រាជធានីភ្នំពេញ ៖ ភ្ញៀវទេសចរអន្តរជាតិចូលមកទស្សនាតំបន់រមណីយដ្ឋានានាក្នុងប្រទេសកម្ពុជានៅតែបន្តធ្លាក់ចុះហើយធ្លាក់ចុះកាន់តែខ្លាំងបើធៀបនឹងឆ្នាំ២០២០កន្លងទៅជាក់ស្ដែងក្នុងរយៈពេល៥ខែដំបូងឆ្នាំ២០២១នេះ ពីខែមករា ដល់ដំណាច់ខែឧសភា ២០២១ កម្ពុជាទទួលបានភ្ញៀវទេសចរអន្តរជាតិតែជាង៩ម៉ឺននាក់ប៉ុណ្ណោះ ។ នេះបើតាមរបាយការណ៍របស់ក្រសួងទេសចរណ៍នៅថ្ងៃទី០៩កក្កដា ២០២១…
រាជធានីភ្នំពេញ ៖ ភ្ញៀវទេសចរអន្តរជាតិចូលមកទស្សនាតំបន់រមណីយដ្ឋានានាក្នុងប្រទេសកម្ពុជានៅតែបន្តធ្លាក់ចុះហើយធ្លាក់ចុះកាន់តែខ្លាំងបើធៀបនឹងឆ្នាំ២០២០កន្លងទៅជាក់ស្ដែងក្នុងរយៈពេល៥ខែដំបូងឆ្នាំ២០២១នេះ ពីខែមករា ដល់ដំណាច់ខែឧសភា ២០២១ កម្ពុជាទទួលបានភ្ញៀវទេសចរអន្តរជាតិតែជាង៩ម៉ឺននាក់ប៉ុណ្ណោះ ។ នេះបើតាមរបាយការណ៍របស់ក្រសួងទេសចរណ៍នៅថ្ងៃទី០៩កក្កដា ២០២១ ។
តាមរបាយការណ៍របស់នាយកដ្ឋានស្ថិតិទេសចរណ៍ បានឱ្យដឹងថាក្នុងរយៈពេល៥ខែ នៃឆ្នាំ២០២១ (មករា-ឧសភា) មានភ្ញៀវទេសចរអន្តរជាតិសរុប ៩១.៥៩៦ នាក់ បានធ្វើដំណើរចូលមកកាន់ប្រទេសកម្ពុជា ភាគច្រើននៃអ្នកដំណើរអន្តរជាតិទាំងនេះ គឺជាអ្នកជំនួញ អ្នកវិនិយោគ ហើយបើធៀបនឹងរយៈពេលដូចគ្នាកាលពីឆ្នាំ២០២០មានការថយចុះរហូតដល់៩២,២ភាគរយ ដែលកាលពី៥ខែឆ្នាំមុនកម្ពុជាទទួលភ្ញៀវចំនួន ១.១៧០.៥៤២ នាក់ ។
យោងតាមរបាយការណ៍ដដែលនេះ ក៏បានបង្ហាញផងដែរថា រយៈពេល៥ខែនៃឆ្នាំ២០២១នេះ ភ្ញៀវទេសចរចូលកម្ពុជាតាមច្រកអាកាសយានដ្ឋានអន្តរជាតិសរុបមានចំនួន៤១.៩១១នាក់ ក្នុងនោះតាមច្រកអាកាសយានដ្ឋានអន្តរជាតិភ្នំពេញមាន៣៤.៤៦៨នាក់តាមអាកាសយានដ្ឋានអន្តរជាតិកងកេងខេត្តព្រះសីហនុមានចំនួន៧.៤៣៩នាក់ និងតាមច្រកអាកាសយានដ្ឋានអន្តរជាតិខេត្តសៀមរាប មានចំនួន៤នាក់ ។ដោយឡែកភ្ញៀវអន្តរជាតិចូលកម្ពុជាតាមច្រកព្រំដែនមានចំនួន ៤៩.៦៨៣នាក់ផងដែរ ។
