- ភ្នំពេញ
ភ្នំពេញ៖ អ្នកបើកបរយានយន្តមួយចំនួន ក្នុងពេលសព្វថ្ងៃ ហាក់ដូចជា មិនមានការយោគយល់អធ្យាស្រ័យគ្នា ហើយខ្លះទៀត ក៏ហាក់ដូចជា មិនចេះច្បាប់ចរាចរណ៍ ឲ្យបានច្បាស់លាស់ទាល់តែសោះ។ ករណីនេះហើយ…
ភ្នំពេញ៖ អ្នកបើកបរយានយន្តមួយចំនួន ក្នុងពេលសព្វថ្ងៃ ហាក់ដូចជា មិនមានការយោគយល់អធ្យាស្រ័យគ្នា ហើយខ្លះទៀត ក៏ហាក់ដូចជា មិនចេះច្បាប់ចរាចរណ៍ ឲ្យបានច្បាស់លាស់ទាល់តែសោះ។ ករណីនេះហើយ…
ភ្នំពេញ៖ អ្នកបើកបរយានយន្តមួយចំនួន ក្នុងពេលសព្វថ្ងៃ ហាក់ដូចជា មិនមានការយោគយល់អធ្យាស្រ័យគ្នា ហើយខ្លះទៀត ក៏ហាក់ដូចជា មិនចេះច្បាប់ចរាចរណ៍ ឲ្យបានច្បាស់លាស់ទាល់តែសោះ។ ករណីនេះហើយ ទើបបណ្តាល ឲ្យកើតមានគ្រោះថ្នាក់ ជារៀងរាល់ថ្ងៃ។
ដោយសារតែការបើកបរខ្វះការយោគយល់អធ្យាស្រ័យគ្នានេះហើយ បានជា កាលពីថ្ងៃទី១៤ កក្កដា ឆ្នាំ២០២១ មានហេតុការណ៍ប៉ះទង្គិចគ្នា រវាងរថយន្តធុនធ្ងន់មួយគ្រឿង និងរថយន្តគ្រួសារ Toyota Pruis នៅលើស្ពានដែកប៉ាឡេ ស្ថិតនៅក្នុងភូមិឫស្សីមួយគុម្ព ឃុំត្រពាំងគ្រញូង ស្រុកត្រាំកក់ ខេត្តតាកែវ។
រូបថតនៃគ្រោះថ្នាក់នោះ ត្រូវបានគេបង្ហោះចែកចាយនៅលើបណ្ដាញសង្គមហ្វេសប៊ុក បង្ហាញពីរថយន្តធំគៀបរថយន្ត Pruis ជាប់នៅលើស្ពាន។ ករណីនេះ ត្រូវបាននារីម្នាក់ ដែលអះអាងថា ជាភាគីរថយន្ត Toyota Pruis បានបកស្រាយ នៅក្នុងហ្វេសបុករបស់ខ្លួនថា រថយន្តរបស់ខ្លួន បានបើកចូលដល់លើស្ពានប្រមាណ ៣ម៉ែត្រហើយ ស្រាប់តែពេលនោះ រថយន្តធំ បានបើកបោះពួយយ៉ាងលឿន ហើយខ្លួនជាម្ចាស់ឡានតូច ខំស៊ីផ្លេផង វ៉ៃភ្លើងផង ប៉ុន្តែខាងរថយន្តធំ នៅតែបើកសំដៅមកយ៉ាងលឿន មិនឈប់ទេ រហូតដល់គៀបជាប់កណ្តាលស្ពានតែម្តង។ ពេលដែលម្ចាស់រថយន្តធំ ចុះមក បានប្រាប់ថា ជាន់ហ្វ្រាំង មិនស៊ី។
នៅក្នុងពេលកើតហេតុនោះ រថយន្តធំនោះ បានអូសឡានតូចថយទៅក្រោយ ទើបឃើញរូបភាព ហាក់ដូចជាឡានតូច ទើបឡើងលើស្ពានបែបនេះ។
