អគ្គលេខាធិការជនភៀសខ្លួននៃអង្គការសហប្រជាជាតិ(UNGCR) បានថ្លែងកាលពីថ្ងៃទី១៥ ធ្នូ ២០១៥ ថា បានទទួលការបរិច្ចាគប្រាក់ឧបត្ថម្ភពីអន្តរជាតិច្រើនជាង៦៨៧,២លានដុល្លារ ដើម្បីផ្តល់ទីជម្រកផ្នែកមនុស្សធម៌
អគ្គលេខាធិការជនភៀសខ្លួននៃអង្គការសហប្រជាជាតិ(UNGCR) បានថ្លែងកាលពីថ្ងៃទី១៥ ធ្នូ ២០១៥ ថា បានទទួលការបរិច្ចាគប្រាក់ឧបត្ថម្ភពីអន្តរជាតិច្រើនជាង៦៨៧,២លានដុល្លារ ដើម្បីផ្តល់ទីជម្រកផ្នែកមនុស្សធម៌ដល់ជនភៀសខ្លួននៅទូទាំងពិភពលោកដោយរំពឹងថាអាចមានចំនួនដល់ទៅ៦០លាននាក់នៅក្នុងឆ្នាំ២០១៦ និងចាត់ទុកថាជាប្រាក់បរិច្ចាគខ្ពស់បំផុតជាប្រវត្តិសាស្ត្រ ។
នៅក្នុងសេចក្តីថ្លែងការណ៍របស់អគ្គលេខាធិការជនភៀសខ្លួននៃអង្គការសហប្រជាជាតិបង្ហាញថា ការផ្តល់កិច្ចសន្យាពីបណ្តាប្រទេសបរិច្ចាគនោះបានកើតឡើងក្នុងកិច្ចប្រជុំថ្នាក់អន្តរជាតិដែលរៀបចំនៅក្រុងហ្សឺណែវ ប្រទេសស្វ៊ីស កាលពីពេល ថ្មីៗកន្លងមក ។ ប្រាក់បរិច្ចាគនោះនឹងបែងចែកសម្រាប់ប្រើប្រាស់យ៉ាងមានប្រសិទ្ធភាពដើម្បីទប់ទល់នឹងស្ថានការណ៍បន្ទាន់មួយលើជនភៀសខ្លួននៅតាមតំបន់ជាច្រើននៅលើពិភពលោករួមមានស៊ីរី, ស៊ូដង់ខាងត្បូង, អាហ្វ្រិកកណ្តាល, នីហ្សេរីយ៉ា, ប៊ូរុនឌី និងយេមែន រួមទាំងវិបត្តិនៃលំហូរដ៏លើសលុបរបស់ជនភៀសខ្លួននៅទ្វីបអឺរ៉ុប ។
លោកអាន់តូនីញូ៉ ហ្គូតេរ៉េស អគ្គលេខាធិការដើម្បីជនភៀសខ្លួន នៃអង្គការសហប្រជាជាតិបានថ្លែងអំណរគុណដល់បណ្តាប្រទេសដែលបរិច្ចាគ ប៉ុន្តែបានបញ្ជាក់ថា មានគម្លាតឆ្ងាយរវាងការជួយសង្គ្រោះដែលចាំបាច់សម្រាប់ជនភៀសខ្លួន និងធនធានដែលមានសម្រាប់ការជួយសង្គ្រោះ ។ កាលពីឆ្នាំ២០១៥ ចំនួនប្រាក់បរិច្ចាគពីអន្តរជាតិដល់ UNHCR មានច្រើនជាង៥០០លានដុល្លារ និងស្ទើរតែទាំងអស់ជាប្រាក់បរិច្ចាគពីរដ្ឋាភិបាលរបស់ប្រទេស ផ្សេងៗ រួមទាំងពីឯកជនផងដែរ ៕
ចែករំលែកព័តមាននេះ