ខេត្តកំពង់ឆ្នាំង ៖ ប្រជាពលរដ្ឋម្នាក់បានទៅដាក់លបចាប់ត្រីធម្មតានៅក្នុងបឹងខ្នា ស្ថិតនៅជាប់ពីខាងក្រោយសាលាស្រុកបរិបូរណ៌ ស្រាប់តែព្រឹកឡើងពេលទៅលើកលប បែរជាជាប់កូនក្រពើ១ក្បាល បណ្តាលឱ្យមានការភ្ញាក់ផ្អើលទាំងព្រឹក ហេតុការណ៍នេះបានកើតឡើងនៅព្រឹក ថ្ងៃទី១៩ កក្កដា…
ខេត្តកំពង់ឆ្នាំង ៖ ប្រជាពលរដ្ឋម្នាក់បានទៅដាក់លបចាប់ត្រីធម្មតានៅក្នុងបឹងខ្នា ស្ថិតនៅជាប់ពីខាងក្រោយសាលាស្រុកបរិបូរណ៌ ស្រាប់តែព្រឹកឡើងពេលទៅលើកលប បែរជាជាប់កូនក្រពើ១ក្បាល បណ្តាលឱ្យមានការភ្ញាក់ផ្អើលទាំងព្រឹក ហេតុការណ៍នេះបានកើតឡើងនៅព្រឹក ថ្ងៃទី១៩ កក្កដា ឆ្នាំ២០២១ ដោយខ្លះបានលើកឡើងថា៖ អាចរួចពីកន្លែងចិញ្ចឹមក្រពើណាមួយ តែខ្លះទៀតថា នៅម្តុំនេះគ្មានអ្នកចិញ្ចឹមក្រពើទេ សង្ស័យមានមេក្រពើក្នុងបឹងនេះហើយ ទើបមានកូនបែបនេះ ។
បុរសម្នាក់ឈ្មោះ សារីម ហៅភ្នំ មានទីលំនៅជាប់មាត់បឹងខា្ន ក្រោយសាលាស្រុកបរិបូរណ៌បានឱ្យថា គាត់រស់នៅទីនេះយូរមកហើយ ដោយតែងតែដាក់មងចងសន្ទូច និងដាក់លបក្នុងបឹងខ្នានេះ ដើម្បីចាប់ត្រីធ្វើម្ហូបជាលក្ខណៈគ្រួសារ ។ ស្រាប់តែនៅព្រឹកនេះ ពេលទៅលើកលប ស្រាប់តែឃើញកូនក្រពើ១ក្បាល ចូលលបរបស់គាត់ ។ កូនក្រពើនោះមានប្រវែងប្រមាណជាង៤តឹក មានទំហំប៉ុនកំភួនដៃមនុស្សចាស់ ។
ចំណែកស្ត្រីជាប្រពន្ឋរបស់បុរសដាក់លបបានក្រពើបានប្រាប់ថា ពេលយប់ខ្លះបានឮសន្ឋឹកក្នុងបឹងនោះ ដូចត្រីត្របាក់នុយ លុះដល់ឃើញមានកូនក្រពើបែបនេះ គាត់សង្ស័យថា៖ មិនមែនត្រីចាប់នុយទេ គឺមេក្រពើតែម្តង ព្រោះឃើញមានកូនក្នុងបឹងបែបនេះ ។ នៅម្តុំនេះ ក៏គ្មាននរណាចិញ្ជឹមក្រពើដែរ បឹងនេះខែប្រាំង ថ្វីបើរីងមែន ប៉ុន្តែមានកំពោតធំមួយ ឬខ្លះហៅពើក មានដើមឈើដុះពីលើនៅចំកណ្តាលបឹង ចំណែកពីក្រោមពើក មានទឹក និងរន្ឋ សង្ស័យតែមេ ក្រពើសម្ងំកើតកូនចៅក្នុងរន្ឋនោះហើយ ពួកគាត់ជាប្រជាពលរដ្ឋ រស់ជុំវិញបឹង និងអាស្រ័យផលក្នុងបឹងនេះព្រួយបារម្ភខ្លាំងណាស់ ពេលឃើញមានចាប់កូនក្រពើពីបឹងបែបនេះ ។
ដោយឡែក លោកផល ភាព អភិបាលរង ស្រុកបរិបរណ៌ បានបញ្ជាក់ថា៖ បឹងខ្នាជាបឹងមួយមិនជ្រៅប៉ុន្មានទេ ខែប្រាំងទឹករីងអស់ សល់តែពើកមួយកន្លែង មានដើមឈើដុះពីលើ ហើយទឹកនៅទីនោះមិនដាច់ទេ និងមានជម្រៅជ្រៅ ។ ថ្វីបើបឹងនេះធំ តែរាក់ មានប្រជាពលរដ្ឋដែលរស់ជុំវិញមាត់បឹង ខ្លះធ្វើផ្ទះពីលើមាត់បឹងរស់នៅ និងចោលកាកសំណល់ចូលបឹងទៀតផង ។ ប៉ុន្តែបឹងនេះ ពេលខែវស្សាមានត្រីសំបូរគ្រាន់បើ ប្រជាពលរដ្ឋរស់នៅម្តុំជុំវិញមាត់បឹង តែងនេសាទ ដាក់មង ចងសន្ទូច និងដាក់លប ជាលក្ខណៈគ្រួសារ ហើយមានខ្លះ ក៏ឈានដល់យកទៅលក់ទៀតផង ។ សម្រាប់ការដាក់លប ចូលកូនក្រពើ១ក្បាលនេះ គាត់ក៍សង្ស័យថា៖ មានមេក្រពើក្នុងបឹងនេះដែរ ។
ហេតុនេះហើយ សូមបងប្អូន ដែលរស់នៅជុំវិញបឹង ក្រោយសាលាស្រុកបរិបូរណ៌ សូមមានការប្រុងប្រយ័ត្នផង ក្រែងមានមេក្រពើ ដូចការស្មានមែនទៅ គឺការពារប្រសើរជាងព្យាបាល ៕
ចែករំលែកព័តមាននេះ