លោក ឌុក ធីយ៉ា អធិការនគរបាលស្រុកត្រាំកក់ បានអោយដឹងថា ករណីរថយន្តទាំង ២គ្រឿងនេះ គឺរថយន្តតូច មិនបានខុសឡើយ។ រថយន្តធំ ជាអ្នកខុស ដោយសារបើកបរក្នុងល្បឿនលឿន បើទោះបីដឹងថា នៅខាងមុខ មានស្ពានឆ្លងកាត់ ហើយមានរថយន្តតូច បើកចូលដល់លើស្ពានមុនក៏ដោយ ក៏រថយន្តធំ នៅតែមិនបន្ថយល្បឿនទៀត។ ក្រោយកើតហេតុ ប៉ូលិស បានអូសយករថយន្តទាំង ២គ្រឿងនេះ ទៅរក្សាទុកនៅអធិការដ្ឋាននគរបាលស្រុកត្រាំកក់ ដើម្បីម្ចាស់មកដោះស្រាយគ្នា។
ស្ពានដែកប៉ាឡេនោះ មានទំហំប្រហែលជាមិនដល់ ៤ម៉ែត្រផង គឺអាចចរាចរណ៍តែឡានមួយប៉ុណ្ណោះ។ ការធ្វើផ្លូវ និងស្ពាននោះ ប្រហែលជាយូរឆ្នាំមកហើយ ដោយសារតែប្រទេសយើង មានឡានតិច ហើយច្រើនតែឡានតូចៗទៀតផង។ តែពេលនេះ ដោយសារតែស្រុកទេស រីកចំរើន ឡានក៏ធំៗ ហើយក៏មានកំណើនឡានតូច រឹតតែច្រើន ដូច្នេះហើយ យើងមានតែខិតខំពង្រើកផ្លូវស្ពាន ឲ្យធំៗ អាចជៀសគ្នាបានដោយស្រួលនៅលើស្ពានថ្មប៉ុណ្ណោះ។ ក្នុងនោះ អ្នកបើកបរទាំងឡាយ ដែលតែងតែបំពាន សូមទទួលខុសត្រូវដោយខ្លួនឯងចុះ។ នេះជាការយល់ឃើញរបស់អ្នកប្រើហ្វេសប៊ុកម្នាក់ទៀត គឺលោកឧកញ៉ា ម៉ុង ឫទ្ធី សមាជិកព្រឹទ្ធសភា និងជាសេដ្ឋីខាងកសិកម្ម។
យ៉ាងណាក៏ដោយ ក៏មានអ្នកសង្កេតមើលឃើញថា ច្រើនតែឡានធំ បើកបរមិនសូវចេះគោរពគេឯងទេ ហើយភាគច្រើន គឺរថយន្តចាក់ប៉េតុង និងរថយន្តដឹកដី។ ពួកគាត់បើកបរ មិនសូវជាយឺតប៉ុន្មានទេ អាងតែគាត់ធំ គឺបើកបរលឿនៗណាស់។
ការលើកឡើងដូច្នេះ បង្ហាញពីសកម្មភាពបើកបរជាក់ស្តែងរបស់ក្រុមអ្នកបើកបរឡានធំមួយចំនួន ក្នុងសង្គមយើងសព្វថ្ងៃ។ តែក៏មានអ្នកបើកបរជាច្រើនទៀត ជាអ្នកគោរពច្បាប់ទម្លាប់ មានសីលធម៌ និងចេះបើកបរ ដោយឆ្លងកាត់សាលារៀនត្រឹមត្រូវដែរ។
ក្រុមអ្នកនិយមបើកឡានលឿនៗ ពិសេសឡានដឹកទំនិញ ឡានដឹកដី ឬឡានកុងតឺន័រ ជាដើម ដោយច្រើនតែជាតៃកុងឡាន ដែលស៊ីឈ្នួលបើកឡានឲ្យក្រុមហ៊ុន ឬបើកឡានឲ្យគេប៉ុណ្ណោះ។ ក្រុមខិលខូចនេះ ឲ្យតែមានហេតុការណ៍បុកប៉ះអី ធ្វើម៉េចចុះពីឡាន រត់ឲ្យតែរួចខ្លួន គឺមិនមានបញ្ហាអ្វីទេ ទុកឲ្យថៅកែ តំណាងក្រុមហ៊ុន ឬក្រុមហ៊ុនធានារ៉ាប់រង ចេញមុខទៅដោះស្រាយ ជាការស្រេច។ ករណីនេះ កើតមានច្រើនមកហើយ ក្នុងសង្គមយើងកន្លងមក។
