ឡោមព័ទ្ធផ្ទះសំណាក់ ក្រោយប្រុសស្រីពពាក់ពពូនគ្នាប្រើប្រាស់ និងជួញដូរ
- ភ្នំពេញ
រាជធានីភ្នំពេញ ៖ គណៈបញ្ជាការឯកភាពខណ្ឌដូនពេញ ដឹកនាំដោយលោកអភិបាលខណ្ឌបាន ចុះបង្ក្រាបករណីចែកចាយ
រាជធានីភ្នំពេញ ៖ គណៈបញ្ជាការឯកភាពខណ្ឌដូនពេញ ដឹកនាំដោយលោកអភិបាលខណ្ឌបាន ចុះបង្ក្រាបករណីចែកចាយគ្រឿងញៀ.ននៅផ្ទះសំណាក់យីហោអិល អេស ដោយឃាត់បានមនុស្សប្រុសស្រីសរុបចំនួន១៤នាក់ផងដែរ។
ការចុះបង្ក្រាបករណីខាងលើនេះបានធ្វើឡើងកាលពីវេលាម៉ោង៨និង៥០នាទីយប់ថ្ងៃទី១៧ ខែកក្កដា ឆ្នាំ២០២១ នៅមុខផ្ទះសំណាក់យីហោ អិល អេស ស្ថិតនៅតាមបណ្តោយផ្លូវលេខ៥៣ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ ។
តាមប្រភពព័ត៌មានបានឱ្យដឹងថា មុនពេលចុះប្រតិបត្តិការបង្ក្រាបករណីខាងលើ ដំបូងគណៈបញ្ជាការឯកភាពខណ្ឌដូនពេញ រួមទាំងសមត្ថកិច្ច បានធ្វើការជិះល្បាតនៅក្នុងមូលដ្ឋានរបស់ខ្លួន ស្រាប់តែប្រទះឃើញទីតាំងមុខផ្ទះសំណាក់ អិល អេស ខាងលើមានមនុស្សជុំគ្នាពពាក់ពពូន ចំនួន៨នាក់ (ស្រី២នាក់) ក៏បានធ្វើការឃាត់សួរនាំនិងឆែកខ្លួន ស្រាប់តែឃើញមានថ្នាំញៀ.នមួយចំនួន ជាប់ហ្នឹងខ្លួនពួកគាត់ ទើបធ្វើការឃាត់ខ្លួនភ្លាមៗតែម្តង។ ដោយមានការសង្ស័យ សមត្ថកិច្ចបានធ្វើការឡោមព័ទ្ធទីតាំងផ្ទះសំណាក់ខាងលើ ព្រមទាំងដាក់កម្លាំងចុះទៅធ្វើការឆែកឆេរ និងត្រួតពិនិត្យគ្រប់ជាន់នៃផ្ទះសំណាក់ខាងលើថែមទៀតផង។
តាមប្រភពព័ត៌មានបានឱ្យដឹងបន្តថា ដោយនៅក្នុងនោះ សមត្ថកិច្ចបានធ្វើការឃាត់ខ្លួនមនុស្ស៧នាក់ (ស្រី៣នាក់ទៀត) ដែលកំពុងតែធ្វើសកម្មភាពប្រើប្រាស់គ្រឿងញៀ.ននៅក្នុងបន្ទប់ ព្រមទាំងធ្វើការដកហូតគ្រឿងញៀនមួយចំនួន រួមទាំងឧបករណ៍ប្រើប្រាស់មួយចំនួនទៀតផងដែរ។
គួរបញ្ជាក់ផងដែរថា នៅក្នុងប្រតិបត្តិការចុះបង្ក្រាបទីតាំងខាងលើ សមត្ថកិច្ចបានធ្វើការឃាត់ខ្លួនមនុស្សសរុប១៤នាក់ (ស្រី៥នាក់) រួមទាំងគ្រឿងញៀ.នសរុប២៩កញ្ចប់ ក្នុងនោះមាន ៤កញ្ចប់ធំ។
ក្រោយពេលបញ្ចប់ប្រតិបត្តិការណ៍ចុះបង្ក្រាប សមត្ថកិច្ចបានបិទផ្ទះសំណាក់ខាងលើជាបណ្ដោះអាសន្នហើយធ្វើការនាំខ្លួនអ្នកប្រើប្រាស់ថ្នាំញៀ.ន និងជាប់ពាក់ព័ន្ធទាំង១៤នាក់នោះ ទៅធ្វើតេស្តយកសំណាករួច ទើបបញ្ជូនទៅអធិការដ្ឋាននគរបាលខណ្ឌដូនពេញ ដើម្បីធ្វើការសាកសួរ និងចាត់ការទៅតាមនីតិវិធីផងដែរ៕
ចែករំលែកព័តមាននេះ