចរណ៍ក្រដាសប្រាក់រៀលក្លែងក្លាយ បន្ទាប់ពីទទួលបានពាក្យបណ្តឹងរបស់ប្រជាពលរដ្ឋ។ ហេតុការណ៍ឃាត់ខ្លួនប្រុសស្រី២នាក់នេះធ្វើឡើងនៅវេលាម៉ោង២និង៣០នាទីរសៀល ថ្ងៃទី១៩ ខែកក្កដា ឆ្នាំ២០២១ ស្ថិតនៅក្នុងភូមិសាស្ត្រ ស្រុកស្វាយលើ ខេត្តសៀមរាប។
បើតាមប្រភពពីសមត្ថកិច្ចនគរបាលស្រុកស្វាយលើ បានប្រាប់ដឹងនៅព្រឹកថ្ងៃទី២០ ខែកក្កដា ឆ្នាំ២០២១ នេះថា ក្រោយពីទទួលពាក្យបណ្តឹងពីប្រជាពលរដ្ឋ សមត្ថកិច្ចយើងបានចុះធ្ចើការស្រាវជ្រាវ រហូតឈានដល់ការឃាត់ខ្លួនបានប្រុសស្រី២នាក់ និងវត្ថុតាង យកសួរនាំនៅអធិការដ្ឋាននគរបាលស្រុក ដើម្បីរៀបចំកសាងសំណុំបញ្ជូនទៅតុលាការខេត្ត។
ប្រភពដដែលបានបញ្ជាក់ថា ជនសង្ស័យប្រុសស្រីទាំង២នាក់ខាងលើនេះ មាន ៖ ១-ឈ្មោះ រ៉េត ពន្លក ភេទប្រុស អាយុ៣១ឆ្នាំ រស់នៅភូមិបាខម ឃុំសំពងជ័យ ស្រុកជើងព្រៃ ខេត្តកំពង់ចាម និង២-ឈ្មោះ លឹម ឡៃហ៊ាង ភេទស្រី អាយុ២៦ឆ្នាំ ទីលំនៅភូមិបាខម ឃុំសំពងជៃ ស្រុកជើងព្រៃខេត្តកំពង់ចាម ។ ពាក់ព័ន្ធនឹងករណីធ្វើចរាចរណ៍នូវរូបិយវត្ថុ និងរូបិយបណ្ណក្លែងក្លាយ កាលពីវេលាម៉ោង១និង៣០នាទី រសៀល ថ្ងៃទី១៩ ខែកក្កដា ឆ្នាំ២០២១។
ក្រោយសួរនាំរួច ជនសង្ស័យទាំង០២នាក់បានសារភាពថា ពួកខ្លួនពិតជាបានធ្វើសកម្មភាពជិះម៉ូតូពីខេត្តព្រះវិហារ មកកាន់ខេត្តសៀមរាប រួចឆ្លងកាត់តាមផ្លូវជាតិលេខ៦៤ ដោយនាំយកក្រដាសប្រាក់ ក្លែងក្លាយ (ក្រដាសប្រាក់៥០០០០រៀល និង១០០០០រៀល) មកចាយនៅក្នុងភូមិសាស្ត្រឃុំស្វាយលើ នេះពិតប្រាកដមែន។
ប្រភពដដែលបានបញ្ជាក់ទៀតថា បន្ទាប់ពីឃាត់ខ្លួន កម្លាំងជំនាញបានឆែកឆេរនៅក្នុងកាបូបជនសង្ស័យ ហើយក៏រកឃើញក្រដាសប្រាក់ក្លែងក្លាយចំនួន ១៥, ៧០០,០០០រៀល (ដប់ប្រាំលានប្រាំពីរសែនរៀល) ក្នុងនោះក្រដាស៥០០០០រៀល ចំនួន១៣, ៩០០,០០០រៀល (ដប់បីលានប្រាំបួនសែនរៀល) ក្រដាស១០០០០រៀល ចំនួន១,៨០០,០០០រៀល (មួយលានប្រាំបីសែនរៀល) និងប្រាក់រៀល (ប្រាក់សុទ្ធ) មួយចំនួនទៀតផងដែរ។
ក្រៅពីនោះ សមត្ថកិច្ចក៏រកឃើញមានអត្តសញ្ញាណប័ណ្ណ កាតធនាគារ ប័ណ្ណបើកបរ ទូរស័ព្ទដៃ កាតទូរស័ព្ទ Metfone និងកាតទូរស័ព្ទ Smart មួយចំនួនទៀត។ ហើយបច្ចុប្បន្នជនសង្ស័យប្រុសស្រីទាំង ០២នាក់នេះ ត្រូវបានកម្លាំងការិយាល័យជំនាញ រៀបចំកសាងសំណុំរឿងតាមនីតិវិធីច្បាប់ហើយ៕
ចែករំលែកព័តមាននេះ