រាជធានីភ្នំពេញ ៖ រថយន្តទ្រុងដឹកទំនិញ១គ្រឿងបើកជែងយានយន្តខាងមុខក៏បានជ្រុលទៅបុកជាមួយម៉ូតូស៊ុយហ្ស៊ុយគីវីវ៉ាសណ្ដោងកន្ទុយរ៉ឺម៉ក១គ្រឿង ដែលកំពុងបើកបរក្នុងទិសដៅបញ្ច្រាសគ្នា និងកំពុងបើកជែងយានយន្តខាងមុខដូចគ្នា។ បណ្ដាលឲ្យម៉ូតូនោះដាច់ចេញពីកន្ទុយរ៉ឺម៉ក និងជាប់ក្រោមរថយន្តរុញធ្លាក់ចូលទៅក្នុងប្រឡាយ រីឯកន្ទុយរ៉ឺម៉កដាច់កង់ និងចន្ទាសក្រឡាប់ខូចខាតទាំងស្រុង ប៉ុន្តែសំណាងល្អអ្នកបើកបររួចផុតពីគ្រោះថ្នាក់នេះ។
ឧប្បត្តិហេតុគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៥ និង៣០នាទីល្ងាចថ្ងៃទី១៤ ខែកក្កដា ឆ្នាំ២០២១ នៅតាមផ្លូវបេតុងតាមបណ្ដោយផ្លួវរថភ្លើង ស្ថិតនៅក្នុងភូមិកាកាប សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ រថយន្តទ្រុង១គ្រឿងនោះម៉ាកហ៊ីយ៉ាន់ដាយពណ៌ស ពាក់ស្លាកលេខ ភ្នំពេញ 3E-6281 ចំណែកម៉ូតូម៉ាកស៊ុយហ្ស៊ុយគីវីវ៉ា ពណ៌ខ្មៅពាក់ស្លាកលេខ តាកែវ 1A-0320 ហើយទាំងអ្នកបើកបររថយន្ត និងអ្នកបើកបរម៉ូតូសណ្ដោងរ៉ឺម៉កពុំត្រូវបានគេស្គាល់អត្តសញ្ញាណនោះឡើយ។ អ្នកឃើញហេតុការណ៍បាននិយាយថា នៅមុនពេលកើតហេតុភាគីទាំង២បានបើកបរធ្វើដំណើរក្នុងទិសដៅបញ្ច្រាសទិសគ្នា ដោយរថយន្តបើកបរក្នុងទិសដៅពីកើតទៅលិច ចំណែកម៉ូតូសណ្ដោងកន្ទុយរ៉ឺម៉កបើកបរក្នុងទិសដៅពីលិចទៅកើត។
លុះពេលទៅដល់ត្រង់ចំណុចកើតហេតុរថយន្តបសនវ៉ាជែងយានយន្តខាងមុខ ចំណែកឯម៉ូតូសណ្ដោងកន្ទុយរ៉ឺម៉កក៏បានវ៉ាជែងយានយន្តខាងមុខដូចគ្នា ទើបជ្រុលទៅបុកគ្នាពេញទំហឹងតែម្ដង។ ប្រភពដដែលបានប្រាប់ឲ្យដឹងបន្តទៀតថា ខណៈនោះបណ្ដាលឲ្យម៉ូតូដាច់ចេញពីកន្ទុយរ៉ឺម៉ក គាបជាប់ក្រោមរថយន្ត និងត្រូវរថយន្តរុញធ្លាក់ចូលប្រឡាយ រងការខូចខាតយ៉ាងដំណំ ចំណែកកន្ទុយរ៉ឺម៉កបានដាច់កង់ ដាច់ចន្ទាស និងក្រឡាប់ប៉ុន្តែសំណាងល្អអ្នកបើកបររួចផុតពីគ្រោះថ្នាក់ រីឯរថយន្តក៏បានរងការខូចខាតមុខដែរ។ ក្រោយពេលកើតហេតុនគរបាលខណ្ឌពោធិ៍សែនជ័យបានចុះទៅកាន់ទីនោះហើយឲ្យភាគីទាំងសម្របសម្រួលគ្នាដើម្បីបញ្ចប់រឿង៕ ដោយ ៖ យន់ ស៊ីថា
ចែករំលែកព័តមាននេះ