រាជធានីភ្នំពេញ ៖ រថយន្តម៉ាកឡិចស៊ីសស៊េរីទំនើបមួយគ្រឿង បុករះម៉ូតូ៣គ្រឿង មួយគ្រឿងបោកផ្ទប់ទៅនឹងរថយន្តឈប់ចតចោល ហើយម្ចាស់ប៉ើងទៅលើរថយន្តបណ្តាលឲ្យរងរបួសធ្ងន់ស្រាល៣នាក់ រីឯអ្នកបើកបររថយន្តបើករត់រួចយករថយន្តទៅប្លុងចោលរត់ចូលផ្សារធីខេតែត្រូវបានឃាត់ខ្លួន។ ហេតុការណ៍គ្រោះថ្នាក់នេះបានកើតឡើងកាលពីវេលាម៉ោង៣ និង១៥នាទីរសៀល ថ្ងៃទី១៥ ខែកក្កដា ឆ្នាំ២០២១ ស្ថិតនៅផ្លូវ២៨៣កែងផ្លូវ៥២៨ ក្នុងសង្កាត់បឹកក់ទី១ ខណ្ឌទួលគោក រាជធានីភ្នំពេញ។
រថយន្តបង្កមួយគ្រឿងខាងលើម៉ាកឡិចស៊ីស ពណ៌ស ពាក់ស្លាកលេខ ភ្នំពេញ 2BN-6465 បើកបរដោយបុរសម្នាក់មិនស្គាល់អត្តសញ្ញាណត្រូវបានសមត្ថកិច្ចឃាត់ខ្លួន។ តាមសាក្សីបានឲ្យដឹងថា នៅមុនពេលកើតហេតុគេឃើញ១គ្រឿងខាងលើបានធ្វើដំណើរតាមបណ្តោយផ្លូវលេខ២៨៣ក្នុងទិសដៅ ពីត្បូងទៅជើង។ នៅពេលធ្វើដំណើរមកដល់ចំណុចផ្លូវកែងខាងលើក៏បានរេចង្កូតមកឆ្វេងដៃបុករះរ៉ឺម៉កម៉ូតូលក់ភេសជ្ជៈ បណ្តាលឲ្យម្ចាស់រងរបួសស្រាល និងបុកម៉ូតូម៉ាកធូដេមួយគ្រឿង ដែលម្ចាស់ឈប់ទិញភេសជ្ជៈបណ្តាលឲ្យម៉ូតូប៉ើងបោកផ្ទប់នឹងរថយន្តម៉ាកនីស្សាន់ ហើយម្ចាស់ម៉ូតូ ប៉ើងទៅលើរថយន្ត ដែលឈប់ចតចោលនោះបណ្តាលឲ្យរងរបួសធ្ងន់។
សាក្សីបានបន្តទៀត បន្ទាប់ពីបង្កគ្រោះថ្នាក់រថយន្តក៏បានព្យាយាមបើកគេចរហូតដល់ត្រង់ចំណុចស្តុបរតនៈស្រីម៉ៅ ក៏បានបុកជាមួយម៉ូតូមួយគ្រឿងទៀតបណ្តាលឲ្យស្រីម្នាក់រងរបួសបាក់ជើងខាងស្តាំរួចរថយន្តក៏បានបន្តបើករត់គេចរហូតមកដល់ចំណុចមុខផ្សារ TK ក៏បានទៅបុកនឹងគម្របលូទៅមុខលែងរួច ហើយចុះរត់គេចខ្លួនចូលក្នុងផ្សារតែត្រូវនគរបាលឃាត់ខ្លួនបាន។ បន្ទាប់ពីគ្រោះថ្នាក់អ្នករងរបួសត្រូវបានបញ្ជូនទៅកាន់មន្ទីរពេទ្យ។ ចំណែករថយន្ត និងអ្នកបើកបរព្រមទាំងម៉ូតូ៣គ្រឿងត្រូវបាននគរបាលចុះទៅវាស់វែងបញ្ចូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយសងការខូចខាត៕ ដោយ ៖ ម៉េង ធា
ចែករំលែកព័តមាននេះ