ជំនួបរវាងឃឹម បូរ៉ា និងម៉ឺន មេឃា ត្រូវលើកពេលទៅសប្ដាហ៍ក្រោយវិញ
- ភ្នំពេញ
រាជធានីភ្នំពេញ ៖ ការប្រកួតរវាងកីឡាករឃឹម បូរ៉ា មកពីក្លិបរាជសីហ៍ខេត្តបន្ទាយមានជ័យ ជាមួយកីឡាករម៉ឺន មេឃា សមាគម
រាជធានីភ្នំពេញ ៖ ការប្រកួតរវាងកីឡាករឃឹម បូរ៉ា មកពីក្លិបរាជសីហ៍ខេត្តបន្ទាយមានជ័យ ជាមួយកីឡាករម៉ឺន មេឃា សមាគមកីឡាប្រដាល់កងយោធពលខេមរភូមិន្ទ កាលពីល្ងាចថ្ងៃសៅរ៍ទី១០កក្កដាមិនត្រូវបានប្រកាសលទ្ធផលឡើយ ហើយគណៈកម្មការប្រកួតសម្រេចលើកការប្រកួតនេះទៀតនៅពេលក្រោយវិញ។
ការប្រកួតរវាងកីឡាករឃឹម បូរ៉ា ជាមួយកីឡាករម៉ឺន មេឃា គឺជាការប្រកួតវគ្គផ្ដាច់ព្រ័ត្រដណ្ដើមជើងឯកខ្សែក្រវាត់ដែលមានឈ្មោះថា «ជើងឯកប៉ះគ្នា» ដែលមានប្រាក់រង្វាន់អមរហូតដល់ទៅ២០លានរៀលឯណោះ ។ ប៉ុន្តែដោយសាតែការប្រកួតរវាងគេទាំងពីរមានភាពមិនប្រក្រតី ខណៈពេលដែលកីឡាករម៉ឺន មេឃា ធ្វើឱ្យខុសទៅនឹងច្បាប់ប្រកួតបានចាប់កីឡាករឃឹម បូរ៉ា បោកផ្ទប់ទៅនឹងតាពីនៅត្រឹមទឹកទី៣បណ្ដាលឱ្យ ឃឹម បូរ៉ា រហូតដល់ថ្នាក់សន្លប់ ។ ម្យ៉ាងវិញទៀត បើតាមការឱ្យដឹងពីគណៈកម្មការចៅក្រម ការប្រកួតនេះទៀត ឃឹម បូរ៉ា ឈ្នះដាច់៣ទឹករួចទៅហើយ ។ មានមតិមហាជានភាគច្រើនសុទ្ធតែបានលើកឡើងដូចៗគ្នាថា ដោយសាតែម៉ឺន មេឃា មានចិត្តចង់ឈ្នះពេក ទើបធ្វើឱ្យគេភ្លេចគិតពីច្បាប់ប្រកួតអស់ ហើយបានប្រើកម្លាំងចាប់ក្រៀក បូរ៉ាបោកផ្ទប់ទៅនឹងក្ដារេញរហូតដល់ថ្នាក់សន្លប់តែម្ដង ។
បើអនុវត្តតាមច្បាប់ប្រកួតម៉ឺន មេឃា ជាអ្នកខុសទាំងស្រុង ហើយបើសិនជាការប្រកួតធម្មតាគេពិតជាឱ្យម៉ឺន មេឃា ចាញ់ដោយស្វ័យប្រវត្តក៏ប៉ុន្តែ វាគឺជាការប្រកួតដណ្ដើមខ្សែក្រវាត់ ដូច្នេះទាំងគណៈកម្មការប្រកួតរបស់សហព័ន្ធកីឡាប្រដាល់គុនខ្មែរ ខាងស្ថានីយ៍ទូរទស្សន៍ក៏ដូចជាខាងម្ចាស់ឧបត្ថម្ភកម្មវិធី បានឯភាពគ្នាលើកការប្រកួតទៅសប្ដាហ៍ក្រោយៗទៀត តាមស្ថានភាពជាក់ស្ដែង ជាពិសេសគឺសម្រេចទៅលើកីឡាករឃឹម បូរ៉ា ដែលជាអ្នករងគ្រោះបើសិនជាគេថាអាចប្រកួតពេលណាបានគឺប្រកួតពេលនោះភ្លាម។
លោកម៉ា ស៊ីថេត អ្នកគ្រប់គ្រងកម្មវិធីប្រកួតកីឡាប្រដាល់ប្រចាំស្ថានីយ៍ទូរទស្សន៍ស៊ីអិនស៊ី បានឱ្យដឹងថា ចំពោះកីឡាករម៉ឺន មេឃា ចាប់បោកគូប្រកួតឱ្យសន្លប់នោះ វាពិតជាខុសទៅនឹងច្បាប់ប្រកួត១០០% ហើយគេប្រាកដជាឱ្យឃឹម បូរ៉ា ឈ្នះដោយស្វ័យប្រវត្តិ ប៉ុន្តែហេតុផលរបស់វាគឺនៅត្រង់ថា ឃឹម បូរ៉ា ជាម្ចាស់ខ្សែក្រវាត់ ស្រាប់បើសិនជាគណៈកម្មការប្រកួតឱ្យបូរ៉ា ឈ្នះគឺបានន័យថាបូរ៉ា នឹងបាត់បង់សេចក្ដីថ្លៃថ្នូក្នុងនាមជាម្ចាស់ខ្សែក្រវាត់រួចទៅហើយ ៗក៏មានមតិភាគច្រើនធ្វើការរិះគន់មិនខាន ព្រោះអីក្នុងនាមជាម្ចាស់ខ្សែក្រវាត់មិនត្រូវឈ្នះដោយបែបនេះនោះទេ គឺត្រូវតែប្រើប្រាស់សមត្ថភាពផ្ទាល់ខ្លួន។
លោកបន្តថា មួយវិញទៀត បើសិនជាឱ្យម៉ឺន មេឃា ឈ្នះក៏មានមហាជនជាច្រើនធ្វើការរិះគន់ផងដែរ ។ ដូច្នះហើយទើបគណៈកម្មការប្រកួតគ្រប់ស្ថាប័នពាក់ព័ន្ធបូករួមទាំងសាមីភាគីទាំងសងខាងក៏ បានឯកភាពគ្នាតាមការស្នើសំទៅសប្ដាហ៍ក្រោយដូចគ្នា។ប៉ុន្តែបើតាមការឱ្យដឹងពីមន្ត្រីសហព័ន្ធនៅថ្ងៃច័ន្ទស្អែកនេះសហព័ន្ធនឹងបើកកិច្ចប្រជុំផ្ទៃក្នុងរបស់ខ្លួន ដើម្បីដោះស្រាយថាតើត្រូវដាក់ទណ្ឌកម្មទៅលើ ម៉ឺន មេឃា ដោយរបៀបណា ចំពោះករណីដែលគេបានបង្ករឱ្យមានកំហុសបែបនេះ៕
ចែករំលែកព័តមាននេះ