អ្នកសារព័ត៌មានដែលល្បីល្បាញទៅដោយរឿងអាស្រូវម្នាក់ត្រូវបានកម្លាំងកងរាជអាវុធហត្ថខេត្ត ឃាត់ខ្លួន និងបានកសាងសណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៥ ខែកក្កដា ឆ្នាំ២០២១នេះ ក្រោមការចោទប្រកាន់ពីបទ
ខេត្តបាត់ដំបង ៖ អ្នកសារព័ត៌មានដែលល្បីល្បាញទៅដោយរឿងអាស្រូវម្នាក់ត្រូវបានកម្លាំងកងរាជអាវុធហត្ថខេត្ត ឃាត់ខ្លួន និងបានកសាងសណុំរឿងបញ្ជូនទៅសាលាដំបូងខេត្ត នៅព្រឹកថ្ងៃទី១៥ ខែកក្កដា ឆ្នាំ២០២១នេះ ក្រោមការចោទប្រកាន់ពីបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍»។
បើតាមរបាយការណ៍កងរាជអាវុធហត្ថ បានឲ្យដឹងថា បុរសរូបនោះមានឈ្មោះ កៅ ពីសិដ្ឋ អាយុ៣២ឆ្នាំ ជាអ្នកសារព័ត៌មាន រស់នៅភូមិ១៣មករា សង្កាត់ព្រែកព្រះស្ដេច ក្រុងបាត់ដំបង។ ហើយអ្នកសារព័ត៌មានរូបនេះ ត្រូវកម្លាំងកងរាជអាវុធហត្ថ ឃាត់ខ្លួនកាលពីវេលាថ្ងៃត្រង់ ថ្ងៃទី១៤ ខែកក្កដា នៅចំណុចភូមិព្រែកព្រះស្តេច សង្កាត់ព្រែកព្រះស្តេច ហើយក៏ត្រូវបានបញ្ជូនភ្លាមៗទៅកាន់ការិយាល័យព្រហ្មទណ្ឌ នៃបញ្ជាការដ្ឋានកងរាជអាវុធហត្ថខេត្ត ដើម្បីសួរនាំ។
កោះសន្តិភាព មិនទាន់អាចទំនាក់ទំនងមន្ត្រីកងរាជអាវុធហត្ថ ដើម្បីបានចម្លើយពីជនសង្ស័យឈ្មោះ កៅ ពិសិដ្ឋ នេះនៅឡើយទេ។ ប៉ុន្តែបើតាមប្រភពពីសមត្ថកិច្ចបានប្រាប់ថា អ្នកសារព័ត៌មានឈ្មោះ កៅ ពិសិដ្ឋ នេះ ត្រូវបានឃាត់ខ្លួនដោយសារតែជននេះដើរនិយាយបំផុសបំផុល កុំឲ្យពលរដ្ឋទៅចាក់ថ្នាំវ៉ាក់សាំងការពារជំងឺកូវីដ១៩។ មិនតែប៉ុណ្ណោះ ជននេះបានសរសេរផ្សាយនៅក្នុងបណ្ដាញសង្គមរបស់ខ្លួន រិះគន់វាយប្រហារយ៉ាងចាស់ដៃទៅលើប្រមុខរាជរដ្ឋាភិបាល ដោយសរសេរសារប្រឆាំងនឹងការកាន់អំណាចរបស់បក្សប្រជាជន ហើយថែមទាំងបណ្ដេញឲ្យប្រមុខរាជរដ្ឋាភិបាលចុះចេញទៀតផង។
យោងលើខ្លឹមសារដែលអ្នកកាសែតឈ្មោះ កៅ ពិសិដ្ឋ បានសរសេរបង្ហោះនៅក្នុងបណ្ដាញសង្គមចំនួន០៣លើក នៅក្នុងអាក់ខោនឈ្មោះ « Kouv Piseth » ដែលកោះសន្តិភាព ទទួលបាន គឺទី១ នៅក្នុងអំឡុងខែឧសភា កន្លងទៅ ខណៈពេលដែលរាជរដ្ឋាភិបាល ប្រកាសហាមមិនឲ្យផឹកស៊ី ឬថតបង្ហោះតាមបណ្ដាញសង្គម បែរជាជននេះផឹកស៊ីថតបង្ហោះផ្គើននឹងបំរាមនេះ ។ ទី២ ក្នុងអំឡុងពេលថ្មីៗនេះ អាក់ខោនដដែលបានជួបជុំមិត្តភក្ដិផឹកស៊ីថតបង្ហោះ អមដោយខ្លឹមសារ «ពួកខ្ញុំមិនគាំទ្រទេ ការកាន់អំណាចរបស់បក្សប្រជាជន ចុះចេញទៅ ពួកខ្ញុំក្មេងជំនាន់ក្រោយ ពួកខ្ញុំមិនគាំទ្រទេ ចុះចេញទៅ» និងទី៣ អាក់ខោននេះ ក៏បានបង្ហោះរូបភាពម្ដុំគ្នាផឹកស៊ីបង្ហាញកំប៉ុងស្រាបៀរដូចមុខៗដែរ តែក្លែមខ្លឹមសារហាក់ចាស់ដៃជាងមុន។ ខ្លឹមសារនោះសរសេរយ៉ាងដូច្នេះថា « ពួកខ្ញុំទាំង៣នាក់ សូមសំណូមអោយសហគមន៍អន្តរជាតិ ចាត់ការមកលើលោកនាយករដ្ឋមន្ត្រី ហ៊ុន សែន ហើយសូមអោយអន្តរជាតិ កាត់ផ្ដាច់ជំនួយទាំងអស់»។
ប្រភពពីមន្ត្រីកងរាជអាវុធហត្ថបានឲ្យដឹងថា ឈ្មោះ កៅ ពិសិដ្ឋ បានបង្ហោះខ្លឹមសារវាយប្រហាររដ្ឋាភិបាលជាបន្តបន្ទាប់ ច្រើនលើកច្រើនសារហើយ តែធ្វើឲ្យប៉ះពាល់ប្រមុខរាជរដ្ឋាភិបាលធ្ងន់ធ្ងរបំផុត ការប្រព្រឹត្តចុងក្រោយនេះ នៅថ្ងៃទី១២ ខែកក្កដា ឆ្នាំ២០២១។ មិនតែប៉ុណ្ណោះ ជននេះបានបំផុសបំផុល និងព្យាយាមរារាំងមិនឲ្យអ្នកស្រុកទៅចាក់ថ្នាំវ៉ាក់សាំង បង្ការកូវីដ១៩ទៀតផង។
ជាមួយនឹងការឃាត់ខ្លួនអ្នកកាសែត ដែលសំបូររឿងអាស្រូវរូបនេះ សមត្ថកិច្ចបានដកហូតនូវវត្ថុតាងមួយចំនួនដូចជា ទូរស័ព្ទដៃដែលប្រើប្រាសអាខោនហ្វេសប៊ុកបង្ហោះខ្លឹមសារវាយប្រហារថ្នាក់ដឹកនាំ រថយន្តម៉ាកកាំមេរី ស៊េរីឆ្នាំ៨៩ ពណ៌ស០១គ្រឿង និងប័ណ្ណសារព័ត៌មាន០១សន្លឹក។ ទោះយ៉ាងណា ជនសង្ស័យឈ្មោះ កៅ ពិសិដ្ឋ និងវត្ថុតាង ត្រូវបានមន្ត្រីការិយាល័យជំនាញ កសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីហើយ៕
ចែករំលែកព័តមាននេះ