ក្លិបវិសាខា បង្ហាញខ្សែប្រយុទ្ធចំណូលថ្មី១រូប ជំនួសតំណែងកីឡាករអង់គ្លេសដែលចាកចេញ
- ភ្នំពេញ
រាជធានីភ្នំពេញ ៖ ក្លឹបបាល់ទាត់ វិសាខា នៅរសៀលថ្ងៃទី១១ ខែកក្កដានេះ បានបង្ហាញខ្សែប្រយុទ្ធចំណូលថ្មី ១រូប គឺកីឡាករប្រេស៊ីល
រាជធានីភ្នំពេញ ៖ ក្លឹបបាល់ទាត់ វិសាខា នៅរសៀលថ្ងៃទី១១ ខែកក្កដានេះ បានបង្ហាញខ្សែប្រយុទ្ធចំណូលថ្មី ១រូប គឺកីឡាករប្រេស៊ីល Cristian Alex ដែលទំនងត្រូវបំពេញកូតាកីឡាករបរទេស ជំនួសកៅអីខ្សែបម្រើសញ្ជាតិអង់គ្លេសកីឡាករ Charlie Machell ដែលបានចាកចេញ កាលពីដើមខែឧសភា ដើម្បីត្រៀមជើងទី២ នៃពានរង្វាន់មិត្តហ្វូនខេមបូឌានលីគ ឆ្នាំ២០២១។
កីឡាករCristian Alex មានវ័យ ២៧ឆ្នាំគេមានបទពិសោធន៍លើទីលានជាង១០ឆ្នាំមកហើយ ទាំងនៅតំបន់អឺរ៉ុប និងអាស៊ី ពិសេសនៅអាស៊ាន។ រូបគេធ្លាប់លេងឲ្យក្លឹបជាច្រើននៅថៃ ជាក់ស្ដែង ៣រដូវកាលចុងក្រោយ កីឡាករកម្ពស់១.៨៨ម៉ែត្ររូបនេះ បានលេងឲ្យក្លឹប Chiangmai FC នៅឆ្នាំ២០១៨ មុនផ្ទេរទៅក្លឹប Khonkaen FC (ខ្ចីជើង) កាលពីឆ្នាំ២០១៩ និងចុងក្រោយលេងឲ្យក្លឹប Songkhla FC ក្នុងរដូវកាលឆ្នាំ២០២០-២០២១ មុនផ្ទេរមកវិសាខាពេលនេះ។
ក្រុមម្ចាស់ជើងឯកពានសម្ដេចតេជោ ហ៊ុន សែន ឆ្នាំ២០២០ នេះ បានបញ្ជាក់ថា «តាងនាមគ្រួសារបាល់ទាត់វិសាខា សូមសម្ដែងការស្វាគមន៍យ៉ាងកក់ក្ដៅ ចំពោះវត្តមានខ្សែប្រយុទ្ធចំណូលថ្មីរបស់យើង Cristian Alex។ ពួកយើងសង្ឃឹមថា វត្តមានរបស់ Alex នឹងរួមចំណែកជួយក្លឹបរបស់យើង ឆ្ពោះទៅរកភាពជោគជ័យថ្មីៗបន្ថែមទៀត នារដូវកាលក្នុងនេះ ហើយបង្ហាញនូវអ្វីដែលថ្មី និងអស្ចារ្យជូនដល់បងប្អូនអ្នកគាំទ្ររបស់យើងនាពេលឆាប់ៗខាងមុខ»។
សូមបញ្ជាក់ថា ការបង្ហាញកីឡាករចំណូលថ្មីនេះ ធ្វើឡើងជាង១សប្ដាហ៍ មុនបើកទីផ្សារដោះដូរកីឡាករ នៅជើងទី២ នៃលីគកំពូលកម្ពុជា ខណៈទីផ្សារដោះដូរកីឡាករ នឹងចាប់ផ្ដើមពីថ្ងៃទី២១ ខែកក្កដា រហូតដល់ថ្ងៃទី២០ ខែសីហា ឆ្នាំ២០២១ ខាងមុខ។ បច្ចុប្បន្ន ក្រុមវិសាខា ទើបប្រកួតជើងទី១ បាន៦ប្រកួតប៉ុណ្ណោះ ដោយរកបាន១២ពិន្ទុក្នុងដៃ ជាមួយលទ្ធផល៦ប្រកួត ឈ្នះ៣ និងស្មើ៣ និងមិនទាន់ស្គាល់ចាញ់ឡើយ៕
ចែករំលែកព័តមាននេះ