ខេត្តព្រៃវែង ៖ បើតាមសេចក្តីរាយការណ៍បានឱ្យដឹងឹថា ប្រជាពលរដ្ឋមានការភ្ញាក់ផ្អើលយ៉ាងខ្លាំងរហូតរត់ចែកជើងគ្នាទាំងព្រលឹងចុងសក់ ដោយសារតែមានបុរសម្នាក់ដែលគេស្គាល់ថា ជាមន្ត្រីយោធាសក្តិ៣ បានផឹកស្រាស្រវឹង រួចដកកាំភ្លើងខ្លីបាញ់រះជិត២០គ្រាប់ ដោយមិនដឹងពីមូលហេតុ។ ហេតុការណ៍នេះ បានកើតឡើងកាលពីវេលាម៉ោង៦ល្ងាច ថ្ងៃទី១៧ ខែកក្កដា ឆ្នាំ២០២១ នៅចំណុចមេទឹកអូរាំង ស្ថិតក្នុងភូមិពាក់ស្បៃ ឃុំកំពង់ប្រាំង ស្រុកពារាំង ខេត្តព្រៃវែង ។
សេចក្តីរាយការណ៍បន្តថា បុរសដែលបង្កការភ្ញាក់ផ្អើលដល់ប្រជាពលរដ្ឋខាងលើនោះ មានឈ្មោះ តាន់ ជីវ័ន្ត អាយុប្រហែល៥២ឆ្នាំ ជាមន្ត្រីយោធាពាក់សក្តិ៣ និងមានទីលំនៅឯរាជធានីភ្នំពេញផងដែរ។
យោងតាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានអោយដឹងថា នៅថ្ងៃកើតហេតុនោះ មន្ត្រីយោធាឈ្មោះ តាន់ ជីវ័ន្ត នោះ បានមកលេងផ្ទះអតីតប្រពន្ធ ដែលស្ថិតក្នុងភូមិ-ឃុំកើតហេតុខាងលើ ដោយជិះរថយន្ត១គ្រឿងម៉ាកហាយឡែនឌ័រ ពណ៌ស ពាក់ស្លាកលេខ ភ្នំពេញ ២L ៨៩៦០។
ប្រភពដដែលបានបន្តថា មុនពេលកើតហេតុ មន្ត្រីយោធាខាងលើ បានផឹកស៊ីជាមួយមិត្តភក្តិយ៉ាងសប្បាយរីករាយជាធម្មតា មិនមានទំនាស់អ្វីកើតឡើងទេ ប៉ុន្តែពេលផឹកស្រវឹកជោកជាំទៅ មិនដឹងជាយ៉ាងម៉េច ស្រាប់តែដកកាំភ្លើងខ្លីនៅហ្នឹងចង្កេះ រួចបាញ់រះឡើងទៅលើជិត២០គ្រាប់ ធ្វើអោយក្មេងៗដែលឃ្វាលគោក្របីនៅក្បែនោះ និងអ្នកភូមិនៅជុំវិញនោះ ភ័យស្លន់ស្លោនាំគ្នារត់រកកន្លែងពួនគ្រប់ៗគ្នា ចំណែកមន្ត្រីយោធាវិញ ក្រោយពីបាញ់រះអស់ចិត្តហើយ ក៏បានជិះរថយន្តរបស់ខ្លួនចាកចេញទៅយ៉ាងរំភើយ ដូចអត់មានរឿងអ្វីសោះ។
លោកឩត្តមសេនីយ៍ទោ ពៅ ជីវី ស្នងការនគរបាលខេត្តព្រៃវែង បានអោយដឹងនៅព្រឹកថ្ងៃទី១៨ ខែកក្កដា ឆ្នាំ២០២១នេះថា ពិតជាមានករណីមន្ត្រីយោធា ស្រវឹងស្រាដកកាំភ្លើងបាញ់រះបង្អើលអ្នកស្រុកពិតមែន ហើយលោកក៏បានបញ្ជាអោយលោកអធិការស្រុក ចុះទៅធ្វើការភ្លាមៗផងដែរ ប៉ុន្តែពេលទៅដល់កន្លែងកើតហេតុ ជនបង្កបានចាកចេញទៅបាត់ហើយ ដូច្នេះសមត្ថកិច្ចក៏បានត្រឹមកសាងសំណុំរឿងបន្ត ទៅតាមនីតិវិធីប៉ុណ្ណោះ។
ចែករំលែកព័តមាននេះ