- ភ្នំពេញ
ភ្នំពេញ៖ អត្រានៃការឆ្លងកូវីដ១៩ នៅកម្ពុជាយើង មិនថមថយឡើង។ មួយថ្ងៃៗ មានឆ្លងថ្មីជិត ១០០០នាក់ ហើយអ្នកស្លាប់ មានចាប់ពីជាង ២០នាក់…
ភ្នំពេញ៖ អត្រានៃការឆ្លងកូវីដ១៩ នៅកម្ពុជាយើង មិនថមថយឡើង។ មួយថ្ងៃៗ មានឆ្លងថ្មីជិត ១០០០នាក់ ហើយអ្នកស្លាប់ មានចាប់ពីជាង ២០នាក់…
ភ្នំពេញ៖ អត្រានៃការឆ្លងកូវីដ១៩ នៅកម្ពុជាយើង មិនថមថយឡើង។ មួយថ្ងៃៗ មានឆ្លងថ្មីជិត ១០០០នាក់ ហើយអ្នកស្លាប់ មានចាប់ពីជាង ២០នាក់ ទៅជាង ៣០នាក់ រៀងរាល់ថ្ងៃ។ តើការបន្តឆ្លងរាប់រយនាក់រៀងរាល់ថ្ងៃនេះ មកពីមូលហេតុអ្វី?
បើគិតត្រឹមថ្ងៃទី១៨កក្កដា នៅទូទាំងប្រទេស មានករណីឆ្លងកូវីដ សរុប ៦៧១៨១នាក់ ជាសះស្បើយ ៥៨៩៣០នាក់ និងករណីស្លាប់សរុប កើនឡើងដល់ ១១០៦នាក់ហើយ។
ពាក់ព័ន្ធនឹងបញ្ហាកូវីដ១៩ នៅប្រទេសយើងសព្វថ្ងៃនេះ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្នុងក្របខណ្ឌទូទាំងប្រទេស កាលពីថ្ងៃសៅរ៍ចុងសប្តាហ៍ បានប្រកាសអំពាវនាវថា យើងកំពុងតែប្រឈមទៅនឹងការដើរហួសបន្ទាត់ក្រហម ប្រសិនបើបុគ្គល និងគ្រួសារ នៅតែមិនយកចិត្តទុកដាក់ ទទួលខុសត្រូវរៀងៗខ្លួន ក្នុងការការពារទេនោះ។
លោកស្រី ឱ វណ្ណឌីន បានលើកឡើងនូវការបារម្ភ និងសុំឱ្យបងប្អូនយើង ងាកមករកការការពាររៀងៗខ្លួន ឱ្យបានហ្មត់ចត់ឡើងវិញ កុំបន្ធូរបន្ថយឱ្យសោះ បើយើងមិនចង់ឃើញសោកនាដកម្មសុខភាពសាធារណ: ដែលវាអាច នឹងទៅហួសបន្ទាត់ក្រហមនោះទេ។
ក្នុងសង្គមយើងសព្វថ្ងៃ មិនថា នៅភ្នំពេញ ឬនៅតាមបណ្តាខេត្តនានាទេ ប្រជាពលរដ្ឋយើងមួយចំនួន នៅបន្តដើរលេង នៅបន្តជួបជុំ បន្តផឹកស៊ី មិនថា តាមហាង ឬតាមផ្ទះនោះទេ ពិសេសអ្នកនៅផ្ទះជួល។ ល្ងាចមិនទាន់ ពិសេសនៅថ្ងៃសៅរ៍-អាទិត្យ ឬថ្ងៃបុណ្យឈប់សម្រាក គឺក្រុមអ្នកចូលចិត្តជួបផឹកស៊ីនេះ វាតវង់ ជួបគ្នាផឹក ហើយត្រូវឥឡូវ មានធុងប៉ាស់ អាចច្រៀងបានទៀតនោះ គឺផឹ៏កផង ច្រៀងផង រាំផង ដោយមិនខ្វល់ និងហាក់មិនខ្លាចឆ្លងកូវីដអ្វីទាល់តែសោះ។
