បុរសម្នាក់បានលួចយករថយន្តរបស់ឪពុក រួចក៏ដឹកមិត្តភក្តិដើរផឹកស៊ីស្រវឹងជោកជាំ ស្រាប់តែរេចង្កូតទៅបុកកម្មករប្រមូលសំរាម ដែលកំពុងតែដើររើសសំរាមតាមដងផ្លូវ បណ្តាលឲ្
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់បានលួចយករថយន្តរបស់ឪពុក រួចក៏ដឹកមិត្តភក្តិដើរផឹកស៊ីស្រវឹងជោកជាំ ស្រាប់តែរេចង្កូតទៅបុកកម្មករប្រមូលសំរាម ដែលកំពុងតែដើររើសសំរាមតាមដងផ្លូវ បណ្តាលឲ្យស្លា.ប់២នាក់ និងរងរបួសធ្ងន់ម្នាក់ ចំណែករថយន្តបង្កវិញព្យាយាមបើករត់ខ្លួន តែត្រូវបានប្រជាពលរដ្ឋដេញតាមឃាត់បានអ្នកបើកភ្លាមៗតែម្តង បង្កអោយមានការភ្ញាក់ផ្អើលកាលពីវេលាម៉ោង១និង៥០នាទីរំលងអធ្រាត្រឈានចូលថ្ងៃទី១២ ខែកក្កដា ឆ្នាំ២០២១ នៅតាមបណ្តោយផ្លូវសហព័ន្ធរុស្សី មុខផ្សារពោធិ៍ចិនតុង ស្ថិតក្នុងភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ ។
សេចក្តីរាយការណ៍បន្តថា ស.ពរងគ្រោះខាងលើ មានទី១-ឈ្មោះ ប៉ែន ចន្ទ័ ភេទប្រុស អាយុ៤២ឆ្នាំ ស្នាក់នៅភូមិម័ល សង្កាត់ដង្កោ ខណ្ឌដង្កោ មានស្រុកកំណើតនៅភូមិចំបក ឃុំចេក ស្រុកស្វាយជ្រុំ ខេត្តស្វាយរៀង។ ទី២- ឈ្មោះសាន់ ឆៃ ភេទប្រុស អាយុ៣១ឆ្នាំ ស្នាក់នៅភូមិម័ល សង្កាត់ដង្កោ ខណ្ឌដង្កោ មានស្រុកកំណើតភូមិត្រាច ឃុំដូនស ស្រុកស្វាយជ្រុំ ស្វាយរៀង។ ចំណែកជនរងគ្រោះទី៣- ឈ្មោះ ដួង គង់ ភេទប្រុស អាយុ៤២ឆ្នាំ រងរបួសធ្ងន់ ស្នាក់នៅភូមិម័ល សង្កាត់ដង្កោ ខណ្ឌដង្កោ មានស្រុកកំណើតនៅខេត្តព្រៃវែង។
តាមប្រភពព័ត៌មានពីអ្នកបើករថយន្តដឹកសំរាមក្រុមហ៊ុន MIZUDA ម្នាក់បានអោយដឹងថា នៅមុនពេលកើតហេតុ ក្រុមកម្មករកើបសំរាមក្រុមហ៊ុន MIZUDA មានគ្នា៤នាក់ ក្នុងនោះគាត់ជាតៃកុងរថយន្តម្នាក់ និងកម្មករអ្នកកើបសំរាមមានគ្នាចំនួន៣នាក់ ។ ខណៈពេលកំពុងតែឈប់រថយន្ត ហើយក្រុមកម្មករកើបសំរាមកំពុងដើររើសសំរាមតាមចិញ្ចើមផ្លូវនោះ ក៏ស្រាប់តែឃើញរថយន្តបង្កបើកបរយ៉ាងលឿន ក្នុងទិសដៅពីកើតទៅលិច លុះមកដល់ចំណុចកើតហេតុ ក៏បានរ៉េចង្កូតមកផ្នែកខាងស្តាំចិញ្ចើមផ្លូវ រួចក៏បុកជនរងគ្រោះទាំង៣នាក់ប៉ើងពីកន្លែងកើតជាង១០ម៉ែត្រ បណ្តាលឲ្យបាក់ដៃ បាក់ជើង ស្លា.ប់ចំនួន២នាក់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសធ្ងន់ ចំណែករថយន្តបង្កវិញ នៅមិនទាន់អស់ល្បឿននោះទេក៏បានបុកដើមក្ងោកនៅចិញ្ចើមផ្លូវរងការខូចខាតផងដែរ ធ្វើឱ្យរថយន្តបែកកង់មួយចំហៀងខាងស្ដាំមុខក្រោយ ។ រីឯរថយន្តបង្កមិនបានបុករថយន្តប្រមូលសំរាមទេ ។
ប្រភពព័ត៌មានដដែលបានបន្តទៀតថា ខណៈពេលភ្លាមៗនោះដែរ រថយន្តបង្កបានព្យាយាមបើករត់ចេញពីកន្លែងកើតហេតុជាង១០០ម៉ែត្របន្តទៀត តែត្រូវបានប្រជាពលរដ្ឋដេញតាមរថយន្តបង្ក រួចឃាត់អ្នកបើករថយន្តបង្កបានភ្លាមៗតែ ចំណែកអ្នករួមដំណើរ៦នាក់ទៀតដែលស្រវឹងដូចគ្នា បាននាំគ្នារត់ចោលអ្នកបើករថយន្តបាត់អស់ទៅ ។ បន្ទាប់មក សមត្ថកិច្ចនគរបាលប៉ុស្តិ៍ក៏បានមកដល់កន្លែងកើតហេតុ និងបានរាយការណ៍ទៅផ្នែកជំនាញចរាចរណ៍ខណ្ឌពោធិ៍សែនជ័យ ភ្លាមៗផងដែរ។
ក្រោយពេលកើតហេតុ សាច់ញាតិខាងរថយន្តបង្កបានមកដល់ ហើយបានឲ្យដឹងថា ពេលដែលឪពុកម្តាយសម្រាកលង់លក់អស់ បុរសរូបនេះបានលួចយករថយន្តឪពុកទៅបើកដឹកមិត្តភក្តិដើរលេងផឹកស៊ីនៅកោះពេជ្រ និងវត្តបុទុម រហូតស្រវឹង ទើបបើករថយន្តត្រឡប់ទៅផ្ទះវិញ តែក៏វាក់អើនឹងរថយន្តប្រមូលសំរាម ក៏បានរេចង្កូតទៅបុកអ្នកកើបសំរាមពេញទំហឹងតែម្តង ។
ដោយឡែករថយន្តបង្ក ត្រូវបានកម្លាំងនគរបាលខណ្ឌពោធិ៍សែនជ័យ ប្រគល់ទៅផ្នែកជំនាញចរាចរណ៍រាជធានីភ្នំពេញ ដើម្បីធ្វើការវាស់វែង និងស្ទូចយករថយន្តបង្ក ព្រមទាំងតៃកុងរថយន្ត យកទៅផ្នែកជំនាញ ចំណែកស.ពជនរងគ្រោះទាំង២នាក់ សមត្ថកិច្ចបានធ្វើលិខិតប្រគល់ស.ពអោយក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើតផងដែរ ៕
ចែករំលែកព័តមាននេះ