ភ្លៀងធ្លាក់២ថ្ងៃជាប់ៗគ្នា ទឹកជន់លិចឃុំចំនួន៤ នៅស្រុកភ្នំព្រឹក
- បាត់ដំបង
យ៉ាងហោចណាស់លំនៅឋាន និងដំណាំកសិកម្មរបស់ប្រជាពលរដ្ឋនៅក្នុងឃុំចំនួន០៤ បានរងផលប៉ះពាល់ដោយសារជំនន់ទឹកភ្លៀង ក្នុងរយៈពេល២យប់ជាប់ៗគ្នា
យ៉ាងហោចណាស់លំនៅឋាន និងដំណាំកសិកម្មរបស់ប្រជាពលរដ្ឋនៅក្នុងឃុំចំនួន០៤ បានរងផលប៉ះពាល់ដោយសារជំនន់ទឹកភ្លៀង ក្នុងរយៈពេល២យប់ជាប់ៗគ្នា
ខេត្តបាត់ដំបង ៖ យ៉ាងហោចណាស់លំនៅឋាន និងដំណាំកសិកម្មរបស់ប្រជាពលរដ្ឋនៅក្នុងឃុំចំនួន០៤ បានរងផលប៉ះពាល់ដោយសារជំនន់ទឹកភ្លៀង ក្នុងរយៈពេល២យប់ជាប់ៗគ្នា។ នេះបើតាមសេចក្ដីរាយការណ៍ពីមន្ត្រីរដ្ឋបាលស្រុកភ្នំព្រឹក នៅព្រឹកថ្ងៃទី១៥ កក្កដា ២០២១ នេះ។
បើតាមរបាយការណ៍ពីមន្ត្រីរដ្ឋបាលស្រុកភ្នំព្រឹក បានឲ្យដឹងថា ឃុំទាំង០៤ នៅស្រុកភ្នំព្រឹក ដែលរងគ្រោះដោយសារជំនន់ទឹកភ្លៀងនោះមាន ៖ ឃុំពេជ្រចិន្តា ឃុំបួរ ឃុំភ្នំព្រឹក និងឃុំបារាំងធ្លាក់ ប៉ុន្តែឃុំបួរហាក់មានសភាពលិចលង់ធ្ងន់ធ្ងរជាងគេ។
មន្ត្រីរដ្ឋបាលស្រុកភ្នំព្រឹកបាននិយាយថា ភ្លៀងបានធ្លាក់ជាបន្តបន្ទាប់ តែធ្លាក់ជោកជាំខ្លាំងចាប់តាំងពីយប់ថ្ងៃទី១៤ រហូតដល់ថ្ងៃទី១៥ ខែកក្កដា នេះ ហើយប៉ះពាល់ធ្ងន់ធ្ងរជាងគេ គឺលំនៅឋាន និងដំណាំកសិកម្មរបស់ពលរដ្ឋនៅក្នុងឃុំបួរ។
ជាមួយនឹងជំនន់ទឹកភ្លៀងដែលកំពុងវាយប្រហារនេះ អភិបាលស្រុកភ្នព្រឹក លោក សុង សុភ័ក្រ ក៏បានដឹកនាំមន្ត្រីនានា ចុះពិនិត្យស្ថានភាពទឹកជំនន់ និងផលដំណាំដែលខូចខាត នៅតាមបណ្ដាឃុំទាំង០៤នេះភ្លាមៗផងដែរ។
បើតាមមន្ត្រីបាននិយាយថា នៅព្រឹកថ្ងៃទី១៥ ខែកក្កដា អាជ្ញាធរស្រុក រួមនឹងមន្ត្រីនានា បានចុះអន្តរាគមន៍ជួយជន្លៀសពលរដ្ឋដែលលិចលង់ទៅកាន់ទីទូលសុវត្ថិភាព និងបានជួយឧបត្ថម្ភនូវអំណោយខ្លះដើម្បីសង្គ្រោះបឋមផងដែរ។ ប៉ុន្តែយ៉ាងណា អាជ្ញាធរ និងមន្ត្រីជំនាញ នូវមិនទាន់បង្ហាញរបាយការណ៍នៃការខូចខាត ទាំងលំនៅឋាន ទាំងដំណាំកសិកម្ម នៅឡើយទេ ព្រោះពេលនេះ មន្ត្រីជំនាញកំពុងចុះស្រាវជ្រាវនៅតាមមូលដ្ឋាន៕
ចែករំលែកព័តមាននេះ