ខេត្តសៀមរាប ៖ ក្រោយពេលទទួលបាននូវផែនការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បញ្ជាការដ្ឋានបញ្ជូនសារ នៃអគ្គបញ្ជាការដ្ឋានដឹកនាំដោយលោកឧត្តម សេនីយ៍ទោ ជុំ សុវណ្ណារ៉ា មេបញ្ជាការរង បញ្ជាការដ្ឋានបញ្ជូនសារ អគ្គបញ្ជាការដ្ឋាន ទទួលការងារហ្វឹកហ្វឺន និងជាប្រធានក្រុមការងារចាក់វ៉ាក់សាំងឃុំពួក ស្រុកពួក ខេត្តសៀមរាប បានដឹកនាំក្រុមការងារ គ្រូពេទ្យចាក់វ៉ាក់សាំងរបស់បញ្ជាការដ្ឋានបញ្ជូនសារ ដោយសហការជាមួយរដ្ឋបាលខេត្តសៀមរាប និងរដ្ឋបាលស្រុកពួកចុះចាក់វ៉ាក់សាំងការពារជំងឺកូវីដ-១៩ ជូនបងប្អូនប្រជាពលរដ្ឋក្នុងឃុំពួក ដោយមានការចូលរួមរបស់អាជ្ញាធរស្រុក ឃុំ សមត្ថកិច្ចនគរបាល សហភាពសហព័ន្ធយុវជនកម្ពុជាស្រុក និងប្រជាការពារ កាលពីចុងសប្តាហ៍ថ្ងៃអាទិត្យ ទី១៨ ខែកក្កដា ឆ្នាំ២០២១។
តាមរបាយការណ៍បញ្ជាក់របស់លោក ស៊ិន ចាន់ថុល អភិបាលនៃគណៈអភិបាលស្រុកពួក បានឲ្យដឹងថា ផែនការ ក្នុងការចាក់វ៉ាក់សាំងចំនួនពីរគោលដៅ មានចំនួន១៩ ២៦១នាក់ នៅថ្ងៃបើកយុទ្ធនាការចាក់វ៉ាក់សាំងក្នុងឃុំពួក ដោយមានក្រុមគ្រូពេទ្យបញ្ជាការដ្ឋានបញ្ជូនសារ អគ្គបញ្ជាការដ្ឋាន ចំនួន៤២នាក់ ចាក់នៅមណ្ឌលវត្តខេមរាសាមគ្គីមន្នីរង្សី និងទីចាត់ការបំភ័ន្តអក្ខរៈ អគ្គបញ្ជាការដ្ឋាន មានក្រុមគ្រូពេទ្យ ចំនួន៤៥នាក់ ចាក់នៅមណ្ឌលវត្តអម្ពរវ័ន្ត ស្ថិក្នុងឃុំពួក ស្រុកពួក។ លោកបានបញ្ជាក់ថា មណ្ឌលចាក់វ៉ាក់សាំងទាំងពីរគោលដៅនេះ គ្រប់ដណ្តប់ឃុំចំនួន៣ គឺឃុំពួក ,ឃុំខ្នាត និងឃុំសំរោងយា ក្នុងស្រុកពួក ដែលមានប្រជាពលរដ្ឋទទួលការចាក់វ៉ាក់សាំង សរុបចំនួន ២៤ ៤៩៨នាក់។
ម្យ៉ាងទៀតចំពោះផែនការក្នុងការចាក់វ៉ាកសាំងនេះ រដ្ឋបាលបានកំណត់គោលដៅចំនួន៤ទីតាំង ដែលមានប្រជាពលរដ្ឋសរុបចំនួន ១៦៥ ៦៤២នាក់ ដែលទទួលចាក់វ៉ាក់សាំង។ មានប្រសាសន៍នោះដែរលោកឧត្តមសេនីយ៍ទោ ជុំ សុវណ្ណារ៉ា មេបញ្ជាការរង បញ្ជាការដ្ឋានបញ្ជូនសារ អគ្គបញ្ជាការដ្ឋាន ទទួលការងារហ្វឹកហ្វឺន និងជាប្រធានក្រុមការងារចាក់វ៉ាក់សាំង បានបញ្ជាក់ថា ដោយទទួលបានផែនការណែនាំ របស់ប្រមុខរាជរដ្ឋាភិបាល និងបទបញ្ជារបស់ក្រសួងការពារជាតិ និងអគ្គបញ្ជាការដ្ឋាន និងផែនការរបស់រដ្ឋបាលខេត្តសៀមរាប ក្រុមការងារគ្រូពេទ្យបញ្ជាការដ្ឋានបញ្ជូនសារ បានទទួលការចាក់វ៉ាក់សាំងជូនប្រជាពលរដ្ឋ នៅក្នុងឃុំពួក ស្រុកពួក ក្នុងយុទ្ធនាការចាក់វ៉ាក់សាំងនេះ។
