អតីតតារាសម្តែង និងពិធីការិនីស្ថានីយទូរទស្សន៍បាយ័នអ្នកនាង ស៊ឹម សូលិកា កំពុងមានការព្រួយបារម្ភយ៉ាងខ្លាំង ក្រោយពេលដែលក្រុមកាងារដែលបានធ្វើការនៅស្ទីឌីយោលថតរួមគ្នាម្នាក់មានផ្ទុកជំងឺកូវីដ១៩។ អ្នកនាងកំពុងភ័យបុកពោះពីការឆ្លងបន្តនូវមេរោគដ៏កាចសា.ហាវមួយនេះ
រាជធានីភ្នំពេញ ៖ អតីតតារាសម្តែង និងពិធីការិនីស្ថានីយទូរទស្សន៍បាយ័នអ្នកនាង ស៊ឹម សូលិកា កំពុងមានការព្រួយបារម្ភយ៉ាងខ្លាំង ក្រោយពេលដែលក្រុមកាងារដែលបានធ្វើការនៅស្ទីឌីយោលថតរួមគ្នាម្នាក់មានផ្ទុកជំងឺកូវីដ១៩។ អ្នកនាងកំពុងភ័យបុកពោះពីការឆ្លងបន្តនូវមេរោគដ៏កាចសា.ហាវមួយនេះ ត្បិតវាជាហានិភ័យមួយសម្រាប់គ្រួសារ និងម្តាយដែលមានវ័យចាស់ និងមានជំងឺប្រចាំកាយដែលកំពុងស្នាក់នៅជាមួយគ្នា។
អ្នកនាង ស៊ឹម សូលិកា បានបង្ហោះតាមគណនេយ្យហ្វេសប៊ុករបស់ខ្លួនថា «ខ្ញុំតែងតែគោរពតាមការណែនាំរបស់ក្រសួងសុខាភិបាល និងចូលរួម «៣ការពារ ៣កុំ» តាមប្រសាសន៍របស់សម្ដេចតេជោ នាយករដ្ឋមមន្ត្រីនៃព្រះរាជាណាចក្រកម្ពុជា«។ នាងថា «ខ្ញុំពិតជាមិនចង់រុកច្រមុះបែបនេះទេ ខ្ញុំខ្លាចណាស់ ខ្លាចឆ្លង COVID-19 ខ្លាចបន្តការចម្លងដល់គ្រួសាររបស់ខ្ញុំ ជាពិសេសម្ដាយវ័យចាស់នៅផ្ទះដែលមានជំងឺស្រាប់ផង ខ្ញុំរឹតតែមិនចង់ផ្ដល់បន្ទុកលំបាកបន្ថែមដល់ថ្នាក់ដឹកនាំប្រទេសនោះទេ»។
នាងបញ្ជាក់ថា «ខ្ញុំបានធ្វើការនៅក្នុងបន្ទប់ស្ទូឌីយោម៉ាស៊ីនត្រជាក់បិទជិតជាច្រើនម៉ោង អ្វីដែលសំខាន់ ហើយខ្ញុំបារម្ភខ្លាចបំផុតនោះ គឺភ្ញៀវដែលមកចូលរួមទាំងអស់ត្រូវបានអ្នកផលិតកម្មវិធីមិនអោយពួកគេពាក់ម៉ាស់នោះទេ តើអ្នកណាអាចទទួលខុសត្រូវចំពោះរឿងនេះ??? តើការដកដង្ហើមនៅក្នុងបន្ទប់ស្ទូឌីយោរយ:ពេលជាច្រើនម៉ោង ហើយមានមនុស្សច្រើនមកពីគ្រប់ទិសទីបែបនេះ? ហេតុអីក៏អស់លោកអ្នកនៅតែបំពានហ៊ានតតាំងជាមួយមេរោគ COVID-19 បែបនេះ???»។
នាងបន្ថែមថា «ខ្ញុំនិងក្រុមការងារមួយចំនួនភ័យខ្លាចណាស់ ពេលជួបមនុស្សដែលមិនពាក់ម៉ាស់ មកឈរនិយាយនៅក្បែរ តែគ្មានជម្រើសទេ» ។
បើតាមអ្នកនាង ស៊ឹម សូលិកា ថា «ជាការពិតណាស់មួយថ្ងៃកន្លង មនុស្សដែលបានរួមការងារនៅក្នុងបន្ទប់ស្ទូឌីយោនោះមានវិជ្ជមានកូវីដ-១៩ ហើយបានរកឃើញជាបន្តបន្ទាប់ បើសិនជាខ្ញុំបានដឹងមុន ខ្ញុំប្រាកដជាមិនហ៊ានទៅធ្វើការទេ តែពួកយើងសុទ្ធតែមិនដឹងដូចគ្នា សូម្បីតែអ្នកដែលបានរកឃើញថា មានផ្ទុកមេរោគក៏គាត់ស្មានមិនដល់ថា គាត់មានឆ្លងមេរោគនោះឡើយ។ ដូច្នេះនាងខ្ញុំ សូមជម្រាបដំណឹងនេះ ទៅដល់មិត្តសិល្បករទាំងអស់ដែលមកច្រៀងនៅក្នុងកម្មវិធីកាលពីថ្ងៃ ១៣/១៤ កក្កដា ២០២១ កន្លងទៅ មេត្តាជ្រាបជាដំណឹងផង» ។
យ៉ាងណាក៏ដោយ បន្ទាប់ពីបានទទួលដំណឹងនេះ អ្នកនាង ស៊ឹម សូលិកា ក៏ធ្វើតេស្តសំណាកដោយខ្លួនឯង ដោយលទ្ធផលលើកទី១ គឺអវិជ្ជមាន។ នេះបើយោងតាមរូបភាពដែលអ្នកនាងបានបង្ហោះតាមបណ្តាញសង្គមហ្វេសប៊ុកកាលពីថ្ងៃទី១៨ ខែកក្កដា ឆ្នាំ២០២១នេះ ៕
ចែករំលែកព័តមាននេះ