អ្នកជំនាញ នៃវិស័យទេសចរណ៍កម្ពុជាបានមើលឃើញថា ស្ថានភាពទេសចរណ៍កម្ពុជានិងពិភពលោកក្នុងឆ្នាំ២០២១នេះ នៅតែមិនទាន់អាចមានកំណើនឡើងវិញបាននោះទេ ក្នុងពេលដែលវិបត្តិកូវីដ១៩ និងការរីករាលដាលនៅតែបន្តទាំងថ្នាក់តំបន់និងពិភពលោក បើទោះបីជាពិភពលោកកំពុងធ្វើយុទ្ធនាការចាក់វ៉ាក់សាំងជូនប្រជាពលរដ្ឋតាមប្រទេសនីមួយៗក្ដី ។ តែយ៉ាងណាក្ដី ក្រសួងទេសចរណ៍កម្ពុជាក៏បានត្រៀមរៀបចំផ្នែកខាងក្នុងដើម្បីស្វាគមន៍ភ្ញៀវទេសចរអន្តរជាតិដែលចូលមកកម្ពុជាឡើងវិញនៅពេលឆាប់ៗនេះ ។ ក្រសួងទេសចរណ៍បានបណ្ដុះបណ្ដាលធនធានមនុស្សក្នុងប្រទេសជាបន្តបន្ទាប់ ដើម្បីទទួលស្វាគមន៍ភ្ញៀវទេសចរជាតិនិងអន្តរជាតិនៅពេលចប់កូវីដ១៩ ។
លោកហូ វណ្ឌីទីប្រឹក្សាសមាគមទីភ្នាក់ងារទេសចរណ៍កម្ពុជា បានលើកឡើងថាការត្រៀមខ្លួនក្នុងការទទួលស្វាគមន៍ភ្ញៀវទេសចរអន្តរជាតិគួរតែត្រូវធ្វើឱ្យរួចរាល់ កុំចាំដល់ពេលចប់កូវីដ១៩ហើយទើបធ្វើពេលនោះ យើងទទួលភ្ញៀវទេសចរមិនបានល្អនោះឡើយ ។
លោកបន្តថា យើងពិតជាអាចស្មានបានថាវិបត្តិកូវីដ១៩នឹងបញ្ចប់នៅពេលណានោះឡើយ ។ បើសិនជាវាចប់ឆាប់ៗ ហើយភ្ញៀវក៏សម្រុកចូលមកកម្ពុជាទាំងដែលយើងមិនទាន់បានត្រៀមខ្លួន ពេលនោះយើងមិនដឹងថាតើត្រូវស្វាគមន៍យ៉ាងបានល្អ ហើយភ្ញៀវមកកម្ពុជាតែយើងទទួលមិនបានល្អគេអាចនឹងយកទៅផ្សព្វផ្សាយដល់ប្រជាជនគេឈប់កម្ពុជាក៏អាចថាបានដែរ ។
គួរបញ្ជាក់ថានៅក្នុងវិបត្តិកូវីដ១៩នេះ វិស័យទេសចរណ៍ហាក់ទទួលរងផលប៉ះពាល់ធ្ងន់ធ្ងរជាងគេ ដែលធ្វើឱ្យក្រុមហ៊ុនទេសចរណ៍ ក្រុមហ៊ុនអាកាសចរណ៍ និងភ្នាក់ងារទេសចរណ៍ជាច្រើនត្រូវដួលរលំនិងបិទក្រុមហ៊ុននៅក្នុងវិបត្តិកូវីដ១៩នេះ ។ នៅក្នុងវិស័យនេះក៏មានបុគ្គលិកបាត់បង់ការងារយ៉ាងច្រើនផងដែរ អ្វីដែលសំខាន់នោះ ការលក់ប័ណ្ណចូលទស្សនាជូនជនបរទេសទស្សនារមណីយដ្ឋានអង្គរក៏បានបាត់ចំណូលយ៉ាងច្រើនផងដែរ ដោយរាល់ឆ្នាំ មុនវិបត្តិកូវីដ១៩ការលក់បណ្ណជាមធ្យមប្រមាណ១០លានដុល្លារអាមេរិកក្នុងមួយខែតែរយៈពេល៦ខែនេះ ការលក់ប័ណ្ណ ជូនភ្ញៀវបរទេសទទួលបានចំណូលតែប្រមាណតែជាង២០ម៉ឺនដុល្លារអាមេរិកប៉ុណ្ណោះ ៕
ចែករំលែកព័តមាននេះ