បង្ក្រាបជនសង្ស័យម្នាក់ក្នុងចំណោម៣នាក់ក្រោយធ្វើសកម្មភាពសម្រេចភ្លាមៗ
- ភ្នំពេញ
កម្លាំងសមត្ថកិច្ចបង្ក្រាបបានជនសង្ស័យម្នាក់ ក្នុងចំណោមបក្សពួក៣នាក់ ពាក់ព័ន្ធករណីលួចម៉ូតូ បង្កការភ្ញាក់ផ្អើលកាលពីវេលាម៉ោង៣ទៀបភ្លឺ ឈានចូលថ្ងៃ
រាជធានីភ្នំពេញ ៖ កម្លាំងសមត្ថកិច្ចបង្ក្រាបបានជនសង្ស័យម្នាក់ ក្នុងចំណោមបក្សពួក៣នាក់ ពាក់ព័ន្ធករណីលួចម៉ូតូ បង្កការភ្ញាក់ផ្អើលកាលពីវេលាម៉ោង៣ទៀបភ្លឺ ឈានចូលថ្ងៃទី១៨ ខែកក្កដា ឆ្នាំ២០២១នៅចំណុចស្តុបតាមផ្លូវ៣៧១ កែងផ្លូវ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
លោក ផន អូន អធិការរងខណ្ឌចំការមន បានអោយដឹងថា មុនកើតហេតុ កម្លាំងព្រហ្មទណ្ឌខណ្ឌ និងប៉ុស្តិ៍រដ្ឋបាល ល្បាតដើម្បីបង្ការបទល្មើសផ្សេងៗក្នុងមូលដ្ឋាន លុះមកដល់ផ្លូវ៣៧១ កែងផ្លូវ២៧១ ក្នុងសង្កាត់ផ្សារដើមថ្កូវ ខណ្ឌចំការមន ក៏បានប្រទះឃើញជនសង្ស័យ៣នាក់ ក្នុងនោះ២នាក់ជិះម៉ូតូកូនទា ពណ៌ស ពាក់ស្លាកលេខភ្នំពេញ ១DE-៩៣៨៤ ហើយអ្នកអង្គុយខាងក្រោយកំពុងតែយកជើងធាក់ម៉ូតូហុងដា Click ពណ៌ស ពាក់ស្លាកលេខភ្នំពេញ ១FB-៨៧៤៦ ធ្វើឲ្យកម្លាំងសមត្ថកិច្ចមានការសង្ស័យថា ជាករណីលួច ឬគាស់ផ្ទះ ក៏បានឃាត់ដើម្បីសាកសួរនាំ តែជនសង្ស័យទាំង៣នាក់ គ្រាន់តែឃើញសមត្ថកិច្ចភ្លាម បុរសទាំង៣នាក់នោះក៏ផ្ដួលម៉ូតូចោល រួចនាំរត់គេចខ្លួន តែត្រូវកម្លាំងសមត្ថកិច្ចបង្ក្រាបឃាត់ខ្លួនបានម្នាក់ ហើយក៏នាំមកកាន់ប៉ុស្តិ៍រដ្ឋបាលនគរបាលផ្សារដើមថ្កូវ ដើម្បីសួរនាំបន្តតែម្តង ។
សមត្ថកិច្ចបញ្ជាក់ថា ជនសង្ស័យដែលឃាត់បានខាងលើនេះមានឈ្មោះ ប្រាក់ រស្មី ហៅជ្រូក ភេទប្រុស អាយុ២២ឆ្នាំ មុខរបរអូសរទេះបន្លែ ស្នាក់នៅបន្ទប់ជួល ក្នុងសង្កាត់ច្បារអំពៅ២ ខណ្ឌច្បារអំពៅ បានសារភាពថា ខ្លួនមានបក្សពួក៣នាក់ ហើយបានលួចយកម៉ូតូនៅម្ដុំព្រៃស្ពឺ តាមផ្លូវជាតិលេខ៣ ក្នុងសង្កាត់ចោមចៅ២ ខណ្ឌពោធធិ៍សែនជ័យ លុះមកដល់ចំណុចខាងលើក៏បានជួបសមត្ថកិច្ចឃាត់ខ្លួនតែម្តង ។
សមត្ថកិច្ចបញ្ជាក់ទៀតថា លុះពេលសមត្ថកិច្ចយកទៅសួរនាំចប់ ទើបដឹងថាមិនមែនកើតហេតុក្នុងខណ្ឌចំការមននោះទេ ដូច្នេះសមត្ថកិច្ចក៏បានប្រគល់ទៅឲ្យម្ចាស់ករណីក្នុងខណ្ឌពោធិ៍សែនជ័យ ដើម្បីយកទៅសួរនាំបន្តទៀត ៕
ចែករំលែកព័តមាននេះ