ជនជាតិចិនប្រុសស្រីចំនួន៨៧នាក់ ត្រូវបានកម្លាំងសមត្ថកិច្ចចំរុះនៃស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួន បន្ទាប់ពីឆ្មក់ចុះបង្ក្រាបក្លឹបកម្សាន្តលួចលាក់បើកដំណើរការនៅក្នុងអគារដែលកំពុងតែជួសជុលមានយីហោមួយកន្លែង កាលពី
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនជាតិចិនប្រុសស្រីចំនួន៨៧នាក់ ត្រូវបានកម្លាំងសមត្ថកិច្ចចំរុះនៃស្នងការដ្ឋាននគរបាលរាជធានីភ្នំពេញ ធ្វើការឃាត់ខ្លួន បន្ទាប់ពីឆ្មក់ចុះបង្ក្រាបក្លឹបកម្សាន្តលួចលាក់បើកដំណើរការនៅក្នុងអគារដែលកំពុងតែជួសជុលមានយីហោមួយកន្លែង កាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី១៩ ខែកក្កដា ឆ្នាំ២០២១ ត្រង់ចំណុចក្បែរខាងក្រោយអតីតក្លឹបកម្សាន្ត X2 តាមបណ្តោយផ្លូវ៥៥កែងនឹងផ្លូវ២២២ ស្ថិតក្នុងសង្កាត់បឹងរាំង ខណ្ឌដូនពេញ។
សេចក្តីរាយការណ៍បន្តថា ប្រតិបត្តិការចុះបង្ក្រាបខាងលើនេះ ធ្វើឡើងដោយមានការដឹកនាំកម្លាំងដោយលោកឧត្តមសេនីយ៍ត្រី តឹង សុធី ស្នងការរងនគរបាលរាជធានីភ្នំពេញ ទទួលដឹកនាំកម្លាំងអន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ ហៅកាត់ ( SDU ) និងមានការចូលរួមពីសំណាក់កម្លាំងការិយាល័យព្រហ្មទណ្ឌកំរិតស្រាល និងកម្លាំងការិយាល័យអន្តោប្រវេសន៍ បានធ្វើការចុះបង្ក្រាបជាក់ស្ដែងនៅត្រង់ចំណុចកើតហេតុ ដែលជាអគារកំពុងធ្វើការជួសជុលមានកំពស់១២ជាន់ ហើយនៅជាន់ទី៦ នៃអគារនោះជាកន្លែងលួចលាក់បើកក្លឹបកម្សាន្ត និងប្រើប្រាស់ថ្នាំញៀនជាប្រភេទថ្នាំក្រវីទៀតផង។ នៅជាន់ទី៦នោះផងដែរ ត្រូវកម្លាំងសមត្ថកិច្ចបានរកឃើញបន្ទប់ធំៗចំនួន៣បន្ទប់ ដែលរៀបចំជាប្រភេទជាក្លឹបកម្សាន្ត និងមានជនជាតិចិនប្រុសស្រីជាច្រើននាក់ បានទៅកំសាន្តនៅខាងក្នុងទៀតផង។
គួរបញ្ជាក់ថា ក្នុងរង្វង់ប្រតិបត្តិការចុះបង្ក្រាបខាងលើនេះ គឺប្រើអស់រយៈពេលជាង៣ម៉ោង ហើយជាលទ្ធផល គឺកម្លាំងសមត្ថកិច្ចបានធ្វើការឃាត់ខ្លួនជនជាតិចិនប្រុសស្រីសរុបចំនួន៨៧នាក់ ក្នុងនោះមានស្រីចំនួន៣៤នាក់ និងដកហូតទូរដែកចំនួនមួយ, ម្សៅ.សសង្ស័យជាសារធាតុញៀនមួយចំនួនតូច, រថយន្តជាច្រើនគ្រឿង រួមទាំងវត្ថុតាំងជាច្រើនផ្សេងទៀត។
បច្ចុប្បន្ន ជនជាតិចិនទាំង៨៧នាក់ខាងលើនោះ រួមទាំងវត្ថុតាំង ត្រូវបានសមត្ថកិច្ចដឹកបញ្ជូនតាមរថយន្តក្រុង ទៅកាន់ស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើការចាត់ការទៅតាមនីតិវិធីជាបន្តទៀតនៅពេលក្រោយ៕
ចែករំលែកព័តមាននេះ