រាជធានីភ្នំពេញ៖កិច្ចព្រមព្រៀងពាណិជ្ជកម្មសេរីរវាងកម្ពុជា ចិន(FTA) បន្ទាប់ពីបានចុះហត្ថលេខារួមគ្នាកាលពី១២តុលាឆ្នាំ២០២០រហូតមកដល់ពាក់កណ្តាលឆ្នាំ២០២១នេះ នៅមិនទាន់ចូលជាធរមាននៅឡើយនោះទេ ទាមទារឱ្យមានការពិនិត្យពីស្ថានប័នជំនាញផ្ទៃក្នុងរៀងៗខ្លួន។ប៉ុន្តែទោះជាយ៉ាងនេះក្តី កិច្ចព្រមព្រៀងពាណិជ្ជកម្មសេរីទ្វេភាគីរវាងកម្ពុជា ចិន រំពឹងថាអាចចូលជាធរមានបើមិនមានការប្រែប្រួលនោះទេ យ៉ាងយូរគឺនៅដើមឆ្នាំ២០២២ខាងមុខនេះ។
យោងតាមក្រសួងពាណិជ្ជកម្ម កាលពីថ្ងៃទី៨កក្កដាឆ្នាំ២០២១នេះបានបង្ហាញថាថ្នាក់ដឹកនាំក្រសួងពាណិជ្ជកម្មបានចូលរួមកិច្ចប្រជុំការពារសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-ចិន ជាមួយគណៈកម្មការជំនាញនៃរដ្ឋសភា ហើយកិច្ចប្រជុំខាងលើនេះមានគោលបំណងសំខាន់គឺដើម្បីពិនិត្យលើសេចក្តីព្រាងច្បាប់ ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេរីកម្ពុជា-ចិន ដើម្បីកិច្ចព្រមព្រៀងនេះអាចចូលជាធរមានបាននៅថ្ងៃទី១ ខែមករា ឆ្នាំ២០២២ ខាងមុខ។
ឯកឧត្តម ប៉ែន សុវិជាតិ អនុរដ្ឋលេខាធិការនិងជាអ្នកនាំពាក្យក្រសួងពាណិជ្ជកម្ម បានឱ្យដឹងនៅថ្ងៃទី៩កក្កដានេះថា យើងត្រូវការបំពេញនិតីវិធីផ្ទៃក្នុងដូចនិងភាគីចិនដូចក្នា អីចឹងនីតិវិធីយើងត្រូវឆ្លងកាត់ គណកម្មការជំនាញរបស់រដ្ឋសភា(គណកម្មការទី៩) ត្រូវការពិនិត្យមើលលើអត្ថន័យផ្សេងៗ ហើយដើម្បីធ្វើសេចក្តីរាយការទៅកិច្ចប្រជុំពេញអង្គ មុននិងដាក់សេចក្តីព្រាងច្បាប់នេះ ឱ្យសមាជិកសភានិងអង្គប្រជុំពេញអង្គបានអនុម័យ។
ឯកឧត្តម សង្កត់ធ្ងន់ថា« យើងសង្ឃឹមថា សេចក្តីព្រៀងច្បាប់នេះអាចដាក់ប្រជុំបានក្នុងបំណាច់ខែកញ្ញា ខាងមុខ ដើម្បីទុករយៈពេលខ្លះសម្រាប់ជូនដំណឹងទៅវិញទៅមករវាងភាគីទាំងពីរ ហើយយើងរំពឹងថា បន្ទាប់ពីជួនដំណឹងទៅវិញទៅមករយៈពេល៣ខែ យើងអាចចូលជាធរមាននៅដើមឆ្នាំ២០២២ ព្រោះគណកម្មការជំនាញរដ្ឋសភា បានពិនិត្យហើយនិងបានឯកភាពយ៉ាងល្អិតល្អន់ទៅលើកិច្ចការនេះ»។
បើតាមឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានបង្ហាញពីខ្លឹមសារនិងអន្តរប្រយោជន៍ពីសេចក្តីព្រាងច្បាប់ពាណិជ្ជកម្មសេរីកម្ពុជា ចិន៖១)- ការទទួលបានការបើកទីផ្សារឱ្យបានធំជាងមុន និងប្រសើរជាងមុន សម្រាប់មុខទំនិញកសិផល បន្លែផ្លែឈើ ផលិតផលកែច្នៃ និងសិប្បកម្ម និងផលិតផលជាច្រើនទៀត ស្របពេលដែលកម្ពុជាអាចផលិតបាន និងអនុលោមតាមវិធានអនាម័យ និងស្តង់ដារ។ ២)- ការទទួលបានលំហូរទីផ្សារពាណិជ្ជកម្មសេវាកម្ម ដែលកម្ពុជាអាចនាំចេញ ក្នុងករណីមានការបណ្តុះបណ្តាល ជំនាញ និងមានគុណវុឌ្ឍិគ្រប់គ្រាន់ ជាពិសេសនៅពេលដែលកម្ពុជាអាចពង្រឹងខ្លួនឯងឱ្យរឹងមាំក្នុងវិស័យសេវាកម្មនាពេលអនាគត។
៣)- ផ្តល់កាលានុវត្តភាពផ្នែកវិនិយោគដល់កម្ពុជាបានកាន់តែច្រើន ដែលនឹងផ្តល់ឱកាសដល់ធុរជនកម្ពុជា ដែលមានបំណងពង្រីកទីផ្សារសេវាកម្ម និងទំនិញនាំចេញឱ្យកាន់តែសម្បូរបែបទៅកាន់ទីផ្សារចិន។ ៤)- ការទទួលបានផលប្រយោជន៍ពីការផ្ទេរបច្ចេកវិទ្យា ចំណេះដឹង ចំណេះធ្វើ និងជំនាញថ្មីៗពីការវិនិយោគផ្ទាល់របស់បរទេស ព្រមទាំងបង្កើតការងារថ្មីៗជូនប្រជាជនកម្ពុជា ហើយក៏ជាកត្តាដ៏សំខាន់ចូលរួមពង្រឹងដល់វិស័យផលិតកម្មក្នុងស្រុក។ ៥)- ការកំណត់ឱ្យកាន់តែច្បាស់នូវរាល់នីតិវិធីទាក់ទងនឹងវិធានដើមកំណើតទំនិញ គយនិងសម្រួលពាណិជ្ជកម្ម អនាម័យ និងភូតគាមអនាម័យ និងរបាំងបច្ចេកទេសលើការធ្វើពាណិជ្ជកម្ម និងការធ្វើសាមញ្ញកម្ម ដើម្បីងាយស្រួលអនុវត្ត និងសម្រួលដល់ការធ្វើពាណិជ្ជកម្ម។ និង៦)- ការរៀបចំ និងការបង្កើតនូវបរិយាកាសវិនិយោគ និងនយោបាយទាក់ទាញវិនិយោគទុនពីបរទេសជាដើម។
ឯកឧត្តមរដ្ឋមន្ត្រីបានបញ្ជាក់ថា« ការសម្រេចបាននូវកិច្ចព្រមព្រៀងពាណិជ្ជកម្មសេរីកម្ពុជា-ចិន ពិតជាបានចូលរួមអនុវត្តយុទ្ធសាស្ត្រ ចតុកោណដំណាក់កាលទី៤របស់រាជរដ្ឋាភិបាលនីតិកាលទី៦នៃរដ្ឋសភា ស្របតាមចំណុចទី៤ ស្តីពីការពង្រឹង សមត្ថភាពកម្ពុជា ដើម្បីបន្តសមាហរណកម្មខ្លួនចូលក្នុងសេដ្ឋកិច្ចតំបន់និងពិភពលោក ដែលបានកំណត់ក្រោម ផ្នែកទី២.២.២ ស្តីពីបរិស្ថានគ្របដណ្តប់សម្រាប់ការអនុវត្តយុទ្ធសាស្ត្រទាំងមូល។
ជាពិសេស ក្នុងកាលៈទេសៈវិបត្តិជំងឺឆ្លងកូវីដ-១៩នេះ កិច្ចព្រមព្រៀងនេះក៏នឹងជួយដល់យុទ្ធសាស្ត្រស្តារឡើងវិញនូវសេដ្ឋកិច្ចកម្ពុជា ដែលបានរងការញាំញីយ៉ាងធ្ងន់ធ្ងរពីជំងឺកូវីដ-១៩ ព្រមទាំងជួយឱ្យមានភាពសាំនៃសង្គម-សេដ្ឋកិច្ចក្នុងប្រក្រតីភាពថ្មីនៃសង្គមកម្ពុជា តាមរយៈកំណើននៃការនាំចេញទៅទីផ្សារចិន និងលំហូរវិនិយោគចូលមកកម្ពុជា ដែលនឹងជួយបង្កើតការងារ និងចំណូលជូនប្រជាពលរដ្ឋយើង»៕
ចែករំលែកព័តមាននេះ