រាជធានីភ្នំពេញ ៖ ការប្រកួតយ៉ាងប្ដូរផ្ដាច់នៅក្នុងដំណាក់កាលចុងក្រោយក្នុងជុំទី១ នៃបាល់ទាត់ក្របខណ្ឌថ្នាក់ជាតិពានរង្វាន់ Metfone C-League រវាងក្រុមណាហ្គាខប និងក្រុមភ្នំពេញក្រោន នៅទីលានពហុកីឡដ្ឋានជាតិ កាលពីថ្ងៃពុធ ទី២ មិថុនា កន្លងមកនេះ លទ្ធផលទទួលបានគឺ២-២ស្មើ ។ ក្រុម ទាំង២នេះ សុទ្ធតែមានសមត្ថភាពឈានទៅ លើកពាននៅក្នុងរដូវកាលបញ្ចប់នៃការ ប្រកួតក្នុងជុំទី២បន្ដទៀតបានដូចគ្នា ។ ទោះ បីកាលពីរដូវកាលចាស់ក្រុមណាហ្គាខប ជាម្ចាស់ជើងឯកបាល់ទាត់ក្របខណ្ឌថ្នាក់ជាតិ តែក្រុមភ្នំពេញក្រោនក៏ជាក្រុមដែលធ្លាប់ គ្រប់គ្រងពានសម្ដេចហ៊ុន សែន ជាច្រើន ជំនាន់រួចមកហើយដែរ និងក៏ធ្លាប់ធ្វើជាម្ចាស់ ពានរង្វាន់បាល់ទាត់ថ្នាក់ជាតិនេះដែរ។
ដូច្នេះហើយការប៉ះគ្នាលើកនេះ ទោះបី ទីលានមានការរអិលខ្លះៗដែលបណ្ដាលមកពីទឹកភ្លៀងនៅមុនពេលប្រកួតយ៉ាងណាក្ដី ក៏ ក្រុមទាំង២បានបង្ហាញនូវភាពរឹងមាំ និង បង្កើនសមត្ថភាពនៃការលេងយ៉ាងខ្លាំងក្លា បំផុត ព្រោះថាការរកឱ្យបាន៣ពិន្ទុ សំរាប់ គេពិតជាមានសារសំខាន់ខ្លាំងណាស់ ។ ក្រុមណាហ្គាខប បើសិនជាអាចយកឈ្នះនៅក្នុង ការប្រកួតលើកនេះ គេនឹងបានឡើងទៅឈរ នៅលំដាប់ថ្នាក់ជួរមុខគេក្នុងតារាង ប៉ុន្ដែគេ មានលទ្ធភាពបានត្រឹមតែយកស្មើជាមួយ ក្រុមភ្នំពេញក្រោនប៉ុណ្ណោះ ។ អ្វីដែលធ្វើឱ្យ ក្រុមណាហ្គាខប កាន់តែតក់ស្លុតថែមទៀត នោះ គឺនៅពេលចាប់ផ្ដើមប្រកួតបាន៣នាទី ដំបូង ត្រូវក្រុមភ្នំពេញក្រោនរកបាន១គ្រាប់ នាំមុខរួចទៅហើយ ដែលទាត់បញ្ចូលទីដោយ កីឡាករកែវ សុងន ពាក់អាវលេខ១០ ។
បន្ទាប់មកចូលដល់នាទីទី១០ ត្រូវកីឡាករ Justine Uche Prince ពាក់អាវលេខ២០ ទាត់ចូលបាន១គ្រាប់បន្ថែមទៀត ។ ប៉ុន្ដែរំលងបាន៤នាទីគឺនៅនាទីទី១៤ ត្រូវកីឡាករ មាស ចាន់ណា ពាក់អាវលេខ៧ ខ្សែប្រយុទ្ធ ឆ្នើមរបស់ក្រុមណាហ្គាខប សង្គ្រោះបាន១ គ្រាប់សងវិញយ៉ាងល្អបំផុត ។
ការប្រកួតនៅក្នុងតង់ទី១ រវាងក្រុមទាំង ២ មានសភាពស្វិតស្វាញយ៉ាងខ្លាំង ប៉ុន្ដែក្រុម ណាហ្គាខប ដែលមានការប្ដេជ្ញាចិត្ដយ៉ាងខ្លាំង នោះ ចូលដល់តង់ទី២ គឺគេនៅតែរក្សាគោល ជំហរដោយមិនតក់ស្លុតឡើយ ។ ទីបំផុតនៅ ជិតទីបញ្ចប់នៃម៉ោងប្រកួតក្នុងនាទីទី៧៩ ត្រូវកីឡាករទៀប វឌ្ឍនៈ ពាក់អាវលេខ១០ ខ្សែប្រយុទ្ធក្រុមណាហ្គាខប ទាត់បាល់បញ្ចូល ទីខាងក្រុមភ្នំពេញក្រោន បានសំរេច១គ្រាប់ ទៀត ធ្វើឱ្យ លទ្ធផលបញ្ចប់ការប្រកួតគឺ
២-២ស្មើ ។
ចំពោះលទ្ធផលសរុបបញ្ចប់នៅជុំទី១នេះ ក្រុមបៀលប្រាយណាយធីត ឈរនៅលេខ រៀងជួរមុខគេ ដោយឆ្លងកាត់ការប្រកួត៩ លើកមកនេះ គេរកបាន២២ពិន្ទុ ។ ចំណែក ក្រុមណាហ្គាខប ឈរនៅលេខរៀងទី២ មាន ២១ពិន្ទុ ក្រុមភ្នំពេញក្រោនមាន១៩ពិន្ទុ ក្រសួងការពារជាតិមាន១៧ពិន្ទុ ក្រុមគីរីវង់ សុខសែនជ័យមាន១២ពិន្ទុ ខេមរាកីឡាមាន ៧ពន្ទុ ក្រុមព្រែកប្រាកីឡាមាន៦ពិន្ទុ ក្រុមវត្ដ ភ្នំ៦ពិន្ទុ និងក្រុមតាខ្មៅមាន៣ពិន្ទុ ៕
ចែករំលែកព័តមាននេះ