ក្នុងឋានៈឥណ្ឌូណេស៊ីជាប្រធានអាស៊ាន ដែលទទួលការងារពីក្រុមប្រឹក្សាសន្តិសុខអង្គការសហប្រជាជាតិឲ្យសម្របសម្រួលបញ្ហាសង្គ្រាមរវាងថៃ-កម្ពុជា ប្រទេសឥណ្ឌូណេស៊ីត្រូវតែអនុវត្តនូវកាតព្វកិច្ចរបស់ខ្លួនជាបន្ទាន់ ក្នុងការដោះស្រាយបញ្ហាកម្ពុជា-ថៃ ហើយគប្បីបញ្ជូនអ្នកសង្កេតការណ៍យោធាមកកម្ពុជាជាបន្ទាន់ ពីព្រោះវត្តមានយោធាឥណ្ឌូណេស៊ី គឺមានសារសំខាន់ណាស់សម្រាប់ឃ្លាំមើលបទឈប់បាញ់ និងកិច្ចការពារ ព្រមទាំងសង្គ្រោះប្រាសាទព្រះវិហារ និងជាការរួមវិភាគទានក្នុងការកសាងជំនឿទុកចិត្តសម្រាប់ប្រទេសទាំងពីរ ក៏ដូចជាការទប់ស្កាត់គ្រោះថ្នាក់បន្ថែមទៀតនៃឧក្រិដ្ឋកម្មប្រឆាំងនឹងវប្បធម៌។
បន្ទាប់ពីកិច្ចប្រជុំនៅហ្សាការតា ប្រទេសឥណ្ឌូណេស៊ី ដែលមានប្រធានអាស៊ានជាអ្នកសម្របសម្រួល កាលពីថ្ងៃទី២២ កុម្ភៈ ឆ្នាំ២០១១ កម្ពុជា-ថៃ ព្រមទទួលយកក្រុមអ្នកសង្កេតការណ៍នេះបើយោងតាមការចុះផ្សាយរបស់សារព័ត៌មានហ្សាការតាប៉ុស្តិ៍ កាលពីថ្ងៃទី២៨ មីនា ឆ្នាំ២០១១ ។
នៅថ្ងៃទី២៥ មីនា ឆ្នាំ២០១១កន្លងមកនេះ រដ្ឋមន្រ្តីការបរទេសឥណ្ឌណេស៊ី បានផ្ញើលិខិតមកកាន់លោកឧបនាយករដ្ឋមន្រ្តីហោ ណាំហុង និងលោកកាស៊ីត ភិរម្យ រដ្ឋមន្រ្តីការបរទេសថៃ ដោយបានបញ្ជាក់ថា ឥណ្ឌូណេស៊ីបានទទួលរួចហើយនូវលិខិតចុះថ្ងៃទី១៦ មីនា ឆ្នាំ២០១១ របស់កម្ពុជា និងលិខិតចុះថ្ងៃទី១៩ មីនា ឆ្នាំ២០១១ របស់ថៃ ដែលបានឆ្លើយតបទៅនឹងលិខិតរបស់ឥណ្ឌូណេស៊ី កាលពីថ្ងៃទី១៥ មីនា ឆ្នាំ២០១១ ។ ក្នុងនោះដែរ រដ្ឋមន្រ្តីឥណ្ឌូណេស៊ី ក៏បានថ្លែងអំណរគុណចំពោះរដ្ឋាភិបាលកម្ពុជាដែលបានទទួលយកនូវលក្ខខណ្ឌប្រតិបត្តិដែលត្រូវបានកែសម្រួលចុងក្រោយ ហើយក៏បានកត់សម្គាល់ផងដែរនូវគំនិតរបស់កម្ពុជាស្តីពីរូបមន្ត ដើម្បីដាក់ឱ្យលក្ខខណ្ឌប្រតិបត្តិនេះចូលជាធរមានសម្រាប់ឲ្យមានការពិភាក្សាបន្តទៀត ។ ក្នុងនោះដែរ រដ្ឋមន្រ្តីការបរទេសឥណ្ឌូណេស៊ី ក៏បានអរគុណដល់រដ្ឋាភិបាលកម្ពុជាដែលបានឯកភាពចំពោះសំណើកោះប្រជុំគណៈកម្មការព្រំដែនទូទៅ (GBC) និងកិច្ចប្រជុំគណៈកម្មការខណ្ឌ សីមាបង្គោលព្រំដែនគោក (JBC) កម្ពុជា-ថៃ ក៏ដូចជាការប្រជុំក្រៅផ្លូវការរដ្ឋមន្រ្តីការបរ ទេសកម្ពុជា-ថៃ ដែលគ្រោងនឹងធ្វើនៅបូហ្គ័រ ថ្ងៃទី៧-៨ មេសា ឆ្នាំ២០១១។