ចំពោះហេតុការណ៍ឡានធំកៀបឡានតូចជាប់លើស្ពានដែកបាឡេ នៅខេត្តតាកែវនោះ មកពីមូលហេតុ ខ្វះការយោគយល់ អធ្យាស្រ័យគ្នា និងមិនគោរពច្បាប់ចរាចរណ៍។ ករណីនេះ បើថា ឡានតូចឡើងលើស្ពានហើយ គឺជាកំហុសទាំងស្រុងរបស់ឡានធំ។ មាត្រា ២០ ចំណុចទី៧ នៃច្បាប់ ស្តីពី ចរាចរណ៍ផ្លូវគោក បានចែងថា នៅលើស្ពានចង្អៀត ដែលបើកបរបានតែរថយន្តមួយគ្រឿង យានយន្តធុនធំ ត្រូវទុកសិទ្ធិឲ្យយានយន្តធុនស្រាលទៅមុន។ តែបើក្នុងករណីរថយន្តធុនធំ បានទៅដល់លើស្ពានមុន រថយន្តធុនស្រាល ត្រូវឈប់សិន រង់ចាំទាល់តែរថយន្តធុនធំ ឆ្លងផុតស្ពានមុនសិន។
នៅលើការអនុវត្តជាក់ស្តែងក្នុងសង្គមយើង បើថា មានឡានធំ ឡើងស្ពាន គួរតែឲ្យឡានធំនោះ ទៅឲ្យផុតសិន ឬក៏មានចន្លោះ ត្រូវបើកទៅមុនឡានធំៗ កុំនៅក្រោយឲ្យសោះ។ បើពេលចុះស្ពានវិញ ក៏កុំនៅមុខ ឡានធំៗ ឡើយ។ កន្លងមក មានច្រើនករណីហើយ ដែលឡានធំៗ ឡើង ឬចុះស្ពានដាច់ហ្វ្រាំង ហើយបង្កគ្រោះថ្នាក់ មិនតិចទេ រហូតបណ្តាលឲ្យស្លាប់ របួសមនុស្សជាច្រើនថែមទៀត។ ពេលខ្លះ ដោយសារតែផ្ទុកធ្ងន់ពេក ហើយឡានចាស់ ឡើងស្ពានមិនរួច រអិលថយក្រោយ ក៏មាន។ ទាំងនេះ ជាគ្រោះថ្នាក់ ដែលកើតចេញពីឡានធំៗមួយចំនួន នៅលើស្ពាន។
ដូច្នេះមានការតែការបើកបរ យោគយល់ អធ្យាស្រ័យគ្នា ហើយគោរពច្បាប់ទម្លាប់ទាំងអស់គ្នា កុំបើកបរលឿនៗពេកប៉ុណ្ណោះ ទើបអាចជៀសវាងគ្រោះថ្នាក់ចរាចរណ៍បាន។ ករណីឆ្លងស្ពាននោះ បើអ្នកបើកបរម្ខាង ចេះអធ្យាស្រ័យ ឈប់ឲ្យឡានមួយ ឆ្លងផុតស្ពានសិន គឺមិនមានរឿងហេតុ ត្រូវកកស្ទះចរាចរណ៍ផង ត្រូវខូចឡានផង ហើយភាគី ដែលខុស តាមការលើកឡើងមកថា ឡានធំជាអ្នកខុសនោះ គឺត្រូវសងថ្លៃខូចខាតឡានតូចរាប់ពាន់ដុល្លារ ដោយសារតែការធ្វេសប្រហែសតែមួយប៉ព្រិចភ្នែក។ នេះសំណាងហើយ មិនគ្រោះថ្នាក់ដល់មនុស្ស។
ម្យ៉ាងទៀត នៅពេលបើកបរ ចូរកុំភ្លេចសុភាសិតខ្មែរបុរាណថា «សន្សឹមៗ កុំបំបោល ក្រែងមិនដល់ដូចប្រាថ្នា»។ «ខឹងខុស ខឹងខាត» ហើយ «បើខឹង រឿងតូច នឹងក្លាយជារឿងធំ»។ ទាំងអស់នេះ យើងមិនត្រូវភ្លេចឡើយ។ នរណាចង់លឿន ចង់ទៅមុន ឲ្យគេទៅៗ កុំទៅបើកវ៉ាជែងគ្នា ប្រដេញគ្នា ដែលអាចនឹងបង្កគ្រោះថ្នាក់ជាយថាហេតុនោះ៕
ចែករំលែកព័តមាននេះ