កញ្ញា ម៉ង់ ចាន់កញ្ញា តារាចម្រៀងហង្សមាស ទើបតែឡើងកូដបានបង្ហោះរូបបុរសសង្ហាម្នាក់ដែលនាងថតក្បែរកាយញញឹមដាក់គ្នាជាមួយការលំអរទេសភាព។ ភ្លាមៗ គេសន្និដ្ឋានថា
រាជធានីភ្នំពេញ ៖ កញ្ញា ម៉ង់ ចាន់កញ្ញា តារាចម្រៀងហង្សមាស ទើបតែឡើងកូដបានបង្ហោះរូបបុរសសង្ហាម្នាក់ដែលនាងថតក្បែរកាយញញឹមដាក់គ្នាជាមួយការលំអរទេសភាព។ ភ្លាមៗ គេសន្និដ្ឋានថា នោះជាបុរសគូស្នេហ៍ត្រូវចិត្តដែលនាងរកបានហើយ បង្ហាញអោយមហាជនដឹង។ ម្ល៉ោះហើយអ្នកគាំទ្រសុទ្ធតែចង់ដឹងថា នាងស្គាល់គ្នារបៀបណា ទើបឈានដល់ស្នេហា ព្រោះស្រីស្អាតរូបនេះកម្រនិយាយពីបញ្ហាស្នេហាណាស់។
យ៉ាងណាមិញ ម៉ង់ ចាន់កញ្ញា បាននិយាយឆ្លងឆ្លើយបញ្ជាក់ពីរឿងនេះអោយយើងដឹងថា « នាងបានស្គាល់គូស្នេហ៍ថ្មោងថ្មីនេះ តាមរយៈការណែនាំពីចាស់ទុំ។ បុរសដែលបងប្អូនឃើញនេះ មិនមែនជាអ្នកក្នុងរង្វង់សិល្បៈនោះទេ។ គាត់ជាអ្នកធ្វើការក្រុមហ៊ុនមួយ ដែលយល់ចិត្តនាង ស្គាល់ចិត្តនាងច្បាស់ ហើយនិស្ស័យយើងទាំង២ត្រូវគ្នាភាគច្រើន»។
ម៉ង់ ចាន់កញ្ញា ដែលក្រៅពីច្រៀងកំពុងបង្កើនជំនាញបញ្ចូលសំឡេងកុនផងនោះ លើកឡើងទៀតថា«ស្នេហាមួយនេះ មិនបានលាក់ចាស់ទុំទេ។ពួកយើងសុទ្ធតែដឹងឮសងខាង និងបានសាច់ញាតិទាំង២ចូលមកនិយាយដឹងឮរួចហើយ គ្រាន់តែមិនធំដុំព្រោះសម័យកូវីដ។ ចំណែករឿងរៀបការ ប្រហែលទុកពេលសិន ដោយសារឥឡូវ ដូចដឹងហើយកំពុងផ្ទុះកូវីដរង់ចាំអោយស្ងប់ ហើយរួមគ្នាធ្វើការសន្សំលុយទុកក៏ល្អ ទាន់មិនទាន់ដល់ពេលចំណាយ»។
គួរបញ្ជាក់ថា ម៉ង់ ចាន់កញ្ញា គឺជាអតីតបេក្ខភាពប្រឡងចម្រៀងខេមបូឌាអាយឌល ដែលចូលដល់វគ្គផ្សាយបន្តផ្ទាល់បានច្រើនសប្តាហ៍ដែរ។ នាងមានសំឡេងពីរោះអាចបត់បែនបាន។ ហើយមុនក្លាយជាតារាលេចធ្លោ គឺនាងហែលឆ្លងការដើរច្រៀងសន្សំលុយតាមហាងមួយចំនួន ក្នុងន័យជួយគ្រួសារ។ ការតស៊ូក្រោយចប់ប្រឡង និងមានទេពកោសល្យល្អ នាងបានខាងផលិតកម្មហង្សមាស ផ្តល់បទចម្រៀង អោយច្រៀងបានប៉ុន្មានបទដែរ ជាពិសេសបានឱកាសបង្ហាញមុខតាមតន្ត្រីហង្សមាសជាច្រើនកម្មវិធី ដើម្បីពង្រីកស្នាដៃទៀតផង។
ចែករំលែកព័តមាននេះ