ងាកទៅមើលតាមស្រុកភូមិវិញ ក៏មិនខុសគ្នាពីអ្នកចូលចិត្តជួបជុំផឹកស៊ីនៅភ្នំពេញប៉ុន្មានឡើយ។ ប្រជាពលរដ្ឋ យើងដោយច្រើន ហាក់ដូចជាការប្រុងប្រយ័ត្ន និងកិច្ចការពារកុំឲ្យឆ្លងកូវីដ នៅមានកម្រិតនៅឡើយ។ ករណី ជាក់ស្តែង នៅតំបន់ផ្សារអ្នកលឿងត្រើយខាងកើត ក្នុងទឹកដីស្រុកពាមរក៍ ខេត្តព្រៃវែង ក្នុងរយៈពេលប៉ុន្មានថ្ងៃនេះ កូវីដឆ្លងខ្លាំង។ តែនៅតែមានអ្នកភូមិខ្លះ ជួបជុំគ្នា សូម្បីតែស្ត្រីគ្រប់ខែឆ្លងទន្លេ ក៏ធ្វេសប្រហែស រហូតឆ្លងកូវីដនឹងគេដែរ។
ដោយសារតែការធ្វេសប្រហែស នៅតែបន្តជួបជុំពីផ្ទះមួយទៅផ្ទះមួយនេះហើយ ទើបលទ្ធផលស្ត្រីមានផ្ទៃពោះ ដែលត្រូវឆ្លងទន្លេម្នាក់ បានឆ្លងកូវីដ។ ស្ត្រីរូបនេះ ត្រូវបានធ្វើតេស្ត រកឃើញឆ្លងកូវីដ នៅពេលទៅពេទ្យ នៅអ្នកលឿង ដើម្បីឆ្លងទន្លេ ដោយវះកាត់។ ប៉ុន្តែពេទ្យនោះ តម្រូវឲ្យធ្វើតេស្តរហ័ស រកមេរោគកូវីដ១៩ ជាមុនសិន។
ករណីដដែលនេះ លុះធ្វើតេស្ត រកឃើញថា ស្ត្រីពោះធំនោះ ឆ្លងកូវីដហើយ បែរជាពេទ្យ ដែលបានធ្វើតេស្តឃើញលទ្ធផលវិជ្ជមាននោះ ឲ្យជម្រើសអ្នកជំងឺ២ គឺទី១-អាចទៅពេទ្យ នៅខេត្តព្រៃវែង ឬក៏ទៅពេទ្យរុស្ស៊ី នៅភ្នំពេញ ដើម្បីឲ្យពេទ្យ សម្រាលកូនឲ្យដោយវះកាត់ ក្នុងពេលស្ត្រីនោះ រកឃើញវិជ្ជមានកូវីដ១៩។ ពេទ្យឯកជននោះ ក៏បណ្តោយឲ្យស្ត្រីមានផ្ទៃពោះគ្រប់ខែ តែមិនទាន់ឈឺពោះនោះ ធ្វើដំណើរដោយម៉ូតូ ដែលមានប្តី និងមានកូនតូចម្នាក់រួមដំណើរផង ឌុបពីផ្ទះនៅអ្នកលឿង ទៅដល់ទីរួមខេត្តព្រៃវែង ចូលទៅកាន់មន្ទីរពេទ្យខេត្ត កាលពីថ្ងៃទី១៦ ខែកក្កដា ឆ្នាំ២០២១។
ចំណែកប្តី និងកូនតូចរបស់ស្ត្រីនោះ ត្រូវបានធ្វើតេស្ត លទ្ធផលអវិជ្ជមានកូវីដ តែក៏មិនបានធ្វើចត្តាឡីស័កអ្វីទេ គឺបន្ទាប់ពីនាំប្រពន្ធ ចូលសម្រាកមន្ទីរពេទ្យខេត្តព្រៃវែងហើយ បុរសនោះ និងកូនតូច បានទៅសម្រាកនៅផ្ទះសំណាក ដើម្បីរង់ចាំទទួលកូនង៉ែត ដែលពេទ្យ រៀបចំសម្រាលកូន ដោយវះកាត់។ ករណីនេះ គឺមិនគោរព តាមវិធានសុខាភិបាលទាល់តែសោះ ដើម្បីទប់ស្កាត់ការឆ្លងរាលដាលជំងឺកូវីដ១៩ ក្នុងសហគមន៍យើង ហើយយើង ក៏មិនដឹងថា អាជ្ញាធរសមត្ថកិច្ច និងក្រុមគ្រូពេទ្យស្រុកពាមរក៍ ឬក៏ខេត្តព្រៃវែង មិនបានដឹង ហើយមិនបានចាត់វិធានការ ឬក៏មកពីអ្វីនោះទេ។
