រាជធានីភ្នំពេញ ៖ គូប្រកួតដណ្ដើមប្រាក់លានខារ៉ាបាវ នៅលើសង្វៀនស៊ីអិនស៊ី នាថ្ងៃសៅរ៍ ទី១៧ កក្កដាខាងមុខនេះ សុទ្ធតែជាអ្នកប្រដាល់ជើងខ្លាំងដែលត្រូវប៉ះគ្នា ក្នុងនោះមានកីឡាករសូត្រ វាសនាមកពីក្លិបបក្សីស្លាបដែកត្រូវប៉ះជាមួយកីឡាករ វេង សុភ័ក្រមកពីក្លិបកីឡាប្រដាល់បញ្ជាការដ្ឋានទ័ពពិសេស ខណៈកីឡាករអេ ណារ័ត្នសមាគមកីឡាប្រដាល់កងយោធពលខេមរភូមិន្ទប៉ះកីឡាករផាន់ សុផាតមកពីក្លិបពុទ្ធសេរីវង្សពោធិសែនជ័យ។
រវាងកីឡាករសូត្រ វាសនានិងកីឡាករវេង សុភ័ក្រអត់ដែលប៉ះគ្នាបីមុនមកនោះទេ ប៉ុន្តែគូនេះសុទ្ធសឹងតែជាអ្នកប្រដាល់ដែលមានបទពិសោធន៍នៅលើសង្វៀនយូរឆ្នាំមកហើយដូចគ្នា ។ ម្យ៉ាងវិញទៀត មួយរយៈមកនេះគេទាំងពីរឧហស្សាឃើញលេចមុខនៅលើសង្វៀនញឹកញាប់ទៀតផង ។ សូត្រ វាសនាគេមានប្រៀបខាងកម្ពស់បន្តិចមែន តែល្វែងក្រោមរបស់គេរាងជ្រាយបន្តិចហើយ។ប៉ុន្តែបើនិយាយពីស្នៀតកែងនិងជង្គង់វិញនោះគឺល្អខ្លាំងណាស់។រីឯស្នៀតកណ្ដាប់ដៃនិងស្នៀតជើងវិញ រាងអន់បន្តិចហើយ។មិនតែប៉ុណ្ណោះវាសនា ល្អបានតែចូលគៀកប៉ុណ្ណោះ។
ទោះជាយ៉ាងណា សម្រាប់ការប្រកួតលើកនេះគេក៏មិនហ៊ានមើលស្រាលលើវេង សុភ័ក្រ នោះដែរ ។ អ្នកប្រដាល់មកពីក្លិបបញ្ជាការដ្ឋានទ័ពពិសេសម្នាក់នេះមានកម្លាំងរឹងមាំល្អខ្លាំងណាស់ ជាពិសេសស្នៀតកណ្ដាប់ដៃម៉ាត់បានត្រង់ ខ្លាំងនិងចំគោលដៅបានល្អទៀតផង ។ នៅមានស្នៀតជើងទៀតដែលអាចទាត់ចេញរហ័សដូចផ្លេកបន្ទោ អាចផ្ដួលគូប្រកួតបានដោយងាយបំផុត ។ វេង សុភ័ក្រ គេមានជំនឿចិត្តយ៉ាងខ្លាំងក្នុងការក្លាយជាម្ចាស់ប្រាក់លានលើកនេះ ។ ប៉ុន្តែកីឡាកររូបនេះគេតែងតែគិតថាគូប្រកួតរបស់គេខ្លាំង មិនអាចធ្វេសប្រហេសបានឡើយ។
ដោយឡែកអេ ណារ័ត្ន លើកនេះប៉ះចំអ្នកប្រដាល់ជើងចាស់ ផាន់ សុផាត ដែលបាត់មុខពីលើសង្វៀនមួយរយៈមកហើយ ។ អេ ណារ័ត្ន ថ្វីត្បិតមួយរយៈមកនេះមានមុខនៅលើសង្វៀនញឹកញាប់មែន តែលើកនេះបើហ៊ានតែប្រហេសគឺអាចរបូតតំណែងជាម្ចាស់ប្រាក់លានមិនខានឡើយ ។ កូនប្រុសលោកអេ ភូថង រូបនេះ ការប្រកួតប៉ុន្មានលើកចុងក្រោយរបស់គេមិនសូវដែលចាញ់ឡើយ។ប៉ុន្តែសម្រាប់ការមកប៉ះជាមួយផាន់ សុផាត ដែលជាអ្នកប្រដាល់ចាស់វស្សាមានបទពិសោធន៍ប្រកួតនៅលើសង្វៀនយូឆ្នាំមកហើយនោះមិនដឹងថាយ៉ាងណានោះទេ ។ ប៉ុន្តែជាមួយនឹងការបាត់មុខពីលើសង្វៀនយូបែបនេះ មិនមានអ្វីដែលធ្វើឱ្យអេ ណារ័ត្ន ព្រួយបារម្ភនោះទេ បើនិយាយពីកម្លាំងគឺប្រហែលជាចុះខ្សោយជាងមុនបន្តិចហើយ នៅសល់តែល្បិចប្រកួតប៉ុណ្ណោះ។តែសម្រាប់អ្នកតាមដានការប្រកួតមួយចំនួនថាគូនេះ ម្យ៉ាងម្នាក់ម្ខាងអាងកម្លាំងរីឯម្ខាងទៀតអាងល្បិច៕
ចែករំលែកព័តមាននេះ