លោក Prawit Wongsuwon រដ្ឋមន្រ្តីក្រសួងការពារជាតិថៃបាននិយាយថា ការប្រជុំគណៈកម្មការព្រំដែនទូទៅ (GBC) ដែលគ្រោងប្រជុំនឹងធ្វើនៅបូហ្គ័រ គឺជាជំហានមួយដ៏ត្រឹមត្រូវ ប៉ុន្តែកុំឱ្យមានវត្តមានប្រទេសឥណ្ឌូណេស៊ីចូលរួមក្នុងអង្គប្រជុំ នេះបើតាមការផ្សាយរបស់សារព័ត៌មានបាងកកប៉ុស្តិ៍ចុះថ្ងៃទី៣០ មីនា ឆ្នាំ ២០១១ ។ ថ្មីៗនេះ តាមការផ្សាយរបស់សារព័ត៌មានដឺហ្សាការតា កាលពីថ្ងៃទី២៨ មីនា ឆ្នាំ២០១១ បានដកស្រង់ប្រសាសន៍លោក Marty Natalegawa រដ្ឋមន្រ្តីការបរទេសឥណ្ឌូណេស៊ី និងជាប្រធានអាស៊ានដែលបាននិយាយថា «អាស៊ានមានផែនការបញ្ជូនអ្នកសង្កេតការណ៍យោធាទៅកាន់តំបន់ជម្លោះថៃ-កម្ពុជាដែលត្រូវពន្យារពេលដោយរង់ចាំការអនុម័តពីទីក្រុងបាងកក និងភ្នំពេញ ជាពិសេសទាក់ទងនឹងអ្នកសម្របសម្រួល ដើម្បីដឹងពីទីកន្លែងពិតប្រាកដគួរតែទៅសង្កេតការណ៍ ។
នៅក្នុងពិធីចែកសញ្ញាបត្រដល់និសិត្សនៅវិទ្យាស្ថានជាតិអប់រំ កាលពីថ្ងៃទី២៨ មីនា ឆ្នាំ ២០១១ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសាសន៍ថា «កិច្ចប្រជុំគណៈកម្មការព្រំដែនទូទៅ (GBC) និងកិច្ចប្រជុំគណៈកម្មការកំណត់បង្គោលព្រំដែនរួម (JBC) ដែលគ្រោង នឹងធ្វើនៅថ្ងៃទី៧-៨មេសាឆ្នាំ២០១១ខាងមុខនេះមិនអាចធ្វើនៅកម្ពុជា ឬថៃបានទេ គឺត្រូវតែទៅប្រទេសទី៣ ។ សម្តេចបានបញ្ជាក់បន្ថែមទៀតថា ថៃមិនអាចធ្វើម្ចាស់ផ្ទះនៃកិច្ចប្រជុំទាំងនោះបានទេ ដោយសារតែការជជែកគ្នាទ្វេភាគីជាច្រើនឆ្នាំណាស់មកហើយ គ្មានលទ្ធផល ។ ម្យ៉ាងទៀត ប្រទេសឥណ្ឌូណេស៊ីបានធ្វើលិខិតអញ្ជើញរួចទៅហើយ ដើម្បីចូលរួមនៅក្នុងកិច្ចប្រជុំនេះ ចំណែកអនុព័ន្ធយោធាថៃ ក៏បានសរសេរលិខិតមកលោកទៀ បាញ់ រដ្ឋមន្រ្តីក្រសួងការពារជាតិដោយចង់ឱ្យមានកិច្ចប្រជុំនៅកម្ពុជា ឬនៅថៃ ប៉ុន្តែសម្តេចតេជោបានបញ្ជាក់ដាច់ណាត់ថា គ្មានកិច្ចប្រជុំណាមួយនៅកម្ពុជា ឬថៃទេ គឺទៅប្រជុំនៅប្រទេសទី៣ ព្រោះឥណ្ឌូណេស៊ីបានសរសេរលិខិតអញ្ជើញរួចទៅហើយ សម្តេចមិនចូលរួមណាមួយដើម្បីខោកក្បាលឥណ្ឌូណេស៊ីនោះទេ ។
សូមរំលឹកថា ក្រុមប្រឹក្សាសន្តិសុខអង្គការសហប្រជាជាតិ បានប្រគល់តួនាទីឱ្យប្រធានអាស៊ាន គឺឥណ្ឌូណេស៊ីជាអ្នកសម្របសម្រួលកម្ពុជា-ថៃ ។ ដូច្នេះឥណ្ឌូណេស៊ី គឺជាអ្នកដើរតួសម្របសម្រួលដ៏សំខាន់ ដោយឥណ្ឌូណេស៊ីអាចមកកម្ពុជា ឬទៅថៃដើម្បីសម្រុះសម្រួល ឬហៅប្រទេសទាំងពីរទៅទីក្រុងហ្សាការតាដើម្បីធ្វើការសម្រុះសម្រួល ដោយមិនអាចមានកិច្ចប្រជុំណាមួយនៅកម្ពុជា ឬនៅថៃទេ។ ដូច្នេះ បើថៃចេះតែរឹងរូសដូចជាការប្រកាន់ជំហរបំពានដូចនេះ គឺជាការជាន់ឈ្លីទៅលើសេចក្តីថ្លែងការណ៍នៃអង្គប្រជុំរដ្ឋមន្ត្រីការបរទេសអាស៊ានកាលពីថ្ងៃទី២២ កុម្ភៈ ឆ្នាំ២០១១ ដែលប្រធានអាស៊ានគប្បីពិចារណាដើម្បីការសម្រេចចិត្តក្នុងការទម្លុះទម្លាយបញ្ហានេះជាបន្ទាន់ ដែលមិនត្រូវទុកឱ្យភាគីថៃធ្វើព្យុះភ្លៀង ឬអូសបន្លាយពេលវេលា បង្កការរាំងស្ទះស្រេចតែអំពើចិត្តរបស់ខ្លួននោះឡើយ ៕
ចែករំលែកព័តមាននេះ