លោកក៏បានបញ្ជាក់ថា ចំពោះផែនការចាក់វ៉ាក់សាំងរបស់ក្រុមគ្រូពេទ្យ យើងបានយកចិត្តទុកដាក់ខ្ពស់ ចំពោះសុវត្ថិភាពនូវគ្រប់វិនាទី ក្នុងពេលចាក់វ៉ាក់សាំងជូនបងប្អូន ក្រុមការងារបានគិតអំពីគម្លាតសុវត្ថិភាពជាចម្បង។ លោកបានបញ្ជាក់ផងដែរថា ក្នុងផែនការការងារចាក់វ៉ាក់សាំង ក្រុមគ្រូពេទ្យធ្វើប្រតិបត្តិការចាក់ឲ្យបានក្នុងមួយថ្ងៃឲ្យបាន ២ពាន់នាក់ ទៅតាមផែនការដែលបានគ្រោងទុក។ ម្យ៉ាងទៀតក្នុងកិច្ចប្រតិបត្តិការចាក់វ៉ាក់សាំងនៅឃុំពួកយើងនេះ ក៏មានការចូលរួមសហការពីក្រុមគ្រូពេទ្យបំភ័ន្តអក្ខរៈ អគ្គបញ្ជាការដ្ឋាន ដើម្បីពន្លឿនការចាក់ជូនប្រជាពលរដ្ឋមកទទួលចាក់វ៉ាក់សាំង នៅក្នុងភូមិសាស្ត្រឃុំពួកទាំងមូលឲ្យបានរួចរាល់ និងបន្តទៅធ្វើការចាក់នៅតាមបណ្តាឃុំគោលដៅដែលរដ្ឋបាលស្រុកបានកំណត់ផងដែរ។ ការចាក់វ៉ាក់សាំងនេះ ក្នុងគោលដៅកាត់ផ្តាច់ខ្សែចម្លងជំងឺកូវីដ-១៩ ក្នុងការការពារនូវសុខមាភាពរបស់ប្រជាពលរដ្ឋ ដើម្បីធ្វើការស្តារឡើងវិញនូវគ្រប់ហេដ្ឋារចនាសម្ព័ន្ធសេដ្ឋកិច្ចជាតិ និងវិស័យទេសចរណ៍ខេត្តសៀមរាបឲ្យបានប្រសើរឡើងវិញ។
លោកក៏បានឲ្យដឹងទៀតថា ក្នុងស្រុកពួក ជាតំបន់ប្រឈមទៅហានិភ័យនៃជំងឺកូវីដ-១៩ ដែលចាំបាច់ក្រុមកងទ័ពអាវស ធ្វើការប្រយុទ្ធប្រឆាំងទៅខ្លាំងឥតស្រមោល ឥតក្លិន ដ៏កាចសាហាវនេះ។ ចំពោះសកម្មភាពរបស់ប្រជាពលរដ្ឋបានមកទទួលចាក់វ៉ាក់សាំង បានដំណើរការទៅដោយរលូន និងរក្សាបានពីគម្លាតសុវត្ថិភាពទៅតាមការណែនាំរបស់ក្រុមការងារ ដោយគ្មានការបង្ខិតបង្ខំ និងចាក់ជូនដោយមិនប្រកាន់ពូជសាសន៍ និន្នាការនយោបាយអ្វីនោះឡើយ។ លោក ក៏បានផ្តាំផ្ញើ និងបញ្ជាក់ជូនបងប្អូនថា ក្រោយពេលចាក់រួចរយៈពេល២១ថ្ងៃ ចូលបងប្អូនមកទទួលចាក់វ៉ាក់សាំងនូវដូសទី២ ទោះបីយើងបានទទួលការចាក់វ៉ាក់សាំងហើយក្តីក៏ត្រូវបងប្អូនបន្តអនុវត្តនូវវិធានការរបស់រាជរដ្ឋាភិបាល ៣កុំ ៣ការពារ និងការណែនាំរបស់ក្រសួងសុខាភិបាលឲ្យបានខ្ជាប់ខ្ជួនជាប្រចាំ៕ ដោយ ៖ ច័ន្ទ រស្មី
ចែករំលែកព័តមាននេះ