សំរាមក្បែរស្ពាន១កន្លែងក្នុងក្រុងប៉ៃលិន កំពុងជះក្លិនស្អុយអសោចិ៍ដល់អ្នកដំណើរ
- ប៉ៃលិន
ខេត្តប៉ៃលិន ៖ មកទល់ពេលនេះ គេសង្កេតឃើញគំនរសំរាមដ៏ច្រើន ដែលកំពុងរាយប៉ាយនៅលើចិញ្ចើមផ្លូវក្បែរគល់ស្ពានថ្មមួយ
ខេត្តប៉ៃលិន ៖ មកទល់ពេលនេះ គេសង្កេតឃើញគំនរសំរាមដ៏ច្រើន ដែលកំពុងរាយប៉ាយនៅលើចិញ្ចើមផ្លូវក្បែរគល់ស្ពានថ្មមួយកន្លែង ស្ថិតក្នុងភូមិបរឌិននៀវ សង្កាត់ប៉ៃលិន ក្រុងប៉ៃលិន ខេត្តប៉ៃលិន បង្កផលប៉ះពាល់ដល់សុខភាពផ្លូវដង្ហូម និងបរិស្ថាន ហើយក៏ធ្វើឱ្យប្រជាពលរដ្ឋដែលឆ្លងកាត់ចេញចូលទៅមក ធ្វើការរិះគន់ទៅលើអាជ្ញាធរក្រុងប៉ៃលិនថា គ្មានចំណាត់ការបណ្តែតបណ្តោយឱ្យបោះចោលពាសវាលពាសកាល ។
ទោះបីជាមានខាងក្រុមអនាម័យប្រមូលសំរាមខេត្តប៉ៃលិន ធ្លាប់យករថយន្តទៅដឹកជាច្រើនលើកច្រើនសារ ថែមទាំងរាយការណ៍ ជូនខាងមន្ទីរជំនាញបរិស្ថានខេត្ត និងអភិបាលក្រុងប៉ៃលិន ដើម្បីធ្វើយ៉ាងណាឱ្យស្រឡះល្អ កុំឱ្យបន្តបោះចោលបែបនេះទៀត ។ តែរហូតមកដល់ថ្ងៃទី១៩ ខែកក្កដា ឆ្នាំ២០២១នេះ ប្រជាពលរដ្ឋនៅបន្តបោះចោលសំរាមយ៉ាងអនាធិបតេយ្យពាសវាលពាសកាល ដោយគេមិនទាន់ឃើញខាងអាជ្ញាធរក្រុង មានចំណាត់ការបញ្ហាសំរាមនេះនៅឡើយទេ ។
ប្រជាពលរដ្ឋរស់នៅក្នុងក្រុងប៉ៃលិនបានធ្វើការរិះគន់ដល់អាជ្ញាធរក្រុងថា សំរាមជាច្រើនដែលប្រជាពលរដ្ឋយកទៅបោះចោលរាយប៉ាយទាំងនោះ មានដូចជា សំបកបន្លែ ឆ្អឹងត្រី ស្រកាត្រី សំបកពងមាន់ ពងទា ដែលគេច្រកចូលក្នុងការ៉ុង លួចយកទៅបោះចោលក្បែរចិញ្ចើមផ្លូវ ពីមួយថ្ងៃទៅមួយថ្ងៃ បណ្តាលឱ្យក្លាយជាគំនរធំឡើងៗ ហៀរមកដល់ផ្លូវ ធ្វើឱ្យស្អុយរលួយជះក្លិនស្អុយអាសោចិ៍ បង្កផលប៉ះពាល់ដល់សុខភាពផ្លូវដង្ហើម ។ តាមប្រភពព័ត៌មានបានបន្តទៀតថា គេមិនឃើញមានអាជ្ញាធរក្រុងប៉ៃលិន និង មន្ត្រីជំនាញបរិស្ថាន ចុះទៅចាត់ការបញ្ហាសំរាមខាងលើនេះទេ ។
ពាក់ព័ន្ធនឹងបញ្ហាខាងលើនេះដែរ លោក ស៊ុន យី អភិបាលក្រុងប៉ៃលិន បានឱ្យដឹងថា ៖ ខាងលោកធ្លាប់ បានឱ្យក្រុមការងារចុះទៅសម្អាតនៅកន្លែងចាក់សំរាមអនាធិបតេយ្យខាងលើដែរ តែក្រោយមកប្រជាពលរដ្ឋលួចយកទៅបោះចោលបន្តទៀត ។ តែក្រោយពីទទួលដំណឹងខាងលើនេះរួច ខាងលោកនឹងឱ្យមន្ត្រីក្រោមឱវាទចុះទៅពិនិត្យម្តងទៀត និងរៀបចំឱ្យបានស្អាតបាត ។ លោកបញ្ជាក់ថា ខាងក្រុងធ្លាប់ដាក់ស្លាកហាមឃាត់មិនឱ្យយកសំរាមទៅបោះចោលបែបនេះដែរ នៅតែមានជនខិលខូចបាននាំគ្នាដកស្លាកនោះបោះចោលទៀត ៕
ចែករំលែកព័តមាននេះ