ដោយឡែក អ្នកប៉ះពាល់ផ្ទាល់នៅជិតផ្ទះស្ត្រីពោះធំគ្រប់ខែឆ្លងទន្លេ ដែលទើបរកឃើញវិជ្ជមានកូវីដ១៩ នៅជិតផ្សារអ្នកលឿងនេះ គឺក្រោយទទួលលទ្ធផលតេស្តម្តងទៀតថា វិជ្ជមាន ពេលទៅដល់មន្ទីរពេទ្យខេត្តព្រៃវែងហើយ ស្ត្រីរូបនេះ បានទូរស័ព្ទមកកាន់អ្នកផ្ទះ និងអ្នកជិតខាង ដែលបានជួបគ្នាល្ងាចៗ ពីផ្ទះមួយទៅផ្ទះ ដោយប្រាប់ថា ខ្លួនកើតកូវីដ ហើយឲ្យអ្នកធ្លាប់ជួបនិយាយគ្នាលេងទាំងអស់នោះ ទៅធ្វើតេស្ត យកសំណាករកមេរោគកូវីដ និងដាក់ខ្លួនឲ្យនៅដាច់ដោយឡែកពីក្រុមគ្រួសារ ហើយកុំចេញក្រៅផ្ទះ ទៅណាឲ្យសោះ។
ប៉ុន្តែអ្នកធ្លាប់ប្រាស្រ័យទាក់ទងនឹងស្ត្រីមានផ្ទៃពោះគ្រប់ខែឆ្លងកូវីដទាំងនោះ ហាក់ដូចជា មិនស្វះស្វែងទៅរកពេទ្យ យកសំណាក ពិនិត្យរកមេរោគកូវីដអ្វីសោះ ដោយអះអាងថា មិនមានអាការៈអ្វីធ្វើទុក្ខ ហើយថា ចាំឈឺ ចាំទៅពេទ្យ។ ក្នុងនោះ សូម្បីតែស្ត្រីម្នាក់ និងកូនតូចម្នាក់ ធ្វើតេស្តខ្លួនឯង តាមឧបករណ៍តេស្តរហ័ស ហើយរកឃើញឆ្លងកូវីដ ក៏មិនទៅពេទ្យ និងមិនប្រាប់អាជ្ញាធរមូលដ្ឋានដែរ ដោយសំអាងថា មានបងប្អូនធ្វើពេទ្យ ហើយសង្ងំនៅផ្ទះ ដើម្បីព្យាបាលដោយខ្លួនឯង ខណៈដែលផ្ទះនោះ លក់ប្រេងសាំង និងទំនិញចាប់ហួយ ដោយបើកលក់ដូរ ជាធម្មតា រាល់ថ្ងៃដដែល។
ឆ្លងកាត់ករណីជាក់ស្តែងខាងលើនេះ យើងឃើញថា ការឆ្លងកូវីដក្នុងសហគមន៍ នឹងមិនអាចកាត់ផ្តាច់ ទៅបានឡើយ ហើយរឹតតែរាលដាលច្រើនទៅៗ បើសិនជា ម្នាក់ៗ បន្តជួបជុំ ផឹកស៊ី។ ម្យ៉ាងនៅមន្ទីរពេទ្យឯកជន ដែលពិនិត្យរកឃើញអ្នកជំងឺកូវីដហើយ បែរជាមិនទាក់ទងខាងពេទ្យរដ្ឋ ឬអាជ្ញាធរមូលដ្ឋាន ដើម្បីចាត់វិធានការទប់ស្កាត់ និងយកអ្នកជំងឺនោះ ទៅកន្លែងសម្រាកព្យាបាល ហើយស្វែងរកអ្នកពាក់ព័ន្ធដទៃទៀត ដើម្បីធ្វើតេស្ត និងធ្វើចត្តាឡីស័ក ព្រមទាំងបិទផ្ទះ បិទកន្លែងលក់ដូរទេនោះ។
