ផ្សារសាមគ្គី ហៅផ្សារប៉ាហ៊ី ក្នុងខេត្តប៉ៃលិន បើកដំណើរការឡើងវិញហើយ ក្រោយបិទអស់២៥ថ្ងៃ
- ប៉ៃលិន
ខេត្តប៉ៃលិន ៖ រហូតមកដល់ព្រឹកថ្ងៃទី១៣ ខែកក្កដា ឆ្នាំ២០២១នេះ រដ្ឋបាលខេត្តប៉ៃលិន បានចេញសេចក្តីសម្រេចបើកឱ្យដំណើរ
ខេត្តប៉ៃលិន ៖ រហូតមកដល់ព្រឹកថ្ងៃទី១៣ ខែកក្កដា ឆ្នាំ២០២១នេះ រដ្ឋបាលខេត្តប៉ៃលិន បានចេញសេចក្តីសម្រេចបើកឱ្យដំណើរការ លក់ដូរក្នុងផ្សារសាមគ្គី ហៅប៉ាហ៊ីឡើងវិញហើយ ក្រោយពីបិទផ្សារទាំងមូលអស់រយ:ពេល២៥ថ្ងៃ ដោយសារមានអាជីវករមួយចំនួនឆ្លងជំងឺកូវីដ ១៩ ។ គ្រាន់តែឃើញអាជ្ញាធរខេត្ត ដឹកនាំក្រុមការងារចុះកាត់ខ្សែពណ៌លឿង ដែលចងហ៊ុំព័ទ្ធជុំវិញផ្សារចេញភ្លាម អាជីវករម្នាក់ៗ ត្រេកអរសប្បាយរីករាយយ៉ាងខ្លាំង រកអ្វីប្រៀបផ្ទឹមពុំបាន និងអរគុណដល់អាជ្ញាធរម្តងហើយម្តងទៀត ព្រោះអាចបើកលក់ដូរ ដើម្បីបានថវិកាសម្រាប់ផ្គត់ផ្គង់ជីវភាពប្រចាំថ្ងៃផងដែរ ។
បើយោងតាមលិខិតបានឱ្យដឹងថា ក្នុងការអនុញ្ញាតឱ្យដំណើរការឡើងវិញ រដ្ឋបាលក្រុងត្រូវដឹកនាំការអនុវត្តវិធានការសុខាភិបាល និងវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ ។ ម្យ៉ាងវិញទៀត ត្រូវយកចិត្តទុកដាក់ និងទទួលខុសត្រូវខ្ពស់លើការពង្រឹងវិធានការសុវត្ថិភាពផ្នែកសុខាភិបាល ជាពិសេសវិធានការ «៣ការពារ ៣កុំ» របស់រាជរដ្ឋាភិបាលកម្ពុជា និងការអនុវត្តការផាកពិន័យអន្តរការណ៍ចំពោះបុគ្គល មិនគោរពដោយចេតនា នូវវិធានការរដ្ឋបាល ដែលរាជរដ្ឋាភិបាល និងរដ្ឋបាលខេត្ត បានដាក់ចេញ ដោយមិនគិតដល់បទល្មើស ព្រហ្មទណ្ឌដទៃទៀតឡើយ ។
ចំណែកលោក ចេញ ញ៉ាន់ អភិបាលរងខេត្តប៉ៃលិន តំណាងឱ្យលោកជំទាវ បាន ស្រីមុំ អភិបាលខេត្ត បានក្រើនរំលឹកដល់អាជីវករទាំងអស់ដែលកំពុងនាំគ្នាបើកតូបលក់ដូរឡើងវិញឱ្យបន្តថែរក្សាអនាម័យ តាមតូបលក់ដូររបស់ខ្លួន ដោយប្រុងប្រយ័ត្ន ត្រូវពាក់ម៉ាស លាងដៃនឹងអាល់កុល ឬជែល និងត្រូវរក្សាគម្លាតសុវត្ថិភាព ដើម្បីកុំឱ្យមានការឆ្លងរាលដាលនៃជំងឺនេះបន្តទៀត ។
លោកបញ្ជាក់ទៀតថា ការបិទផ្សារបន្ថែមទៀតនេះ មិនមែនខាងរដ្ឋបាលខេត្ត មានការខឹងគុំគួននឹងអាជីវករដែលបានបើកតូបក្នុងផ្សារលក់ដូរមុនពេលកំណត់នោះទេ ពោលគឺដោយអាជ្ញាធរខេត្ត ដែលជាអាណាព្យាបាល មានការយកចិត្តទុកដាក់ចំពោះសុខុមាលភាពប្រជាពលរដ្ឋទាំងអស់ ដោយធ្វើឡើងដើម្បីពង្រឹង និងអនុវត្តច្បាប់ ហើយរក្សាការពារកុំឱ្យមានការឆ្លងរាលដាល ជំងឺកូវីដ១៩ ក្នុងផ្សារបន្តប៉ុណ្ណោះ ។ លើសពីនេះ នៅក្នុងខេត្តប៉ៃលិន តាំងពីមានករណីឆ្លងរាលដាលជំងឺកូវីដ១៩មក គឺប្រជាពលរដ្ឋកើតជំងឺនេះ មិនទាន់ដល់១០០នាក់នៅឡើយទេ ដោយសារតែអាជ្ញាធរខេត្ត មានការយកចិត្តទុកដាក់ខ្លាំងចំពោះសុវត្ថិភាព។
ចំណែកអាជីវករ ដែលបានបើកតូបឡើងវិញ បាននាំគ្នាត្រេកអរសប្បាយរីករាយ ក៏បានលើកដៃថ្លែងអំណរគុណដល់អាជ្ញាធរខេត្ត ដែលបានយកចិត្តទុកដាក់ចំពោះសុខភាពពួកគាត់ ក៏ដូចជាប្រជាពល រដ្ឋទូទាំងខេត្ត ខណ:មានករណីឆ្លងជំងឺកូវីដ១៩ ។ ពួកគាត់ក៏សូមជូនពរដល់អាជ្ញាធរខេត្តទាំងអស់ ទទួលបាននូវសុខភាពល្អ កម្លាំងមាំមួន ប្រាជ្ញាឈ្លាសវៃ ឈ្នះអស់ជំងឺកូវីដ១៩ ដើម្បីដឹកនាំខេត្តឱ្យមានការរីកចម្រើន ៕
ចែករំលែកព័តមាននេះ