ស្ត្រីមានផ្ទៃពោះគ្រប់ខែម្នាក់ បានឈឺពោះឆ្លងទន្លេ ខណៈពេលដែលអាជ្ញាធរកំពុងប្រឹងប្រែងជួយដឹកជន្លៀសគាត់ និងក្រុមគ្រួសារចេញពីគ្រោះទឹកជំនន់ទៅកាន់ទីទួលសុវត្ថិភាព ហើយត្រូវបានក្រុមគ្រូពេទ្យជួយសង្គ្រោះ
ខេត្តបាត់ដំបង៖ ស្ត្រីមានផ្ទៃពោះគ្រប់ខែម្នាក់ បានឈឺពោះឆ្លងទន្លេ ខណៈពេលដែលអាជ្ញាធរកំពុងប្រឹងប្រែងជួយដឹកជន្លៀសគាត់ និងក្រុមគ្រួសារចេញពីគ្រោះទឹកជំនន់ទៅកាន់ទីទួលសុវត្ថិភាព ហើយត្រូវបានក្រុមគ្រូពេទ្យជួយសង្គ្រោះគាត់បានដោយជោគជ័យ កាលពីថ្ងៃទី១៥ ខែកក្កដា ឆ្នាំ២០២១ នៅលើទីទួលពាក់កណ្ដាលផ្លូវមួយកន្លែង ស្ថិតក្នុងភូមិដំណាក់បេង ឃុំបួរ ស្រុកភ្នំព្រឹក។
សមាជិកក្រុមប្រឹក្សាឃុំបួរ លោកស្រី កង សុផា បានឲ្យដឹងថា ស្ត្រីដែលឈឺពោះឆ្លងទន្លេពេលកំពុងសង្គ្រោះចេញពីទឹកជំនន់នោះមានឈ្មោះ ឃី ចំប៉ី អាយុ២៤ឆ្នាំ រស់នៅភូមិដំណាក់បេង ឃុំបួរ ស្រុកភ្នំព្រឹក។ គាត់បានឈឺពោះឆ្លងទន្លេ ស្របពេលកំពុងមានគ្រោះជំនន់ទឹកភ្លៀងខ្លាំង។
លោកស្រី កង សុផា បានប្រាប់បន្តថា អាជ្ញាធរស្រុក និងមន្ត្រីឃុំ បានចុះជួយដឹកជន្លៀសគាត់ និងក្រុមគ្រួសារចេញពីលំនៅឋាន ដែលរងការលិចលង់ដោយសារជំនន់ទឹកភ្លៀង ដើម្បីទៅរកទីទួលមានសុវត្ថិភាព តែចៃដន្យអីស្ត្រីរូបនេះ ក៏បានឈឺពោះឆ្លងទន្លេ ពេលដែលអាជ្ញាធរកំពុងជួយដឹកជន្លៀសរូបគាត់ឆ្លងកាត់ទឹកជំនន់ដល់ពាក់កណ្ដាលផ្លូវទៅហើយ។
មន្ត្រីរដ្ឋបាលស្រុកភ្នំព្រឹក ក៏បាននិយាយដែរថា ពេលកំពុងត្រូវបានជន្លៀសចេញពីលំនៅឋានតាមផ្លូវដែលលិចលង់ទៅដោយជំនន់ទឹកភ្លៀងនោះ ស្រាប់តែស្ត្រីរូបនេះឈឺពោះខ្លាំងនៅកណ្ដាលទឹក អាជ្ញាធរក៏សម្រេចរកទីតាំងដែលគោក ដើម្បីឲ្យគាត់សម្រាក និងបានទំនាក់ទំនងសុំអន្តរាគមន៍ពីក្រុមគ្រូពេទ្យនៅមណ្ឌលសុខភាពបួរ ឲ្យជួយសង្គ្រោះភ្លាមៗផងដែរ។
បើតាមមន្ត្រីបានបញ្ជាក់ថា ស្ត្រីឈ្មោះ ឃី ចំប៉ី បានសម្រាលបានកូនប្រុសម្នាក់ដែលជាកូនទី០២ ហើយក្រុមពេទ្យឆ្មបក៏បានជួយសង្គ្រោះស្ត្រីឆ្លងទន្លេបានដោយសុវត្ថិភាពផងដែរ។ ពេលនេះទាំងម្ដាយ និងកូន គឺមានសុខភាពល្អប្រសើរ ហើយក្រុមគ្រូពេទ្យក៏បានបញ្ជូនគាត់ទៅសម្រាកព្យាបាលបន្តនៅមណ្ឌលសុខភាពបួរ មុនពេលឲ្យគាត់ត្រឡប់ទៅលំនៅឋានវិញ។
សូមបញ្ជាក់ថា ឃុំចំនួន០៤ នៅក្នុងស្រុកភ្នំព្រឹក បានរងនូវឥទ្ធិពលភ្លៀងធ្លាក់ខ្លាំងកាលពីយប់ថ្ងៃទី១៤ និងបន្តដល់ថ្ងៃទី១៥ ខែកក្កដា ដែលធ្វើឲ្យមានជំនន់ទឹកភ្លៀងលិចលង់ផ្លូវថ្នល់ ផ្ទះសម្បែង និងផលដំណាំរបស់ប្រជាពលរដ្ឋយ៉ាងធ្ងន់ធ្ងរ។
បើតាមរបាយការណ៏សាខាកាកបាទក្រហមខេត្ត ដែលបានរាយការណ៏នៅល្ងាចថ្ងៃទី១៥ ខែកក្កដានោះ បានឲ្យដឹងថា ឃុំចំនួន០៤ ដែលរងគ្រោះដោយជំនន់ទឹកភ្លៀងនោះ មានឃុំបួរ ឃុំពេជញរចិន្តា ឃុំភ្នំព្រឹក និងឃុំបារាំងធ្លាក់។
របាយការណ៍ដដែលបានឲ្យដឹងទៀតថា ជំនន់ទឹកភ្លៀងនេះ បានធ្វើឲ្យខូចខាតលំនៅឋានប្រជាពលរដ្ឋសរុបចំនួន៦៥៦ខ្នង ក្នុងនោះមានចំនួន៧៤ខ្នងខូចខាតទាំងស្រុង។ ប៉ុន្តែគ្មានគ្រោះថ្នាក់ដល់មនុស្សណាទេ ហើយរបាយការណ៍ដដែលក៏មិនទាន់និយាយពីផលប៉ះពាល់លើដំណាំកសិកម្មដែរ។
យ៉ាងណាក្ដី ពេលនេះ អាជ្ញាធរ និងសាខាកាកបាទក្រហម បាននិងកំពុងចុះពិនិត្យ និងស្រាវជ្រាវបន្ត ដើម្បីរៀបចំជាអំណោយជួយសង្គ្រោះដល់ពលរដ្ឋដែលគ្រោះដោយជំនន់ទឹកភ្លៀងនេះហើយ៕
ចែករំលែកព័តមាននេះ