រឿងនេះ គឺមានតែអាជ្ញាធរសមត្ថកិច្ចមូលដ្ឋាន នៅភូមិឃុំស្រុកនោះហើយ ជាអ្នកអនុវត្ត ចាត់វិធានការ ដោយសហការជាមួយក្រុមគ្រូពេទ្យស្រុក ពេទ្យខេត្ត ដើម្បីនាំអ្នកជំងឺទៅពេទ្យ តាមឡានពេទ្យផង និងដើម្បីចាត់ចែងរកអ្នកពាក់ព័ន្ធ ហើយឲ្យអ្នកពាក់ព័ន្ធទាំងនោះ ធ្វើចត្តាឡីស័ក តាមការកំណត់ត្រឹមត្រូវ។ ផ្ទុយទៅវិញ ក្រែងលោថា នៅអ្នកលឿងឆ្លងច្រើននាក់ពេក ហើយយូរថ្ងៃពេក អាចអាជ្ញាធរសមត្ថកិច្ច ក្រុមគ្រូពេទ្យហត់នឿយ និងមានកម្លាំងមិនគ្រប់ ដើម្បីចាត់វិធានការទប់ស្កាត់ឲ្យទាន់ពេលវេលា ទើបបណ្តែតបណ្តោយដូច្នេះ។
បើដូច្នេះមែន គឺមានតែប្រជាពលរដ្ឋ អ្នកពាក់ព័ន្ធនឹងអ្នកជំងឺកូវីដ ត្រូវតែចូលរួមដោយខានមិនបាន ព្រោះចូរកុំភ្លេចថា បើសិនជាអ្នកប៉ះពាល់នឹងអ្នកជំងឺកូវីដ រកឃើញវិជ្ជមានដែរ ហើយដោយសារតែការធ្វេសប្រហែស ក៏ឆ្លងបន្តទៅអ្នកផ្ទះ ដែលមានមនុស្សចាស់ជរាផង នោះគឺជាគ្រោះថ្នាក់។ មួយវិញទៀត បើបណ្តែតបណ្តោយថា ចាំឈឺ ចាំជំងឺធ្វើទុក្ខ ចាំទៅពេទ្យ ក៏ខ្លាចតែហួសពេល ព្រោះកូវីដឥឡូវ កាចសាហាវខ្លាំងណាស់។ បើដល់ពេលជំងឺធ្វើទុក្ខ ចេញរោគសញ្ញា ខ្លាចតែដល់ដំណាក់កាលចុងក្រោយ ពេទ្យជួយលែងកើត ហើយក៏មិនដឹងថា បានចម្លងទៅអ្នកផ្សេងទៀត ទៅសមាជិកក្រុមគ្រួសារ និងអ្នកស្រុកអ្នកភូមិប៉ុន្មាននាក់ទៀត។
ចំពោះអ្នកសម្ងំព្យាបាលតាមផ្ទះ ក៏គួរតែទាក់ទងអាជ្ញាធរសមត្ថកិច្ច និងក្រុមគ្រូពេទ្យឲ្យបានត្រឹមត្រូវ ព្រោះការព្យាបាលអ្នកជំងឺកូវីដ តាមផ្ទះ មិនមែនចេះតែនឹកឃើញ ឬក៏សម្រេចលើអ្នកជំងឺទេ។ មានលក្ខខណ្ឌ និងឆ្លងតាមការវាយតម្លៃរបស់អាជ្ញាធរសមត្ថកិច្ច និងក្រុមគ្រូពេទ្យត្រឹមត្រូវ ទើបអាចសម្រាកព្យាបាលនៅផ្ទះបាន ហើយមកដល់ពេលនេះទៀត ការសម្រាកព្យាបាលអ្នកជំងឺកូវីដ កម្រិតស្រាលតាមផ្ទះ គឺក្រសួងសុខាភិបាល ទើបតែអនុវត្តនៅភ្នំពេញមួយប៉ុណ្ណោះ៕
ចែករំលែកព័តមាននេះ